جيىنعا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ, «رۋحاني كەلىسىم كونگرەسى» حالىقارالىق قوعامدىق قورىنىڭ پرەزيدەنتى تولەگەن مۇحامەدجانوۆ قاتىستى.
كونفەرەنتسيانىڭ پلەنارلىق سەسسياسىندا قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ جيىنعا قاتىسۋشىلارعا مەملەكەتتىك حاتشى گۇلشارا ابدىقالىقوۆانىڭ قۇتتىقتاۋ حاتىن وقىپ بەردى.
«ۇلتتىق بىرەگەيلىكتى ساقتاۋ جانە نىعايتۋ – كوپ قىرلى ءارى جاۋاپتى مىندەت. ونى لايىقتى دەڭگەيدە ىسكە اسىرۋ جاھاندىق وزگەرىستەر زامانىنداعى تۇراقتى دامۋدىڭ كەپىلى بولىپ تابىلادى. تاۋەلسىزدىك جىلدارى قازاقستان ۇلتتىق بىرەگەيلىك پەن قوعام بىرلىگىن ارتتىرۋدىڭ وزىندىك مودەلىن قالىپتاستىردى. بۇل – ەلباسى نۇرسۇلتان نازارباەۆتىڭ ەسىمىمەن تىكەلەي بايلانىستى», دەلىنگەن مەملەكەتتىك حاتشىنىڭ حاتىندا.
سونىمەن قاتار, ءدىن ىستەرى جانە ازاماتتىق قوعام ءمينيسترى ن. ەرمەكباەۆ كونفەرەنتسياعا جينالعاندارعا ارناپ بايانداما وقىدى. ونىڭ ايتۋىنشا, ەلباسىنىڭ تاريحي شەشىمدەرى قازاقستاندا كونفەسسياارالىق جانە قوعامدىق كەلىسىمدى ناسيحاتتايتىن زايىرلى مەملەكەت قۇرۋعا مۇمكىندىك بەردى. سونىمەن قاتار, ۆەدومستۆو باسشىسى قازاقستاندا يسلام ءدىنىن قابىلداۋدىڭ وزىندىك مودەلى قالىپتاسقانىن اتاپ ءوتتى.
«قازاقستانداعى تۇراقتىلىق پەن كەلىسىمنىڭ قۇپياسى نەدە؟ ونىڭ جاۋابى – انىق. تاۋەلسىزدىكتىڭ العاشقى كۇندەرىنەن باستاپ, ەلباسىنىڭ بارلىق باستامالارى قازاقستاندىقتاردىڭ بىرلىگىن نىعايتۋعا باعىتتالدى. پرەزيدەنت اتاپ كورسەتكەندەي, قازاقستاننىڭ تاريحى بىرلىكتى ناسيحاتتايدى», دەدى ن.ەرمەكباەۆ.
كونفەرەنتسياعا گۋمانيتارلىق باعىتتاعى سالالاردا ەڭبەك ەتىپ جۇرگەن ەلىمىزدىڭ قوعام قايراتكەرلەرى مەن عالىمدارى, گەرمانيا, ءۇندىستان, يران, قىرعىزستان, وزبەكستان ەلدەرىنەن كەلگەن ساراپشىلار قاتىستى. جيىننىڭ ماقساتى الەم ەلدەرىندەگى بىرەگەيلىكتىڭ قالىپتاسۋ ماسەلەلەرىن قازاقستاندىق تاجىريبەمەن سالىستىرا وتىرىپ, ەتنوسارالىق جانە كونفەسسياارالىق كەلىسىمنىڭ قازاقستاندىق ۇلگىسىنىڭ ارتىقشىلىقتارىن تالقىلاۋ. ىرگەلى شارا بارىسىندا قازاقستاننىڭ ءۇشىنشى جاڭعىرۋىنىڭ مىندەتتەرى, رۋحاني جاڭعىرۋ مەن قوعامدىق سانا, بىرەگەيلىك ماسەلەلەرى جان-جاقتى ءسوز بولدى.
اباي اسانكەلدى ۇلى,
«ەگەمەن قازاقستان»
