سالتاناتتى راسىمگە جاپونيانىڭ قازاقستانداعى ەلشىسى يتيرو كاباۆاتا, ەلىمىزدىڭ سىرتقى ىستەر ءمينيسترىنىڭ ورىنباسارى رومان ۆاسيلەنكو قاتىستى. قۇتتىقتاۋ سوزىندە ي.كاباۆاتا قازاقستان مەن جاپونيا اراسىنداعى ديپلوماتيالىق قارىم-قاتىناستىڭ ورناعانىا 25 جىل تولعانىمەن قۇتتىقتاپ, بەيبىتشىلىك پەن يادرولىق قارۋدى تاراتپاۋ جونىندە ەكى ەلدىڭ ارىپتەستىك ورناتقانىن اتاپ ءوتتى.
«بيىل جاپونيا مەن قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەلەرى رەتىندە بەيبىتشىلىك پەن حالىقارالىق قاۋىمداستىقتىڭ قاۋىپسىزدىگى جولىندا بىرلەسە قىزمەت اتقارىپ كەلەدى. يادرولىق قارۋسىزدانۋ مەن يادرولىق قارۋدى تاراتپاۋ قازاقستان مەن جاپونيا قاتىناستارىنىڭ نەگىزى باعىتى. سوندىقتان جاپونيا «نەۆادا-سەمەي» حالىقارالىق يادرولىق قارۋعا قارسى قوزعالىستىڭ پرەزيدەنتى ولجاس سۇلەيمەنوۆتى يادرولىق قارۋدى تاراتپاۋ سالاسىنداعى ىنتىماقتاستىق ارقىلى ەكى ەل اراسىنداعى دوستىق قاتىناستاردىڭ دامۋىنا زور ۇلەس قوسقانى ءۇشىن «كۇنشىعىس ەلى, گۇلورنەكتى التىن شۋاق» وردەنىمەن ماراپاتتادى», دەدى ي.كاباۆاتا.
ەلشىنىڭ ايتۋىنشا, ەكى ەل اراسىنداعى بايلانىس نىعايىپ كەلەدى. ماسەلەن, استانادا وتكەن "ەكسپو-2017" حالىقارالىق كورمەسىنە جاپونيا تاراپى بەلسەنە قاتىستى. سونداي-اق, ەلىمىزدە كۇن شىعىس ەلىنىڭ مادەنيەتى كەڭىنەن تانىستىرىلدى. ماسەلەن, "قالامپىر" تەلەحيكاياسى قازاق تىلىندە كورەرمەنگە جول تارتىپ, "اقتاستاعى احيكو" قويىلىمى حالىق نازارىنا ۇسىنىلدى.
ءوز كەزەگىندە ولجاس سۇلەيمەنوۆ جاپونياعا دەگەن شەكسىز قۇرمەتىن جەتكىزدى.
«مەن جاپونيا ەلشىلىكتەرىنىڭ كوپتەگەن قابىلداۋلارىندا بولدىم. ال بۇگىن ءبىرىنشى رەت وردەنمەن قايتقالى تۇرمىن. جاپونياعا بىرنەشە رەت ساپارمەن باردىم. العاشقى ساپارىمنان بەرى بەرى جاپون حالقىن, جاپون مادەنيەتىن, زياتكەرلىك جانە رۋحاني الەۋەتىن ەرەكشە قۇرمەتتەيمىن», دەدى ولجاس سۇلەيمەنوۆ.
سالتاناتتى شارا جاپون يمپەراتورى احيكيتونىڭ تۋعان كۇنىنە وراي جاپونيا ەلشىلىگى تاراپىنان ۇيىمداستىرىلدى. «كۇنشىعىس ەلى, گۇلورنەكتى التىن شۋاق» وردەنى 1875 جىلدان بەرى ازاماتتىق جانە اسكەري قىزمەتى ءۇشىن تابىستالاتىن ماراپات. وردەن جاپونياداعى ەڭ ۇزدىك ءۇش ماراپاتتىڭ قاتارىنا جاتادى.
ولجاس سۇلەيمەنوۆ - جاپونيانىڭ ماراپاتىن العان ءۇشىنشى قازاقستاندىق. بۇعان دەيىن 2008 جىلى قازاقستان پرەزيدەنتى نۇرسۇلتان نازارباەۆ «ۇلكەن لەنتاداعى حريزانتەما وردەنىمەن» ماراپاتتالسا, 2006 جىلى - قازاقستانداعى جاپون تۇتقىنداردىڭ زيراتىن ىزدەۋمەن اينالىسقان تاريحشى اسقانبەك الدانازاروۆ «كۇنشىعىس, التىن شۋاق وردەنىنىڭ» يەسى اتاندى.
