مەرزىمى 7 جىلعا دەيىن بەرىلەتىن نەسيەنىڭ جىلدىق مولشەرلەمەسى 6 پايىزدى قۇرايدى. بۇل قارجى ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنىڭ ەكىنشى باعىتى اياسىندا ۇسىنىلىپ وتىر.
باعدارلاما جۇمىسسىزدارعا, ءوزىن-ءوزى قامتىعان ازاماتتارعا, اۋىل شارۋاشىلىعى كووپەراتيۆتەرى مەن ولاردىڭ مۇشەلەرىنە, سونداي-اق, باستاۋىش جانە جۇمىس ىستەپ تۇرعان كاسىپكەرلەرگە ارنالعان. مەملەكەتتىك باعدارلامانى جۇزەگە اسىرۋ ءۇشىن 2,6 ملرد تەڭگە بولىنگەن. بۇل تۋرالى تۇركىستان جانە كەنتاۋ قالالارىندا وتكەن كوشپەلى سەميناردا وڭتۇستىك قازاقستان وبلىسى اكىمىنىڭ ورىنباسارى باۋىرجان جامالوۆ مالىمدەدى. ونىڭ ايتۋىنشا, باعدارلامانىڭ ماقساتى – شاعىن بيزنەستى دامىتۋ ءۇشىن حالىققا قارجى كوزىن ۇسىنۋ.
- ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنا وڭىرىمىزدەگى 3 قالا – شىمكەنت, تۇركىستان جانە كەنتاۋ تۇرعىندارى قاتىسا الادى. باعدارلامانىڭ ەكىنشى باعىتىن جۇزەگە اسىرۋ ءۇشىن 2,6 ملرد تەڭگە بولىنگەن. بۇگىنگى تاڭدا وسى باعدارلاما بويىنشا 6 قارجى ينستيتۋتى جۇمىس جاساۋدا – قازاقستاننىڭ حالىق بانكى, نۇربانك, اتف بانكى, ەۆرازيالىق بانك, Forte Bank جانە «ىرىس» مقۇ, - دەدى وبلىس اكىمىنىڭ ورىنباسارى باۋىرجان جامالوۆ.
بۇل تۇستا ەگەر كەپىلدىككە قويىلاتىن م ۇلىك جەتكىلىكسىز بولسا, وندا باستاۋىش كاسىپكەرلەرگە كەپىلدەندىرىلگەن كەپىلدى قولدانۋعا مۇمكىندىك بار.
- ءار نەسيە راسىمدەۋ ءۇشىن كەپىلدىك كەرەك. ەگەر كەپىلدىك جەتىسپەسە, وندا «دامۋ» كاسىپكەرلىكتى دامىتۋ قورى ارقىلى كەپىلدەندىرىلگەن كەپىلدى قولدانۋعا بولادى. بۇل باعدارلامانىڭ باسقالارىنان ەرەكشەلىگى – جەڭىلدەتىلگەن نەسيە بەرۋدە. بۇعان قوسا نەسيە بۇرىن از مولشەردە بەرىلسە, قازىر 18 ميلليون تەڭگەگە دەيىن قاراستىرىلعان. جانە بۇعان دەيىن كەپىل مۇلكىنە قاتىستى قيىندىقتار تۋىنداسا, قازىر كەپىلدەندىرۋ قاراستىرىلىپ وتىر, - دەپ اتاپ ءوتتى وقو كاسىپكەرلىك, يندۋستريالدى-يننوۆاتسيالىق دامۋ جانە تۋريزم باسقارماسى باسشىسىنىڭ ورىنباسارى باعلان جۇماشبەكوۆ.
ايتا كەتەيىك, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى قازاقستاندا جىل باسىنان بەرى جۇزەگە اسىرىلۋدا. بانكتەرگە قارجى - قىركۇيەك ايىندا, ال ميكرو قارجى ۇيىمىنا وتكەن اپتادا ءبولىندى. قازىر ەڭ باستىسى – شاعىن بيزنەستى دامىتۋعا بولىنگەن مەملەكەتتىك قارجىعا قول جەتكىزۋدى وڭايلاتۋ.
