مادەنيەت جانە سپورت ءمينيسترى اتىنان حالىقارالىق باسقوسۋدىڭ سالەم ءسوزىن جەتكىزگەن اتالعان ۆەدومستۆونىڭ مادەنيەت جانە ونەر ىستەرى دەپارتامەنتىنىڭ ديرەكتورى الماس نۇرازحان مىرزا, ۇيىمداستىرىلىپ وتىرعان شارانىڭ رۋحاني-تاريحي قۇندىلىعى زور ەكەنىنە نازار اۋدارىپ, اسىرەسە سوڭعى جىلدارى وڭىرلەرگە ءجۇرگىزىلگەن قازبا جۇمىستارى كەزىندە تابىلعان جۇزدەگەن ارتەفاكتىلەردىڭ جاڭعىرۋدان وتكەن ساپالىلارى ۇلتتىق مۋزەي قورىنا تاپسىرىلۋى دۇرىس شەشىم دەگەنگە توقتالدى.
وسى ورايدا تانىمال ارحەولوگ زەينوللا ساماشەۆتىڭ سوزىنە جۇگىنسەك, استانالىق مۋزەي قورىنا تاپسىرىلۋى ءتيىس جادىگەرلەردىڭ دەنى وڭتۇستىك وڭىردە جۇرگىزىلگەن قازبا جۇمىستارى كەزىندە تابىلعان دۇنيەلەر دەيدى. اتاپ ايتقاندا, ۇستىمىزدەگى جىلى اكادەميك كارل بايپاقوۆتىڭ جەتەكشىلىگىمەن وڭتۇستىك قازاقستان وبلىسى جەرىندەگى قاراتوبە, مىرتوبە قالاشىقتارىندا جانە وتىرارتوبە قورعانىندا, سونىمەن قاتار جامبىل وبلىسى جەرىندەگى قۇلان قالاشىعىنا جۇرگىزىلگەن قازبا جۇمىستارى كەزىندە تابىلعان قىش قۇمىرالار, تاستان, سۇيەكتەن جاسالعان ەڭبەك قۇرالدارى, عۇرىپتىق راسىمدەر كەزىندە پايدالاناتىن دۇنيەلەر ەكەن. بۇلار ۋاقىت ءبولىسى تۇرعىسىنان ورتاعاسىرلىق بۇيىمدار.
سول سياقتى وسى جىلى قازاق عىلىمي-زەرتتەۋ مادەنيەت ينستيتۋتىنىڭ قىزمەتكەرى تاتيانا لوشكوۆانىڭ جەتەكشىلىگىمەن جۇرگىزىلگەن ۇستىرتتەگى ەجەلگى قولا ءداۋىر مۇراسى توقسانباي قونىسىنان جانە ارحەولوگ الەكساندر گورياچەۆ جەتەكشىلىك ەتكەن تۇرگەن شاتقالىنداعى قىزىلبۇلاق قونىسىنان تابىلعان قۇندى دۇنيەلەرگە دە ينتەراكتيۆتى گرافيكالىق ينتەرفەيس جاسالىپ, جوعارىداعى جادىگەرلەرمەن قاتار ەلوردالىق مۋزەي قورىنا تاپسىرىلدى.
تۇستەن كەيىن كونفەرەنتسياعا قاتىسۋشىلار پلەنارلىق وتىرىستارعا جىكتەلىپ, ول جەردە وتكەن زاماندارداعى قورعان سالۋ مادەنيەتى مەن جەرلەۋ راسىمدەرى, ءدىني-عۇرىپتىق نىسانداردىڭ ەرەكشەلىكتەرى تالقىلاۋعا سالىندى. سونىمەن قاتار قازاقستان, رەسەي, وزبەكستان, ازەربايجان ارحەولوگتەرى قازبا جۇمىستارى كەزىندە ءوز ەلدەرىنىڭ تەرريتورياسىنان تابىلعان, بىراق بارىنە ورتاق جادىگەرلەردىڭ سالىستىرمالى ساراپتامالىق ناتيجەلەرىن قاراپ, ورتاق توقتام جاسادى.
بەكەن قايرات ۇلى,
«ەگەمەن قازاقستان»
