كاسىپورىن جىلىنا 12 مىڭ شارشى مەتر گازوبەتون بلوگىن شىعاراتىن بولادى. كاسىپورىننىڭ جۇمىسىمەن تانىسقان وڭتۇستىك قازاقستان وبلىسىنىڭ اكىمى ج.تۇيمەباەۆ اۋداننىڭ جانە كورشى اۋدانداردىڭ قاجەتتىلىگى ءۇشىن گازوبەتون بلوگىن شىعاراتىن زاۋىتتىڭ ىسكە قوسىلۋى ءوندىرىس سالاسىندا جاقسى وقيعا ەكەنىن اتاپ ءوتتى.
جوبا قۇنى 120 ملن. تەڭگە. قازىعۇرت اۋدانىنداعى يندۋستريالدى ايماقتا بۇگىنگى تاڭدا جالپى قۇنى 2 ملرد. تەڭگەنى قۇرايتىن 7 جوبا جۇزەگە اسىرىلۋدا. سونداي-اق, ءوڭىر باسشىسى قازىعۇرت - شىمكەنت قالاسىمەن ىرگەلەس جاتقان كورشى اۋدان ەكەنىن جانە جىبەك جولى مەن «باتىس ەۋروپا - باتىس قىتاي» ۇلكەن جولدىڭ بويىندا ورنالاسقان اۋدان بولعاندىقتان مۇندا ءوندىرىستى وركەندەتۋ قاجەتتىگىن ايتىپ, جاڭا باستامالاردى قولداۋعا ارقاشان دايىن ەكەنىن جەتكىزدى.
جاڭا اشىلعان ءوندىرىس ورنىندا جىلىنا 12 مىڭ شارشى مەتر, ياعني 336 مىڭ دانا گازوبەتون بلوگى شىعارىلادى. قۇرىلىستا ءتيىمدى بولىپ كەلەتىن بۇل ءونىمنىڭ ەنى 30 سم, بيىكتىگى 40, ال ۇزىندىعى 60 سم. اتالعان كاسىپورىننىڭ ونىمدەرى وڭىردە سالىناتىن كوپقاباتتى تۇرعىن ۇيلەردە قولدانىلاتىن بولادى.
عالىمجان ەلشىباي,
«ەگەمەن قازاقستان»
