كارتينادا ءتۇز تاعىسىنىڭ تابيعي بولمىسى مەن قولعا ۇستاۋعا كونبەيتىنى كەڭىنەن باياندالادى. الايدا ءوزىنىڭ ويلاعان ماقساتىنا جەتۋ ءۇشىن تاۋەكەلگە بەل بايلاپ, باسىن قاتەرگە تىككەندەر دە بار. ماسەلەن الماتى وبلىسىنىڭ تۇرعىنى ايدىن دىنعاليەۆ ءوز ۇيىندە قاسقىر اسىراپ وتىر.
كوپشىلىككە كەڭىنەن تانىمال «كوكسەرەك» ءفيلمىن كورمەگەندەر كەمدە-كەم. كارتينادا ءتۇز تاعىسىنىڭ تابيعي بولمىسى مەن قولعا ۇستاۋعا كونبەيتىنى كەڭىنەن باياندالادى. الايدا ءوزىنىڭ ويلاعان ماقساتىنا جەتۋ ءۇشىن تاۋەكەلگە بەل بايلاپ, باسىن قاتەرگە تىككەندەر دە بار. ماسەلەن الماتى وبلىسىنىڭ تۇرعىنى ايدىن دىنعاليەۆ ءوز ۇيىندە قاسقىر اسىراپ وتىر.
ادامنىڭ بىتىسپەس جاۋى سانالعان تابيعاتتىڭ تاعىسى كوزىن اشقان بولتىرىك كەزىنەن باستاپ ايدىننىڭ قولىندا. بەرىك تەمىردەن جاسالعان ارنايى توردا باعىپ, ءجىتى باقىلاۋدا ۇستاپ وتىر. «ماقساتىم قاسقىر مەن ءيتتى شاعىلىستىرىپ سەلەكتسيا ارقىلى جۇرەگى تۇكتى توبەت تۇقىمىن الۋ», دەيدى ول. بۇل ويىنا بەل شەشە كىرىسكەن ايدىن جاسى التىعا كەلگەن ءتۇز تاعىسىن قولىنداعى ءسىبىر لايكاسىمەن شاعىلىستىرىپ تا ۇلگەرىپتى. دۇنيەگە كەلگەنىنە ەكى ايدان ەندى اسقان ءتورت دۇرەگەيدىڭ ەكەۋى كادىمگى يتكە ۇقساسا, ەكەۋى ءتۇز تاعىسىنان اۋمايدى. ءتۇر-تۇرپاتى مەن مىنەزى دە تۋرا قاسقىردىڭ ءوزى. ولار ءوسىپ-جەتىلگەننەن سوڭ تاعى دا اسىل تۇقىمدى يتپەن شاعىلىستىرىپ جاقسى تۇقىم الىپ اڭعا سالسام دەگەن نيەتتە. «ونى باعۋ اسا قيىندىق تۋدىرمايدى. اپتاسىنا ءبىر-ەكى رەت ەتپەن قورەكتەندىرەمىن. قولعا ابدەن ۇيرەنگەن. ءيتتى دە, ادامدى دا قاسىنا جاقىنداتا بەرەدى», دەيدى ول.
اڭشىلىققا اۋەس جىگىتتىڭ قولىندا اسىل تۇقىمدى بىرنەشە قۇماي تازىسى دا بار. عالامتورداعى بىرقاتار دەرەكتەرگە سۇيەنسەك, امەريكالىقتار بۇگىنگى تاڭدا قاسقىر مەن ءيتتىڭ جارتى ميلليونعا جۋىق گيبريدىن اسىراپ وتىرعان كورىنەدى. ايدىن دىنعاليەۆ سىندى مۇنداي ىسپەن اۋەستەنگەن ازاماتتار ءبىزدىڭ ەلىمىزدە دە بىرەن-ساران كەزدەسىپ ءجۇر.
– قاسقىردى قانشا باقساڭ دا ورمانعا قاراپ ۇليدى. ادامنىڭ قاسقىر باعۋى ءوز ومىرىنە قاۋىپ ءتوندىرۋ. كىشكەنە كۇشىك كەزىندە يت پەن قاسقىر بىردەي بولعانىمەن, وسە كەلە بولتىرىكتىڭ بويىنان قاسقىرعا ءتان مىنەز-ق ۇلىق بايقالا باستايدى, – دەيدى كينولوگ ماماندار.
قالاي ايتقاندا دا, كۇندەردىڭ كۇنى تابيعي بولمىسىنا بوي الدىرىپ, قاسقىر قاسقىرلىعىن جاساماسا بولعانى.
ارمان وكتيابر,
«ەگەمەن قازاقستان»
الماتى
سۋرەتتى تۇسىرگەن اۆتور
