بۇل تۋرالى قالالىق ءماسليحات دەپۋتاتتارىنىڭ سەسسياسىندا بەلگىلى بولدى. تۇرعىن ءۇي كوممۋنالدىق شارۋاشىلىق ءبولىمىنىڭ سەكتور مەڭگەرۋشىسى مارات اسىلبەكوۆتىڭ ايتۋىنشا, ەلىمىزدە ورتا ەسەپپەن جول اقىسى 79 تەڭگەنى قۇرايدى.
«ەلىمىزدەگى 15 قالانىڭ بەسەۋىندە جولاۋشىلارعا جەڭىلدىكتەر قاراستىرىلعان. سولاردىڭ ىشىندە ەڭ كوپ 15 توپتىڭ وكىلدەرىنە جەڭىلدىكتەر جاساعان پاۆلودار عانا. بۇگىنگى تاڭدا جانارماي مەن كولىك سايماندارىنىڭ قىمباتتاۋى تاسىمالداۋشىلارعا ىڭعايسىزدىق تۋدىرىپ, شىعىن كەلتىرىپ وتىر. وسىعان بايلانىستى ءبىز جولاقىسىن 70 تەڭگەدەن 80 تەڭگەگە كوتەرۋ جونىندە ۇسىنىس بىلدىردىك. داۋىسقا سالعان 20 دەپۋتات جولاقىسىن كوتەرۋگە بىرجاقتى كەلىسىم بەردى. الايدا تاسىمالداۋشىلارعا كەلەسىدەي تالاپتار قويىلدى: 15 توپ وكىلدەرىنە 50 پايىزدىق جەڭىلدىكتەردى ساقتاۋ, جولاۋشىلاردىڭ ىڭعايلىلىعى ءۇشىن قوعامدىق كولىكتەردىڭ ءجۇرۋ ينتەرۆالىن رەتكە كەلتىرۋ جانە جولاۋشىلاردىڭ قاۋىپسىزدىگىن قامتاماسىز ەتۋ», - دەيدى مارات اسىلبەكوۆ.
