كەڭەس وتىرىسىندا قارالعان ماسەلەلەر مەن قابىلدانعان شەشىمدەر ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا كورسەتىلگەن باسىمدىقتارعا نەگىزدەلدى.
«كوز ىلەسپەس شاپشاڭدىقپەن دامۋ ۇستىندەگى جاھاندانۋ داۋىرىندە ۇلتتىق جادىمىز بەن ەل تۇتاستىعىن, رۋحاني قازىنالارىمىزدى ساقتاپ قالۋ - اسا ماڭىزدى. سوندىقتان, زيالى قاۋىم وكىلدەرىنە, ونىڭ ىشىندە ءبىزدىڭ كەڭەسىمىزگە دە ۇلكەن جۇك ارتىلىپ وتىرعانى ءسوزسىز. تاۋەلسىزدىگىمىزدىڭ الدىڭعى شيرەك عاسىرىن, تاريحىمىزدىڭ العاشقى ءبولىمى دەپ الساق, ەندى ەل تاريحىنىڭ نەگىزگى ءبولىمى باستالدى دەۋگە بولادى. ۇلت كوشباسشىسى مەملەكەتىمىزدىڭ قارىشتاپ جان-جاقتى دامۋى ءۇشىن قوعامدى مودەرنيزاتسيالاۋدى جىكتەپ بەردى. وسى رەتتە قىزىلوردا وبلىسى ەلىمىزدەگى رۋحاني ماسەلەلەردە نيۋسمەيكەر بولۋى ءتيىس دەگەن ويىمدى ايتقىم كەلەدى. ويتكەنى, قايماعى بۇزىلماعان سىر ەلى - الاشتىڭ اناسى! سونىمەن قاتار, ايماقتىڭ قاسيەتتى ورىندارىنىڭ كارتاسى مەن جيناعىن شىعارۋدى جوسپارلاپ وتىرمىز», - دەپ اتاپ ءوتتى ايماق باسشىسى قىرىمبەك كوشەرباەۆ.
بيىل سىعاناق, جانكەنت, شىرىك-راباتپەن بىرگە ورتاعاسىرلىق سورتوبە, جەنت قالاشىقتارىنا جانە ارالدىڭ كەپكەن تابانىنداعى كەردەرى كەسەنەسىنە دە ارحەولوگيالىق زەرتتەۋ جۇرگىزىلدى. سونىمەن بىرگە, كەلەر جىلى ءالى سىرى اشىلماعان ورتاعاسىرلىق «قىشقالاعا» ارحەولوگيالىق قازبا جۇمىستارىن جۇرگىزۋ جوسپارلانۋدا.
سونداي-اق, سىعاناق قالاشىعىن ينفراقۇرىلىمى جەتىلگەن تولىققاندى تۋريستىك ورتالىققا اينالدىرۋ ءۇشىن كەشەندى رەستاۆراتسيالىق, رەكونسترۋكتسيالىق جانە ارحەولوگيالىق زەرتتەۋ جۇمىستارىن جۇرگىزۋ ءۇشىن مادەنيەت جانە سپورت مينيسترلىگى تاراپىنان 2018-2020 جىلدارى كەزەڭ-كەزەڭىمەن بارلىعى 138,2 ملن. تەڭگە قارجى قاراستىرىلعان. كەڭەس مۇشەلەرى سىرداريا وزەنىنىڭ بويىندا ورنالاسقان ح-ءحىح ع. تيەسىلى قازاق تاريحىندا ماڭىزدى ورىن الاتىن ايرىقشا ساۋلەتتىك 20-دان استام ەسكەرتكىش-مۇنارانىڭ تاريحى مەن قىزمەتى جايىندا كەلەر ۇرپاقتىڭ ساناسىنا ءسىڭىرۋ ماقساتىندا تولىققاندى زەرتتەۋلەر جۇرگىزۋدى كوزدەپ وتىر.
رۋحانيات جانە مادەنيەت سالاسىنا قاتىستى قارالعان وزەكتى ماسەلەلەر ەلباسى ماقالاسىن جۇزەگە اسىرۋدا اسا ماڭىزدى ەكەنى بەلگىلى. سوندىقتان ايماق باسشىسى كوتەرىلگەن پروبلەمالىق سۇراقتار مەن بەرىلگەن ۇسىنىستاردى جۇزەگە اسىرۋ ءۇشىن جاۋاپتى تۇلعالارعا بىرقاتار تاپسىرمالار جۇكتەدى.
