«بۇل مۇز ايدىنى ەكسپو اۋماعىنا ارنايى جوبالانعان. كومپانيا جوبانى مەملەكەتتىڭ قاتىسۋىنسىز ءوز قاراجاتى ەسەبىنەن جۇزەگە اسىردى. مۇز ايدىنى كورمە كەزەڭىندە تۋريستەر اراسىندا تانىمال بولعان ەكى «جالىندى» سۋبۇرقاقتارىنىڭ اراسىندا ورنالاسقان. مۇز ايدىنىنىڭ ءپىشىنى نۇر الەم پاۆيلونىنا باعىتتالعان جەبەگە ۇقساس. ونىڭ قاق ورتاسىندا جارىق بوياۋلارىنىڭ كومەگىمەن ەكسپو لوگوتيپى بەينەلەنگەن. سونداي-اق, مۇزايدىنىندا كەشكى ۋاقىتتا جارقىرايتىن جارىق جولدار توسەلگەن», - دەدى «MegaIce» كومپانياسىنىڭ ديرەكتورى ەرلان ۇمبەتوۆ.
ارنايى توڭازىتقىش جابدىعىنىڭ كومەگىمەن مۇز ايدى +10 گرادۋس جانە ودان تومەن تەمپەراتۋرادا دا جۇمىس ىستەي الادى. بۇل كونكيمەن سىرعاناۋ ماۋسىمىن كەلەسى جىلدىڭ ءساۋىر ايىنا دەيىن ۇزارتۋعا مۇمكىندىك بەرەدى. مۇز ايدىنىنىڭ ساپاسى جوعارى بولۋى ءۇشىن مۇز قۇياتىن ماشينالار قولدانىلادى.
«MegaIce» كومپانياسىنىڭ ەنشىسىندە ءارتۇرلى ولشەمدەگى 1000 جۇپ جاڭا كونكي بار. ولار بارلىق كەلۋشىلەرگە جالعا بەرىلەدى. مۇز ايدىنىندا كونكيمەن سىرعاناۋدى جاڭا باستاعان كەلۋشىلەرگە جاتتىعۋ قۇرىلعىلارى ۇسىنىلادى. مۇز ۇستىندە ءتارتىپ پەن قاۋىپسىزدىككە جاۋاپتى ماماندار, نۇسقاۋشىلار بولادى. كەلۋشىلەر ءۇشىن جەكە زاتتاردى ساقتاۋ ورىندارى, كيىنۋ بولمەلەرى, سونداي-اق ىستىق تاماق بەرۋ ورىندارى قاراستىرىلعان.
«جاڭا مۇز ايدىنى قالا تۇرعىندارى مەن قوناقتارىنىڭ سۇيىكتى دەمالىس ورنىنا اينالادى. بۇل دەمالىس ۋاقىتىن تازا اۋادا وتكىزۋگە مۇمكىندىك بەرەدى», دەدى ەرلان ۇمبەتوۆ.
مۇز ايدىنىنا كىرۋ بيلەتىنىڭ قۇنى - 1000 تەڭگە. وقۋشىلار مەن زەينەتكەرلەر ءۇشىن 50% جەڭىلدىك قاراستىرىلعان. 6 جاسقا دەيىنگى بالالار ءۇشىن كىرۋ تەگىن. بيلەتتەردى EXPO-2017 رەسمي سايتىنان, بيلەت وپەراتورىنىڭ سايتىنان جانە ەكسپو اۋماعىندا ورنالاسقان كاسسالاردان ساتىپ الۋعا بولادى. مۇز ايدىنىنىڭ اشىلۋىنا وراي, دەمالىس كۇندەرى استانا قالاسىنىڭ قوناقتارى مەن تۇرعىندارىنا ارنالعان 50% جەڭىلدىك قاراستىرىلعان.
مۇز ايدىنى جۇمىس كۇندەرى ساعات 12.00-دەن 23.00-گە دەيىن (تەحنيكالىق ءۇزىلىس: 16: 00-دەن 18: 00-گە دەيىن), دەمالىس جانە مەرەكە كۇندەرى ساعات 10.00-دەن 23.00-گە دەيىن (تەحنيكالىق ءۇزىلىس 13.00-دەن 14.00-گە دەيىن, ساعات 17.00-دەن 18.00-گە دەيىن) اشىق.
