قاعاز جۇزىندەگى قۇجاتتاردى قىسقارتىپ, سىبايلاس جەمقورلىقتى ازايتۋ ماقساتىندا قولعا الىنعان تسيفرلاندىرۋ باعىتىنداعى جۇمىستار قازىردەن باستاپ قولدانىسقا ەنگىزىلە باستايدى. بۇل تۋرالى كەشە ۇكىمەت ۇيىندە وتكەن ءباسپاسوز ءماسليحاتىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا مالىمدەدى.
ەڭبەك جانە الەۋمەتتىك سالاداعى باستى جاڭالىق – بىرىڭعاي ەلەكتروندى ەڭبەك بيرجاسىنىڭ ىسكە قوسىلۋى. بۇل جۇيە رەسپۋبليكاداعى بارلىق 199 جۇمىسپەن قامتۋ ورتالىعىن بىرىكتىرگەلى وتىر. سونىڭ ناتيجەسىندە 10-عا جۋىق ينتەرنەت-الاڭ اشىلىپ, جەكەمەنشىك جۇمىسپەن قامتۋ اگەنتتىكتەرىنىڭ سانى ەكى ەسەگە وسپەك. س.جاقىپوۆانىڭ ايتۋىنشا, بىرىڭعاي ەلەكتروندى ەڭبەك بيرجاسى ارقىلى ءبىر جارىم ايدىڭ ىشىندە 15 مىڭ ادام ماماندىقتارى مەن تاجىريبەسىنە ساي جۇمىس تاپقان. قازىرگى كۇنى ەلەكتروندى بيرجادا 8 مىڭنان استام تۇيىندەمە مەن 30 مىڭعا جۋىق بوس جۇمىس ورنى تۋرالى اقپارات ورنالاستىرىلعان.
– اۋەلى استانا, الماتى, پاۆلودار جانە شىمكەنت قالالارىندا قاناتقاقتى جوبا رەتىندە ىسكە قوسىلاتىن بىرىڭعاي ەلەكتروندى ەڭبەك بيرجاسىندا جۇمىسكەر مەن جۇمىس بەرۋشى اراسىنداعى ەڭبەك كەلىسىمشارتى ەلەكتروندى تۇردە جاسالاتىن بولادى. ول ءۇشىن ەلەكتروندى قولتاڭبا قولدانىلىپ, اتالعان ەڭبەك شارتى جۇيە ارحيۆىندە ساقتالىپ قالادى. ارينە, بۇل قازىرگى قاعاز جۇزىندەگى ەڭبەك كىتاپشاسىن قولدانىستان الىپ تاستاۋ دەگەن ءسوز ەمەس, – دەيدى ۆيتسە-مينيستر. «جاڭادان قۇرىلعان ەڭبەك بيرجاسىندا جاسالعان كەلىسىمشارتتار عانا ەلەكتروندى نۇسقادا بولادى. 2025 جىلعا دەيىن ەلەكتروندى ەڭبەك بيرجاسىنىڭ قىزمەتتەرىن تۇرلەندىرە تۇسەتىن بولامىز. بىراق قازىرگى قولدانىستاعى ەڭبەك كىتاپشالارى سول كۇيىندە قالادى. ەرتەڭ زەينەتكە شىققاندا دا ازاماتتىڭ ەڭبەك ءوتىلىن راستايتىن نەگىزگى قۇجات وسى قاعاز جۇزىندەگى ەڭبەك كىتاپشاسى بولادى», دەدى ول.
س.جاقىپوۆا, سونداي-اق تسيفرلاندىرۋ اياسىندا مۇگەدەكتىكتى دالەلدەۋ جانە ونى انىقتاۋ جۇمىستارى دا وڭتايلانا تۇسكەنىن جەتكىزدى. بۇدان كەيىن 2018 جىلدىڭ 1 قاڭتارىنان باستاپ قولدانىسقا ەنگىزىلەتىن اتاۋلى الەۋمەتتىك كومەكتىڭ جاڭا فورماتىنا توقتالعان ۆيتسە-مينيستر بۇل كومەكتىڭ ەكى تۇرىمەن جۇمىسپەن قامتۋ ورتالىقتارىنىڭ ماماندارى اينالىساتىنىن اتاپ ءوتتى. مۇنداعى كەڭەسشىلەر مەن ولارعا تاعايىندالعان اسسيستەنتتەر جوبا قاتىسۋشىلارىنىڭ الەۋمەتتىك كەلىسىمشارت بويىنشا مىندەتتەمەلەرىن ورىنداۋ باعىتىن قاداعالاپ, ولارعا قولداۋ كورسەتەدى.
ەكىنشىسى, جۇمىسپەن قامتۋ ورتالىعى ء«بىر تەرەزە» قاعيداتىمەن جۇمىس ىستەيدى, ياعني از قامتىلعان وتباسىلار جەرگىلىكتى بيلىك ورگاندارىنا, باسقا دا مەكەمەلەرگە بارىپ جۇرمەيدى, بىردەن جۇمىسپەن قامتۋ ورتالىعىنا بارادى دا ءبىر قۇجاتتار پاكەتىن ۇسىنۋ ارقىلى ماسەلەسىن شەشە الادى.
جالپى, ەڭبەك جانە حالىقتى الەۋمەتتىك قورعاۋ مينيسترلىگىندە قۇرىلعان بىرىڭعاي اقپارات جۇيەدە قازىردىڭ وزىندە 14,5 ملن ادامنىڭ دەرەكقور بازاسى ەنگىزىلىپ, ءارتۇرلى باعىتتار بويىنشا ونداعان جۇيەنى قامتيدى.
قىمبات توقتامۇرات,
«ەگەمەن قازاقستان»
