قازىرگى تاڭدا وبلىستىق جەرگىلىكتى اتقارۋشى ورگاندار تاراپىنان 192 قىزمەت ءتۇرى كورسەتىلەدى. اعىمداعى جىلدىڭ 10 ايىنىڭ قورىتىندىسى بويىنشا 7 027 180 قىزمەت ەلەكتروندى تۇردە كورسەتىلىپتى. بۇل جالپى كورسەتىلگەن قىزمەتتەردىڭ 42,8 پايىزىن قۇراپ وتىر.
«كورسەتىلگەن قىزمەتتەردىڭ 80 پايىزى دەنساۋلىق ساقتاۋ سالاسىنا تيەسىلى جانە وسى سالاداعى قىزمەتتەردىڭ ەلەكتروندى ۇلەسىن ارتتىرۋ ەلەۋلى وزگەرىستەرگە اكەلەتىنى بەلگىلى», - دەدى وبلىس اكىمىنىڭ اپپارات باسشىسىنىڭ ورىنباسارى قانات تولەنديەۆ.
سوڭعى 10 ايدىڭ قورىتىندىسى بويىنشا حقكو ارقىلى 541 816 ەلەكتروندى قولتاڭبا بەرىلگەن. الايدا ەلەكتروندى قىزمەتتەردىڭ ۇلەسى ءالى دە تومەن. سەبەبى قىزمەت ۇسىنۋشى مەملەكەتتىك ورگاندار تاراپىنان ەلەكتروندى قىزمەتتەردى الۋ جولدارى تۇرعىندارعا ءوز دەڭگەيىندە ناسيحاتتالمايدى. بۇدان بولەك, اقپاراتتىق جۇيەلەر ارقىلى كەلگەن وتىنىمدەردى تىركەمەي, تىكەلەي, مەملەكەتتىك ورگاننىڭ كەڭسەسى ارقىلى كورسەتۋ فاكتىلەرى ورىن الۋدا.
«مەملەكەتتىك قىزمەتكەردىڭ جۇمىسىندا ەڭ باستى كورسەتكىش – حالىققا دۇرىس قىزمەت كورسەتۋ. ەكىنشى – ۋاقىتىندا ءارى قىسقا مەرزىمدە قىزمەت كورسەتۋگە ۇمتىلۋىمىز قاجەت. بۇل رەتتە اۋدان باسشىلارى جۇمىسىن كۇشەيتۋى ءتيىس. سىزدەردىڭ جۇمىستارىڭىزدىڭ ينديكاتورىنا بۇل دا كىرەدى. سونداي-اق, ەلەكتروندى تۇردە قىزمەت كورسەتۋ ساپاسىن جاقسارتىپ, شالعاي اۋىلدارداعى قىزمەت تۇرلەرىن «قازپوچتا» بولىمشەلەرى ارقىلى جولعا قويۋدى تاپسىرامىن», - دەدى جانسەيىت قانسەيىت ۇلى.
«دامۋ» باعدارالاماسىن ىسكە اسىرۋ ءىس-شارا جوسپارىنا سايكەس ەلەكتروندى تۇردە كورسەتىلەتىن مەملەكەتتىك قىزمەتتەردىڭ كورسەتكىشى ءالى دە بولسا تومەن. اتاپ ايتقاندا, بايدىبەك, قازىعۇرت, سوزاق, سايرام, شاردارا اۋداندارىنىڭ كورسەتكىشتەرى كوڭىل كونشىتپەيدى. وسى ولقىلىقتاردى تۇزەتۋ جونىندە اتالعان اۋدان باسشىلارىنا وبلىس اكىمى تاراپىنان ناقتى تاپسىرمالار جۇكتەلدى.
