مەديا-مەكتەپ كەلەشەكتە ستۋدەنتتەردىڭ تەوريا مەن پراكتيكانى ۇشتاستىرا وتىرىپ, ۋنيۆەرسيتەت قابىرعاسىندا ءجۇرىپ-اق رەداكتسيالار مەن باسپاحانانىڭ قايناعان تىرشىلىگىمەن ەمىن-ەركىن ارالاسۋىن, كاسىبي جۋرناليستەردەن ءتالىم الىپ, تاجىريبە جيناقتاۋىن ماقسات تۇتادى. وندا اتىراۋ مەملەكەتتىك ۋنيۆەرسيتەتىنىڭ پروفەسسورلىق-وقىتۋشىلىق قۇرامىنان بولەك, ەلىمىزگە جانە وڭىرىمىزگە تانىمال جۋرناليستەر, مەديا ماماندارى مەن كاسىبي ترەنەرلەر ءوز تاجىريبەلەرىمەن ءبولىسىپ, ءدارىس وقيدى. سونداي-اق مەديا-مەكتەپ قابىرعاسىندا تەك ۋنيۆەرسيتەت ستۋدەنتتەرى عانا ەمەس, اقپارات سالاسىنداعى جاس ماماندار, وقۋشىلار, جاس تىلشىلەر جانە ت.ب. ىنتا بىلدىرگەن تالاپكەرلەر ءبىلىم الۋعا مۇمكىندىك الادى. مەديا-مەكتەپ زاماناۋي ءدارىس اۋديتوريالارىنا لايىقتالىپ, مۋلتيمەديالىق قۇرىلعىلارمەن جابدىقتالعانىن ايتا كەتكەن ءجون.
تاعى ءبىر جاعىمدى جاڭالىق, «اتىراۋ-اقپارات» مەديا-مەكتەبىندە وبلىستىق ىشكى ساياسات باسقارماسىنىڭ قولداۋىمەن جۋرناليستەرگە ارنالعان اقىسىز اعىلشىن ءتىلى كۋرستارى جۇمىس ىستەي باستادى.
«اتىراۋ-اقپارات» جشس ديرەكتورى بايازي ابدەشەۆ مۇنداي جوبانىڭ وڭىردەگى اقپارات سالاسى ءۇشىن ماڭىزى زور ەكەنىن ايتادى. «ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى وزىندىك ورنى بار, تالاي مامانداردى دايارلاعان ىرگەلى ءبىلىم ورداسى. سوڭعى 20 جىلدا فيلولوگيا فاكۋلتەتىنىڭ جانىنان جۋرناليستيكا كافەدراسى اشىلعان بولاتىن. ۋنيۆەرسيتەت پەن «اتىراۋ-اقپارات» سەرىكتەستىگىنىڭ بىرلەسكەن جوباسى وسىناۋ مەديا-مەكتەپ ارقىلى بولاشاق جۋرناليستەردىڭ تەوريالىق ءبىلىمىن تاجىريبەلىك بىلىكتىلىكپەن ۇشتاستىرۋدى كوزدەيدى. جۋرناليستيكا سالاسىنداعى بىلىكتى مامانداردى دايارلاۋدا بۇل ءبىر ماڭىزدى قادام دەۋگە بولادى», – دەيدى سەرىكتەستىك ديرەكتورى.
ال ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى ابزال تالتەنوۆ, بىرلەسكەن جوبانىڭ ءمانى مەن ەرەكشەلىگىنە توقتالدى. «بۇگىندە ۋنيۆەرسيتەتتە جۋرناليستيكا ماماندىعىندا 150 ستۋدەنت وقىپ جاتىر. الداعى ۋاقىتتا مەديا-مەكتەپكە تاجىريبەلى جۋرناليستەر كەلىپ, ءدارىس وقىسا, ستۋدەنتتەر ءوز ءبىلىمىن جەتىلدىرە تۇسەرى ءسوزسىز», – دەپ تۇيىندەدى ابزال تالتەنوۆ.
باقىتگۇل باباش,
«ەگەمەن قازاقستان»
