قازاقستاندىق مادەنيەت ۆەدومستۆوسى باسشىسىمەن كەزدەسۋگە الەمدىك كينووندىرۋشىلەردىڭ تانىمال پروديۋسەرلەرى – م.حيۋ (The Walt Disney Company), ل.ۋلمان (NBC Universal), گ.لي (CBS), ۆ.مەندوزا (Paramount Pictures Corporation), م.ۆالبرەحت (Warner Bros.), د.روي (HBO) جينالدى. قازاقستان تاراپىنان, سونداي-اق قازاقستاننىڭ اقش-تاعى ەلشىسى ەرجان قازىحانوۆ جانە كينەماتوگرافيالىق ونەر مەن عىلىم اكادەمياسىنىڭ پرەزيدەنتى ايمان مۇساحودجاەۆا قاتىستى.
قازاقستاندىق سىنشىلاردىڭ پىكىرىنشە, تانىمال گولليۆۋد كومپانياسى باسشىلىعىمەن كەزدەسۋدىڭ ءوزى ساتتىلىك. الەمنىڭ ءىرى كينوكومپانيالارىمەن ىنتىماقتاستىق قازاقستاندىق كينووندىرىسكە الەمدىك دەڭگەيگە شىعىپ, ەلىمىزگە ينۆەستيتسيالار مەن شەتەلدىك تۋريستەردىڭ جاڭا اعىنىن قامتاماسىز ەتپەك.
«بۇگىنگى تاڭدا كينو تەك ونەر ءتۇرى عانا ەمەس, سونىمەن قاتار ەكونوميكا سالاسىنىڭ انىقتاۋىشى. ماسەلەن, «اۆاتار» ءفيلمى جارىققا شىققاندا, تۇسىرىلىمدەر جۇرگەن جاڭا زەلاندياعا الەمنىڭ تۇكپىر-تۇكپىرىنەن تۋريستەر كەلە باستادى. كەيبىر مەملەكەتتەر كينوقىزمەت كورسەتۋدى تابىس كوزىنە اينالدىرعان. ولار ۆەنگريا, بولگاريا, كانادا سىندى مەملەكەتتەر», دەدى مينيستر ارىستانبەك مۇحامەدي ۇلى.
مينيستر كانادادا ءتۇسىرىلىپ, باستى رولدە لەوناردو دي كاپريو ويناعان ء«تىرى قالعان» ءفيلمىن مىسالعا كەلتىردى. ونىڭ ويىنشا, الەمدىك دەڭگەيدەگى كينوكومپانيالار وكىلدەرىن قازاقستاندىق تاراپتىڭ ۇسىنىستارى قىزىقتىرىپ وتىر. وسى ورايدا ناقتى قادامدار جاسالىندى.
ء«بىز امەريكالىق كورەرمەندەرگە «اناعا اپارار جول» ءفيلمىن ۇسىندىق. ونى بۇل جەردە ۇلكەن قىزىعۋشىلىقپەن قابىلدادى. قازاقستان كينوونەرى حالىقارالىق كينوفەستيۆالداردا لايىقتى تانىستىرىلىپ, جوعارعى ماراپاتقا يە بولعاندىعىن قالايمىز», دەپ ءسوزىن قورىتىندىلادى مينيستر مۇحامەدي ۇلى.
ەستەرىڭىزگە سالا كەتەيىك, مادەنيەت جانە سپورت مينيسترلىگى الەمنىڭ جەتەكشى كينوكومپانيالارىمەن كينووندىرىس سالاسىندا ىنتىماقتاستىق تۋرالى كەلىسسوزدەر وتكىزگەن بولاتىن. لوس-اندجەلەسكە ءىسساپار جانە «رۋحاني جاڭعىرۋ» باعدارلاماسىن تانىستىرۋ اياسىندا مينيسترلىك قازاقستاننىڭ اقش-تاعى ەلشىلىگىمەن بىرلەسە «Spirit of Great Steppe» شاراسىن وتكىزدى. بىرنەشە قازاقستاندىق ءفيلمنىڭ كورسەتىلىمى, سونداي-اق حالىق ءارتىسى ايمان مۇساحودجاەۆا, ديماش قۇدايبەرگەن جانە تاعى باسقا ونەر جۇلدىزدارىنىڭ قاتىسۋىمەن كونتسەرت بەرىلدى.
«ەگەمەن-اقپارات»
