قازىرگى تاڭدا ەلىمىزدە حالىقارالىق تالاپتارعا سايكەس ەڭبەك قاۋىپسىزدىگى جانە ەڭبەكتى قورعاۋ ستاندارتتارىن جاڭارتۋ بويىنشا جۇمىستار جۇرگىزىلىپ جاتىر. بۇل ۇدەرىستى 2021 جىلعا قاراي اياقتاۋ قاجەت.
«قىزمەتكەرلەردىڭ دەنساۋلىعى مەن ەڭبەكتى قورعاۋدىڭ ىنتالاندىرۋشى شارالارى ەنگىزىلىپ جاتىر. ماسەلەن, ەلىمىزدىڭ 1400-دەن استام كاسىپورنى حالىقارالىق ەڭبەك ۇيىمى ۇسىنعان ەڭبەك قاۋىپسىزدىگى مەن ەڭبەكتى قورعاۋ ستاندارتتارىن ەنگىزدى », — دەدى تامارا دۇيسەنوۆا.
بۇدان وزگە, جۇمىس بەرۋشى ءوز قىزمەتىنىڭ ەڭبەك زاڭناماسىنىڭ تالاپتارىنا سايكەستىگىن ەرىكتى تۇردە ماعلۇمداۋ تەتىگى ىسكە اسىرىلادى. بۇگىندە 131 جۇمىس بەرۋشى وسىنداي سەرتيفيكاتتىڭ يەگەرى بولدى جانە جوسپارلى تەكسەرۋگە جاتاتىن كاسىپورىندار تىزىمىنەن ءۇش جىلعا بوساتىلدى.
ءمينيستردىڭ ايتۋىنشا, مەملەكەتتىك ورگاندار مەن جۇمىس بەرۋشىلەردىڭ قابىلداعان كەشەندى شارالارىنىڭ ارقاسىندا جۇمىسشىلار ءۇشىن قاۋىپسىز ەڭبەك جاعدايلارىن جاساۋدا وڭ قارقىن ساقتالعان.
«2016 جىلى وندىرىستە زارداپ شەككەندەر سانى 2015 جىلمەن سالىستىرعاندا 2,4%-عا تومەندەگەن», — دەدى ت. دۇيسەنوۆا.
جۇمىسشىلارعا زياندى جاعدايدا ەڭبەك ەتكەنىنە تولەنەتىن ءتۇرلى وتەماقىلار شىعىنى 2012 جىلعى 78 ملرد تەڭگەدەن 2016 جىلى 100 ملرد تەڭگەگە دەيىن ۇلعايتىلدى.
«بۇل شىعىنداردى قىسقارتىپ, جۇمىس بەرۋشىلەر ەڭبەك جاعدايلارىن جاقسارتۋ نەمەسە جۇمىسشىلاردى قاۋىپسىز جۇمىس تۇرلەرىنە اۋىستىرۋ ارقىلى جۇكتەمەنى ازايتا الادى», — دەدى مينيستر.
مينيستر, سونداي-اق, زياندى ءوندىرىس جاعدايىندا جۇمىس ىستەيتىن جۇمىسشىلاردىڭ كەمىندە التى كۇندىك ۇزاقتىعى بار قوسىمشا دەمالىس الۋعا قۇقىعى بار ەكەنىن ەسكە سالادى. بۇل وتەماقى ەڭبەك كودەكسىندە جازىلعان.
بۇگىندە ءتيىستى عىلىمي-قولدانبالى زەرتتەۋلەر جۇرگىزىلۋدە جانە 2018–2019 جىلدارى ەڭبەك زاڭناماسىنا زياندى ەڭبەك جاعدايلارىندا قىزمەت ەتەتىن جۇمىسشىلارعا (قوسىمشا دەمالىس, جۇمىس ۋاقىتىنىڭ قىسقارتىلۋى, ەڭبەكاقىنىڭ جوعارلاۋى) كەپىلدىكتەردى سارالانعان تۇردە ۇسىنۋ ارقىلى جاڭا تاسىلدەر ەنگىزىلەتىن بولادى, اتتەستاتتاۋ ناتيجەلەرىن ەسكەرە وتىرىپ كەپىلدىكتەر كولەمى انىقتالادى.
بايانداما سوڭىندا تامارا دۇيسەنوۆا مينيسترلىك وسى باعىتتا جۇمىسىن جالعاستىرىپ جاتقانىن اتاپ ءوتتى.
سونىمەن قاتار ماسەلەنى قاراۋ بارىسىندا «ارسەلورميتتال تەمىرتاۋ» اق باس ديرەكتورى پارامجيت كالون, اتىراۋ وبلىسىنىڭ اكىمى نۇرلان نوعاەۆ جانە پرەمەر-ءمينيستردىڭ ورىنباسارى اسقار مامين ءسوز سويلەدى.
