فيلم يدەياسىن تانىستىرۋعا بايلانىستى وتكەن قورعالىمدا رەجيسسەر اقان ساتاەۆ كينوستۋديانىڭ ساراپشىلار كەڭەسىنە دايىندىق كەزەڭىندە اتقارىلعان جۇمىستار تۋرالى بايانداپ, ءتۇسىرىلىم توبىن تانىستىرعان سوڭ جاڭا تۋىندىسىن تۇسىرۋگە دايىن ەكەنىن جەتكىزدى.
«بەيبىتشىلىك كىندىگىندە» ءفيلمى اقمولانىڭ قاراپايىم قالادان ەل ورداسى – استاناعا اينالۋى مەن بۇگىنگى قالىپتاسقان كەلبەتىنە دەيىنگى كەزەڭدەر تۋرالى باياندايدى. كارتينا 1994 جىلى استانانىڭ اقمولاعا اۋىسىپ, استانانىڭ قىسقا مەرزىم ىشىندە كۇن ساناپ دامىپ كەلە جاتقانىن جانە الەمدەگى ەڭ ادەمى استانالاردىڭ قاتارىنا ەنگەنىن كورسەتەدى.
– ءبىزدىڭ ءفيلمىمىز ساياسات پەن ساياساتكەرلەر تۋرالى. سول سەبەپتەن دە ءبىز پرەزيدەنت حاتتاماسىنان, پرەزيدەنت كەڭسەسىنەن كوپ كەڭەس الدىق. جاڭا قالاعا تۋ تىككەن استانانىڭ العاشقى كەزدە باسىنان وتكەرگەن قيىندىقتارى جانە پرەزيدەنت پەن اينالاسىنداعىلاردىڭ ونى قالاي ەڭسەرگەندەرى تۋرالى تالاي مالىمەت پەن دەرەككە قول جەتكىزدىك. فيلمدەگى نەگىزگى دراماتۋرگيالىق شيەلەنىس تە وسى تۇرعىدا وربىمەك, – دەدى رەجيسسەر.
بولاشاق ءفيلمنىڭ جوباسىن تانىستىرۋ كەزىندە ءتۇسىرىلىم توبى فيلمدە قولدانىلاتىن بارلىق بۇيىمدار مەن كوستيۋمدەردى اكەلىپ, كورمە ۇيىمداستىردى. ساراپشىلار كەڭەسى الدىندا ءفيلمنىڭ اتقارۋشى پروديۋسەرى ءاليا مەڭدىعوجينا مەن كاستينگ-ديرەكتور جاينا ابديەۆا دا ءسوز الىپ, ءتۇسىرىلىم الاڭدارى جانە اكتەرلەر تۋرالى اڭگىمەلەدى. تۇسىرىلىمدەر الماتى مەن استانادا وتەدى. ءبىرىنشى ءتۇسىرىلىم بلوگى جەلتوقسان ايىندا الماتىدا باستالادى. ال قاڭتار ايىندا استانادا جالعاسادى. قازىر اكتەرلەردىڭ پلاستيكاسى جانە سويلەۋ مانەرىمەن ماماندار جۇمىس ىستەپ جاتىر, ويتكەنى ولاردىڭ سومدايتىن كەيىپكەرلەرى ومىردە بار ادامدار. اكتەرلەر مۇراعاتتىق ماتەريالدارمەن جەتە تانىستىرىلعان, سەبەبى مۇنىڭ اكتەردىڭ ءوز وبرازىنا ەنۋىنە اسەرى مول.
ەكراندا ن.نازارباەۆتىڭ بەينەسىن بەلگىلى تەاتر جانە كينو اكتەرى مۇرات احمانوۆ سومدايدى. سونىمەن قاتار فيلمدە ەركەبۇلان دايىروۆ, جان بايجانباەۆ سياقتى كينو مايتالماندارى دا بوي كورسەتەدى.
– باستى رولگە اكتەر ىزدەگەندە ءبىز ءۇشىن پورترەتتىك ۇقساستىعىنان گورى, ونىڭ اكتەرلىك شەبەرلىگى ماڭىزدىراق بولدى. فيلمدە 14 ءتۇرلى كۇردەلى گريم جاسالادى, ونى مارك كۋلەر جاسايدى. كاسىبي جاسالعان گريم كومەگىمەن اكتەردىڭ ەلباسىمەن پورترەتتىك ۇقساستىعىن كەلتىرەمىز. ال ەكىنشى پلانداعى اكتەرلەردى نەگىزىنەن ءتۇر-الپەتى پروتوتيپكە ۇقسايتىندارىن تاڭدادىق, – دەيدى ا.ساتاەۆ.
ءفيلمنىڭ قويۋشى-وپەراتورى قازاق جانە قىرعىز كينوسىنىڭ مەترى – حاسانبەك قىدىراليەۆ («كوشپەندىلەر», «موڭعول», «اناعا اپارار جول», «باۋىرجان مومىش ۇلى» جانە باسقالار). سۋرەتشى-ۆيزاجيست جانە پروتەز ماكياجى بويىنشا ارنايى شاقىرىلعان بريتاندىق مارك كۋلەر «گراند بۋداپەشت وتەلى» فيلمىنە جاساعان ۇزدىك ماكياجى ءۇشىن «وسكار» جۇلدەسىن جانە «تەمىر لەدي» فيلمىنە جاساعان ۇزدىك ماكياج بەن شاش ۇلگىسى ءۇشىن 87-بريتان كينو اكادەمياسىنىڭ BAFTA سىيلىعىن يەمدەنگەن.
«ەلباسى جولى. بەيبىتشىلىك كىندىگىندە» ءفيلمىنىڭ شىعارماشىلىق توبى ءتۇسىرىلىم جۇمىسىن جەلتوقسان ايىندا باستاپ كەتپەك. ال فيلم قالىڭ كورەرمەنگە ءبىر جىلدان كەيىن, 2018 جىلدىڭ جەلتوقسان ايىندا جول تارتادى دەپ جوسپارلانىپ وتىر. ءفيلمدى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى مەن «ساتايفيلم» كينوكومپانياسى بىرىگىپ تۇسىرەدى.
ايگۇل احانبايقىزى,
«ەگەمەن قازاقستان»
الماتى
