اقمولا وبلىسىنداعى گرانيتنىي كەنتىندە ورنالاسقان 166/25 قاماق مەكەمەسىندە بولعانىمىزدا مۇگەدەكتەردىڭ جاعدايى سىن كوتەرمەيتىندىگىنە كوزىمىز جەتتى. العاشقى ۇستالۋ ساتىنەن باستاپ قىلمىستىق جازاسىن وتەيتىن ورىنعا جەتكىزىلگەنگە دەيىن ولاردىڭ قۇقى بۇزىلادى ەكەن. نەگىزگى ماسەلە ولاردىڭ مەديتسينالىق كومەكتى الا الماۋىنا بايلانىستى بولىپ وتىر. مامان دارىگەرلەردىڭ بولماۋى سەبەبىنەن جانە قاجەتتى ءدارى-دارمەكتىڭ جەتىسپەۋىنەن ولاردىڭ جاعدايى ناشارلاي تۇسەدى.
سوندىقتان ءبىز پرەمەر-ءمينيستردىڭ ورىنباسارى ەربولات دوساەۆقا دەپۋتاتتىق ساۋال جولداپ, تومەندەگى شارالاردى اتقارۋدى ۇسىندىق:
1.باس ەركىنەن ايىرۋ مەكەمەلەرىندە نورماتيۆتىك جانە رەگلامەنتتىك قۇجاتتارمەن مۇگەدەكتەردىڭ ارنايى مارتەبەسى انىقتالۋى كەرەك;
2.وسى ورىنداردا مۇگەدەكتەردىڭ ەركىن قوزعالۋى مەن ءجۇرىس-تۇرىسىنا مۇمكىندىك بەرەتىن پاندۋستار, سانيتارلىق-گيگيەنالىق ورىندار قامتاماسىز ەتىلسىن;
3.مەديتسينالىق جانە الەۋمەتتىك-پسيحولوگيالىق كومەكتەر جاساۋ مۇمكىندىگى قاراستىرىلسىن;
4. قوعامدىق ۇيىمدارمەن بىرلەسە وتىرىپ مەكەمەلەردىڭ قىزمەتكەرلەرىن مۇگەدەكتەرمەن جۇمىس ىستەۋ ادىسىنە ۇيرەتۋ كەرەك;
5. سوتتالعان مۇگەدەكتەردى تاسىمالداۋ ءۇشىن ارناۋلى كولىك قۇرالىن پايدالانۋ قاجەت. مۇگەدەكتەر دە ءبىزدىڭ قوعامىمىزدىڭ مۇشەلەرى, ولار ەرتەڭ ورتامىزعا ورالعاندا وزدەرىنىڭ ادامي قۇقىقتارى تاپتالعاندىعى سەبەپتى كەكتەنىپ, اشۋ-ىزامەن ورالماۋى كەرەك. ال ولاردىڭ اراسىندا قاساقانا جاسالماعان, بولماشى قىلمىسپەن جازاعا تارتىلعاندار كوپ. سوندىقتان ولاردىڭ بولاشاعىن ويلاۋ قوعام مۇشەلەرىنىڭ مىندەتى.
جانات وماربەكوۆا,
ءماجىلىس دەپۋتاتى
