ءيا, ءسات, دەپ باستادى ءىستى, نۇروتاندىقتار, ءيا, ءسات... «الماتى-2020» باعدارلاماسى اياسىندا جانە شاھاردىڭ 1001 جىلدىعىنا وراي «نۇر وتان» پارتياسىنىڭ الماتى قالالىق فيليالى, باستاۋىش پارتيا ۇيىمدارى جانە قالا تۇرعىندارىنىڭ قولداۋىمەن «ارۋ الماتىعا – 1001 جاسىل كوشەت» اتتى اكتسياسى جوعارعى كوڭىل-كۇيمەن اتالىپ ءوتتى. سول كۇنى قالا اۋماعىندا 1001 كوشەت وتىرعىزىلىپ, اۋلالار مەن كوشەلەردى تازالاۋ جۇمىستارى يگىلىكتى دارەجەدە جۇرگىزىلدى. بۇل اكتسيا باستاۋىش پارتيا ۇيىمدارىنىڭ قاتىسۋلارىمەن بارلىق اۋدانداردا نۇروتاندىقتاردىڭ ءبىر-بىرىنە ىزگىلىكپەن اعاش سىيلاۋ ەستافەتاسىن جولداۋ بارىسىنا ۇلاستى.
الماتىنى كوركەيتۋ ماسەلەسى بارلىق تۇرعىنداردى ويلاندىراتىن تولعاقتى جايتتىڭ ءبىرى بولىپ وتىر. وتكەن جىلدىڭ وزىندە 10 مىڭ اعاش كەسىلدى. وسىنىڭ ورنىن تولتىرۋ ءۇشىن دە ايماقتى كوگالداندىرۋدى قاتتى قولعا الۋىمىز كەرەك. سوندىقتان دا جاسىل ەكپە اعاشتاردى باپتاپ كۇتۋ ماسەلەسى وزەكتى جايت رەتىندە ەرىكسىز الدىمىزعا قويىلىپ وتىرعانىن مويىنداۋىمىز قاجەت. اكتسيا اياسىندا وتكىزىلگەن ءىس-شاراعا پارتيانىڭ قالالىق جانە اۋداندىق فيليالدارىنىڭ ساياسي كەڭەس مۇشەلەرى, قىزمەتكەرلەرى, الماتى قالالىق ءماسليحات دەپۋتاتتارى, قوعام قايراتكەرلەرى, «جاس وتان» جاستار قاناتىنىڭ وكىلدەرى قاتىستى.
اكتسيانىڭ اشىلۋىندا «نۇر وتان» پارتياسى الماتى قالالىق فيليالى توراعاسىنىڭ ءبىرىنشى ورىنباسارى جۇلدىز وماربەكوۆا, الاتاۋ اۋدانىنىڭ اكىمى, پارتيانىڭ اۋداندىق فيليالىنىڭ توراعاسى شاحمەردەن رىسباەۆ ءسوز سويلەپ, اعاش وتىرعىزۋعا قاتىستى. سەنبىلىك «العاباس-6» شاعىن اۋدانىندا «نۇر وتان» پارتياسى الاتاۋ اۋداندىق فيليالىنىڭ الدىندا سالتاناتپەن باستاۋ الدى. كەلەر كوكتەمدە اماندىق بولسا 1001 ءتۇپ جاسىل جەلەك ءبۇر جارا باستايدى. ءسويتىپ الاتاۋدىڭ ەتەگى الداعى كەزدە جاسىل بەلدەۋ رەتىندە ءوز رەڭىن اسپەتتەي بەرەتىنىنە سەنەسىڭ.
ساپارباي پارمانقۇل,
«ەگەمەن قازاقستان»
الماتى
