اكادەميا باسشىسى دارحان قىدىرالى جۇرگىزگەن سالتاناتتى شاراعا ازەربايجان رەسپۋبليكاسىنىڭ قازاقستانداعى ەلشىسى راشاد ماممادوۆ, ازەربايجان ۇلتتىق ءماجىلىسىنىڭ (ميللي مەجليس) دەپۋتاتى ەلمان ناسيروۆ, تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ جانە قازاقستانداعى ازەربايجان ەتنومادەني ورتالىعىنىڭ توراعاسى ءابىلفاس حامەدوۆ قاتىستى. سونىمەن بىرگە, جيىندا زيالى قاۋىم وكىلدەرى, كورنەكتى عالىمدار مەن ازەربايجاننان جانە تۇركيادان كەلگەن تانىمال جۋرناليستەر بولدى.
«كۇنى كەشە ازەربايجان مەن قازاقستاننىڭ ديپلوماتيالىق بايلانىسىنا 25 جىل تولعانىن سالتاناتتى تۇردە اتاپ وتتىك. سول شارادا ازەربايجاندىق قايراتكەرلەر, دەپۋتاتتار قازاقستان پرەزيدەنتىنىڭ جارلىعىمەن ارنايى مەدالمەن ماراپپاتتالدى. ازەربايجان رەسپۋبليكاسى مەن قازاقستاننىڭ قارىم-قاتىناسىنا دانەكەر بولاتىن سونداي شارالاردىڭ ءبىرى – ازەربايجان رەسپۋبليكاسى پرەزيدەنتىنىڭ قوعامدىق-ساياسي ماسەلەلەر بويىنشا كومەكشىسى, پروفەسسور ءالي گاسانوۆتىڭ «كاسپي-قارا تەڭىز باسسەينى جانە وڭتۇستىك كاۆكازدىڭ گەوەكونوميكاسى: ازەربايجاننىڭ ەنەرگەتيكالىق ساياساتى» اتتى قازاق تىلىنە اۋدارىلعان كىتابىنىڭ تۇساۋكەسەرى. حازار تەڭىزىنىڭ جاعاسىنداعى مەملەكەتتەردىڭ ىنتىماقتاستىعى تۋرالى كىتاپتى ءبىزدىڭ اكادەميانىڭ قىزمەتكەرلەرى اسا ىجداھاتتىلىقپەن اۋدارىپ شىقتى. ەكى ەل اراسىنداعى ورتاق ماڭىزدى جوبالاردىڭ دا سيپاتى ايقىن كورىنگەن. بۇل كىتاپ ايماقتانۋشى, گەوەكونوميكامەن اينالىساتىن جاس ماماندار ءۇشىن وتە پايدالى بولادى دەپ ەسەپتەيمىن», دەدى تۇركى اكادەمياسىنىڭ باسشىسى دارحان قىدىرالى.
تۇساۋكەسەردە ءسوز العان ازەربايجان رەسپۋبليكاسىنىڭ قازاقستانداعى ەلشىسى راشاد ماممادوۆ: «ەگەر ءبىز ەلىمىزدە ناقتى ازەربايجان مەن قازاقستاندى زەرتتەيتىن ماماندار بار دەسەك, ءبىر-ءبىرىمىزدى وتە جاقىن بىلەمىز دەسەك قاتەلەسەر ەدىك. الدىڭعى تولقىن اعالارىمىز جاقسى بىلەدى, كەڭەس ۇكىمەتى ءوز مۇددەسى ءۇشىن وداقتاس رەسپۋبليكالاردى زەرتتەيتىن ماماندار دايارلادى. ەندى ءبىز تاۋەلسىز ەل بولعان كەزدە ساياسي قارىم-قاتىناستىڭ نازىك تۇستارىن جاقسى بىلەتىن, ءبىر-ءبىرىمىزدى تولىق تۇسىنەتىن بىلىكتى مامانداردى ءوزىمىز تاربيەلەپ شىعارۋىمىز كەرەك. ءالي گاسانوۆتىڭ بۇل كىتابى سول ۇلكەن داڭعىلدىڭ العىشارتى دەپ ەسەپتەيمىن. بۇل كىسى ازەربايجان رەسپۋبليكاسىنداعى گەوساياسات عىلىمىنىڭ نەگىزىن قالاۋشى. ءالي گاسانوۆقا دەيىن بۇل سالانى زەرتتەگەن مامان بولعان جوق. تۇركى اكادەمياسىنىڭ سوڭعى كەزدەرى بۇنداي كىتاپتاردى باۋىرلاس حالىقتاردىڭ تىلىنە اۋدارا باستاۋى ۇلكەن ەڭبەك. سەبەبى بۇل كىتاپتىڭ نە ەكەنىن جاقسى تۇسىنەتىن, ەرتەڭىن ويلايتىن زەردەلى حالىقتىڭ ءىسى بوپ سانالادى. سوندىقتان ەكى ەل اراسىنداعى قارىم-قاتىناستى بارىنشا قولداپ وتىرعان نۇرسۇلتان نازارباەۆقا, تۇركى اكادەمياسىنىڭ باسشىسى دارحان قىدىرالىگە, كىتاپتى اۋدارىپ, باسقان ۇجىمعا ەل اتىنان العىس ايتامىن», دەدى.
وقىرمان نازارىنا ۇسىنىلعان كىتاپتا الەمنىڭ جەتەكشى ەلدەرىنىڭ گەوەكونوميكالىق مۇددەلەرى تۇرعىسىنان كاسپي-قارا تەڭىز باسسەينى مەن وڭتۇستىك كاۆكازدا جۇرگىزىلىپ وتىرعان گەوساياسات, ازەربايجان رەسپۋبليكاسىنىڭ قازىرگى جانە بولاشاقتاعى ەكونوميكالىق دامۋ ماسەلەلەرى قاراستىرىلىپ, ۇلتتىق مۇددەلەردى قامتاماسىز ەتۋدەگى مەملەكەتتىك ساياسات نەگىزدەرى اشىپ كورسەتىلەدى. كىتاپتىڭ العىسوزىن اكادەميا باسشىسى د.قىدىرالى جازعان.
باعاشار تۇرسىنباي ۇلى,
«ەگەمەن قازاقستان»
