«قازاقستاندىق «اق سايتتار تىزىمىنە» بالالاردىڭ تولىققاندى پسيحولوگيالىق, فيزيكالىق, ونەگەلى دامۋىنا ارنالعان, تاربيەلىك ماڭىزدىلىعى, تاقىرىبى مەن قۇرامى بويىنشا قۇراستىرىلعان 3556 سايت ەندى. ينتەرنەت جەلىلەرى مازمۇنى بويىنشا ءبىلىم جانە عىلىم, مادەنيەت جانە ونەر, ويىن-ساۋىق, مۋزىكا, كينو, تەلەۆيزيا, تابيعات, ادام, قوعام, سپورت جانە تۋريزم بولىپ بولىنگەن. جاسوسپىرىمدەر مەن بالالاردى قورعاۋ ماقساتىندا قاۋىپسىز ينتەرنەتتىڭ «اق ءتىزىمىن» URL سۇزگىدەن وتكەن سايتتاردى قوسۋ – وڭتايلى نۇسقا», دەپ مالىمدەدى اقپارات جانە كوممۋنيكاتسيالار ۆيتسە-ءمينيسترى الان اجىباەۆ.
«بولاشاق» اسسوتسياتسياسى كەڭەسى باسشىسىنىڭ مىندەتىن اتقارۋشى, پارلامەنت ءماجىلىسىنىڭ دەپۋتاتى باحتيار ماكەن ينتەرنەت جەلىلەرىنە كونتەنتتىك سۇزگىنى مودەراتور جۇزەگە اسىراتىنىن مالىمدەدى.
«دەمەك بالالاردى عالامتوردا قورعاۋ تىكەلەي بىلىممەن بايلانىستى, سول سەبەپتى مودەراتور رەتىندە ءبىلىم جانە عىلىم مينيسترلىگى ءوز سەپتىگىن تيگىزە الادى. «اق ءتىزىم» بالالاردىڭ قىزىعۋشىلىعىن تانىمدىلىق پەن دامىتۋشىلىق اقپاراتقا وزگەرتۋگە ءمان بەرەدى. وتباسى, بالاباقشا, مەكتەپ, جوعارى وقۋ ورنى, سونىمەن قاتار مەملەكەت پەن ۇكىمەتتىك ەمەس ۇيىمداردىڭ جاساپ جاتقان ءارتۇرلى دەڭگەيدەگى شارالارى بولاشاقتا جالپىقازاقستاندىق قوعامنىڭ اقپاراتتىق مادەنيەت پەن تسيفرلى بىلىكتىلىگىن ارتتىرۋعا قولعابىس ەتەدى. وكىنىشكە قاراي, كامەلەتكە تولماعانداردا اقپاراتتى سۇزگىدەن وتكىزۋ قابىلەتىنىڭ جەتىسپەۋشىلىگى سەزىلەدى.
بۇل جاعداي بالالاردىڭ ونلاين-قاتەرلەرگە ۇشىراۋ دارەجەسىن ايتارلىقتاي ارتتىرادى جانە بىرقاتار جاعىمسىز سالدارلارعا الىپ كەلۋى مۇمكىن. ايتا كەتۋ كەرەك, قازاقستانداعى تىكەلەي الەۋمەتتىك جەلىدە كامەلەتكە تولماعانداردىڭ ۇلەسى ينتەرنەت جەلىسىنىڭ جالپى بەلسەندىلىگىنىڭ 77 پايىزىن قۇرايدى. الەۋمەتتىك جەلىدەگى كوشباسشى – «ۆكونتاكتە» (65 پايىز), «ودنوكلاسسنيكي» – 25 پايىز, Facebook-تە – 6 پايىز. وسىلاردى ەسكەرە وتىرىپ «اق سايتتار ءتىزىمى» جوباسى قولعا الىندى. ونىڭ نەگىزگى ماقساتى – قازاقستاندىق بالالار مەن جاسوسپىرىمدەرگە ينتەرنەتكە قاۋىپسىز قول جەتكىزۋ», دەدى ول.
راۋان قايدار,
«ەگەمەن قازاقستان»
