پلەنارلىق ءماجىلىستى «Management System Consulting Corporation» كومپانياسىنىڭ باسقارۋشى ديرەكتورى وزات بايسەركەەۆ جۇرگىزدى. جيىندا ءسوز سويلەگەن قىزىلوردا وبلىسىنىڭ اكىمى قىرىمبەك كوشەرباەۆ ايماقتىڭ ينۆەستيتسيالىق مۇمكىندىكتەرىنە توقتالدى.
قامباسى دانگەتولعان قىزىلوردا
جالپى, ءوڭىر ەكونوميكاسىنىڭ ىلگەرىلەۋىنە يندۋستريالىق-يننوۆاتسيالىق دامۋ باعدارلاماسى تىڭ سەرپىن بەردى. باعدارلاما اياسىندا ايماقتا 20 جوبا جۇزەگە اسسا, ونىڭ ىشىندە وبلىس ەلدى مەكەندەرىن گازداندىرۋ جۇمىسى دا بار. جۋىردا «قاراوزەك» گاز-كومپرەسسورلىق ستانساسى ىسكە قوسىلدى.
ول ەلىمىزدىڭ سولتۇستىك ايماقتارى مەن استاناداعى گاز قۇرىلىسى جۇمىستارىن باستاۋعا مۇمكىندىك بەرەدى. كەلەر جىلى وبلىستا ءۇش توتىقتى موليبدەن شىعاراتىن كاسىپورىن ىسكە قوسىلادى. ءونىم ەكسپورتىنىڭ نەگىزگى كولەمى جاپونيانىڭ ۇلەسىندە بولادى. الداعى جىلدىڭ شىلدە ايىندا شىنى زاۋىتىنىڭ العاشقى ءونىمىن شىعارۋ كوزدەلگەن. سونداي-اق كەلەر جىلى قۇرىلىس سالاسىندا عانا ەمەس, مۇناي-گاز جانە ۋران وندىرۋدە كەڭىنەن قولدانىلاتىن تامپوناجدى تسەمەنت شىعاراتىن زاۋىتتى دا ىسكە قوسۋ جوسپارلانعان. وبلىس باسشىسى بريتاندىق ينۆەستورلارمەن بىرلەسىپ «بالاساۋىسقاندىق» ۆانادي كەن ورنىندا قارا تاقتا تاستى اۆتوكلاۆتا وڭدەيتىن جوبا جۇزەگە اسىرىلىپ جاتقانىن ايتىپ ءوتتى.
– قازىر 110 توننا امموني مەتاۆاناداتىن تايۆانعا ەكسپورتتاپ ۇلگەردىك. بۇدان بولەك قىزىلوردادا فەرروقورىتپا زاۋىتىن سالۋ جوباسىن ىسكە اسىرۋ باعىتىندا جۇمىس ىستەلۋدە. ال گاز پورشەندى ەلەكتر ستانساسىنىڭ ىسكە قوسىلۋى ەلەكترمەن قامتاماسىز ەتۋدى جاقسارتىپ, ايماقتا ونەركاسىپتىڭ دامۋىنا مۇمكىندىك بەرەدى.
«شالقيا» قورعاسىن-مىرىش كەن ورنىندا كەن بايىتۋ كومبيناتى مەن گاز-تۋربينالى ەلەكتر ستانساسىنىڭ قۇرىلىسىن باستادىق. 2019 جىلدان باستاپ كەن بايىتۋ كومبيناتى 2 ميلليون توننا, ال 2020 جىلعا قاراي 4 ميلليون توننا كەن وڭدەيتىن بولادى. كومبيناتتىڭ ىسكە قوسىلۋى 1500 جاڭا جۇمىس ورنىنىڭ اشىلۋىنا مۇمكىندىك بەرەدى. سونداي-اق وسىندا گيدرومەتاللۋرگيالىق زاۋىت قۇرىلىسى جوباسىن دايىنداۋ ءىسى باستالدى, – دەدى وبلىس اكىمى.
وسى جانە باسقا دا يندۋستريالىق باعىتتاعى جۇمىستاردى اتاپ وتكەن قىرىمبەك ەلەۋ ۇلى شاعىن جانە ورتا بيزنەستى دامىتۋعا, ءتۋريزمدى وركەندەتۋگە كەڭىنەن كوڭىل ءبولىنىپ وتىرعانىن جەتكىزدى.
– قىزىلوردا وبلىسى قازاقستان كۇرىشىنىڭ 90 پايىزىن وندىرەدى. وبلىستاعى ءۇش اۋداندا ەگىلەتىن كۇرىش رەسپۋبليكا حالقىن تولىقتاي قامتاماسىز ەتۋگە جەتەدى.
سوڭعى بىرنەشە جىلدا وبلىس ديقاندارى رەكوردتى كورسەتكىشتەرگە قول جەتكىزىپ, ءار گەكتاردان 56 تسەنتنەردەن ءونىم الدى. اگرارلىق سالانى دامىتۋ جۇمىستارىنىڭ ارقاسىندا اۋىلشارۋاشىلىق ونىمدەرى باسقا ەلدىڭ نارىقتارىنا شىعارىلىپ جاتىر, – دەپ اتاپ ءوتتى وبلىس اكىمى. سونداي-اق يران يسلام رەسپۋبليكاسىنىڭ مازانداران جانە گ ۇلىستان پروۆينتسيالارىندا جۇمىس ساپارىمەن بولىپ, ىنتىماقتاسا جۇمىس جاساۋ جونىندە 8 مەموراندۋمعا قول قويىلعانىن ءمالىم ەتتى.
سوڭعى ءبىر جىلدىڭ وزىندە ايماقتا اۋىلشارۋاشىلىق ونىمدەرىنىڭ ەكسپورتى – 48, ال كۇرىش ەكسپورتى 53 پايىزعا ارتتى. اگروونەركاسىپ سەكتورىندا وسىمدىك شارۋاشىلىعىن ءارتاراپتاندىرۋ باعدارلاماسى ناتيجەلى جۇزەگە اسىرىلۋدا. سوڭعى 3 جىلدىڭ ىشىندە مالازىقتىق داقىلدار, مايلى داقىلدار جانە ازىقتىق ءدان القابى 6 مىڭنان استام گەكتارعا ارتقان. وندىرىستىك نەگىزدە كارتوپ, كوكونىس جانە باقشالىق داقىلدار ءوندىرىسىن دامىتۋ جۇمىستارى باستالدى. وعان قوسا وسى كەزەڭ ىشىندە كۇرىشتىڭ جالپى ءونىمى 20 پايىزدان استامعا ءوستى.
بيىل ايماقتا 500 مىڭ توننادان استام كۇرىش جينالدى. سۋ رەسۋرسىن ءتيىمدى پايدالانۋ بويىنشا وزبەكستانمەن ناتيجەلى جۇمىستار اتقارىلدى. وبلىس اكىمى, اسىرەسە اۋىل شارۋاشىلىعى سالاسىندا كورشى وزبەك اعايىندارمەن بىرگە اتقاراتىن جۇمىستار بار ەكەنىنە توقتالدى. بۇل ەلدىڭ اۋىلشارۋاشىلىق تەحنيكالارىنا دا قىزىعۋشىلىق ارتقان. ءوز كەزەگىندە وبلىس اكىمى تسيفرلى تەحنولوگيالار مەن ەكسپو-2017 كورمەسىنەن سوڭ اتقارىلىپ جاتقان جۇمىستاردى سارالاپ ءوتتى.
– شىلدە ايىنان باستاپ «Microsoft» كومپانياسىمەن جۇمىس جاساي باستادىق. وبلىستا ونلاين-وقىتۋ ارقىلى زاماناۋي ينجەنەرلىك-كومپيۋتەرلىك تەحنولوگيامەن جۇمىس ىستەيتىن جوعارى كاسىبي مامانداردى بىرلەسە دايىنداۋ جۇمىستارى باستالدى. سونىمەن قاتار بىرلەسكەن عىلىمي-زەرتتەۋ جانە تاجىريبەلىك-ەكسپەريمەنتتىك جۇمىستار جۇرگىزۋ ماقساتىندا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ بازاسىندا «Microsoft» اكادەمياسىنىڭ ءوفيسىن قۇرۋ تۋرالى كەلىسىمگە قول جەتكىزىلدى.
ەكسپو اۋماعىن قولدانا وتىرىپ, ماسكەۋ بولات جانە قورىتپالار ينستيتۋتىمەن بىرگە قىزىلوردادا ماشينا قۇراستىرۋ, 3D پرينتەرىنىڭ كومەگىمەن تۇيىندەر مەن دەتالدار وندىرۋگە باعىتتالعان ماسكەۋلىك عىلىمي-زەرتتەۋ ينجينيرينگ ورتالىعىنىڭ بالاماسىن قۇرۋ جونىندە كەلىسسوزدەر جۇرگىزىلىپ جاتىر. بۇگىندە رەسەيدىڭ جەتەكشى تەحنيكالىق جوعارى وقۋ ورىندارىمەن تىعىز ىنتىماقتاستىق پەن ءتيىمدى سەرىكتەستىكتىڭ ارقاسىندا ايماق مەكتەپتەرىنىڭ 452 تۇلەگى ماسكەۋ مەن سانكت-پەتەربۋرگتىڭ الدىڭعى قاتارلى جوعارى وقۋ ورىندارىندا ءبىلىم الىپ جاتىر.
ەندى ماسكەۋ مەملەكەتتىك ۋنيۆەرسيتەتىنىڭ گرانتىمەن 20 بالامىز وقيتىن بولدى, – دەدى وبلىس اكىمى. ءسوز سوڭىندا ق.كوشەرباەۆ قىزىلوردا وبلىسىندا ينۆەستورلار ءۇشىن قولايلى جاعداي جاسالعانىن, ولارمەن ىنتىماقتاسا جۇمىس ىستەۋگە ىنتالى ەكەنىن اتاپ ءوتتى.
ىنتىماقتاستىق ىرىستى ارتتىرادى
سودان كەيىن مىنبەرگە سىرتقى ىستەر ءمينيسترىنىڭ ورىنباسارى عالىمجان قويشىباەۆ كوتەرىلدى. ۆيتسە-مينيستر وسىنداي ءىس-شاراعا قاتىسۋ ۇلكەن مارتەبە ەكەنىن ايتىپ, بۇل فورۋم وتاندىق كاسىپكەرلەرگە جاقسى مۇمكىندىك بەرەدى دەدى.
ەلباسىمىزدىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا كوتەرىلگەن ماسەلەلەرگە وراي بىرقاتار شارالار اتقارىلۋدا.
ۇكىمەت شەتەلدىك ينۆەستورلارعا قولايلى جاعداي تۋعىزۋ ماقساتىنداعى جۇمىستاردى جالعاستىرىپ كەلەدى. ينۆەستيتسيالاردى تارتۋ بويىنشا ۇلتتىق جوسپار قابىلدانىپ, جەڭىلدەتىلگەن سالىق رەجىمى جۇمىس ىستەۋدە. ۇلتتىق زاڭنامالار مەن حالىقارالىق-قۇقىقتىق بازا ءاردايىم جەتىلدىرىلۋدە, ينۆەستيتسيالىق جەڭىلدىكتەر پاكەتى ۇلعايۋدا.
جالپى, ينۆەستيتسيالىق فورۋمنىڭ بەرەرى كوپ. بايقوڭىرداعى تىرشىلىكتىڭ جاڭعىرىپ, جاندانا تۇسۋىنە وسى شارالاردىڭ دا سەپتىگى تيەرى انىق. بۇل تۋرالى قورعانىس جانە اەروعارىش ونەركاسىبى مينيسترلىگى اەروعارىش كوميتەتىنىڭ توراعاسى ەركىن شايماعانبەتوۆ اتاپ ءوتتى.
قازاقستان ءۇشىن عارىش سالاسىنىڭ الار ورنى ەرەكشە. ەلىمىزدە دۇنيە جۇزىندەگى ەڭ ءىرى «بايقوڭىر» عارىش ايلاعى ورنالاسقان. ەلباسىنىڭ عارىش قىزمەتىن ىسكە اسىرۋعا قولداۋ كورسەتىپ, وعان ەرەكشە نازار اۋدارىپ وتىرعانى بارشامىزعا ءمالىم. تاۋەلسىز ەلىمىزدىڭ شيرەكعاسىرلىق تاريحىنداعى جەتىستىكتەرىمىز سول ناقتى تاپسىرمالاردىڭ ناتيجەلەرى ەكەنىن اتاپ وتكەن ءجون.
ودان ءارى ءسوز العان بايقوڭىر قالاسى اكىمشىلىگى باسشىلىعىنىڭ ورىنباسارى ەۆگەني چۋلكوۆ قالانىڭ بۇگىنگى تىنىس-تىرشىلىگىنە توقتالدى. جالپى, بۇگىنگى بايقوڭىردى الەمدىك عىلىم مەن تەحنيكانىڭ ەڭ وزىق جەتىستىكتەرىنىڭ توعىسى, ادامزات اقىلىنىڭ شوعىرلانعان جەرى دەسەك, قاتەلەسپەيمىز. قازىرگى كۇنى قازاق ەلى رەسەيمەن تىزە قوسىپ, عارىشتى يگەرۋ جولىندا اۋقىمدى جوبالاردى قولعا الىپ وتىر.
قازىر «بايقوڭىردى» عارىشقا باعىتتالعان مونوقالا ەسەبىندە عانا ەمەس, ونەركاسىپ پەن جوعارى تەحنولوگيا ورتالىعى رەتىندە دامىتۋ قولعا الىندى. ايلاقتان «بايتەرەك» جاڭا عارىش زىمىران كەشەنىن سالۋ كوزدەلىپ وتىر. بۇل باستاماعا قازاقستانمەن بىرگە رەسەي تاراپى دا مۇددەلى. ەكى مەملەكەت دامۋدىڭ جاڭا جوباسىن جاساپ, ءتيىستى شارالاردى باستاپ تا كەتكەن. ونىڭ ىسكە قوسىلۋ ۋاقىتى 2025 جىلدان 2022 جىلعا اۋىستىرىلدى.
يراننىڭ گ ۇلىستان پروۆينتسياسى ەكونوميكانى ۇيلەستىرۋ جونىندەگى دەپارتامەنتىنىڭ ديرەكتورى يۋسەف باسانجيدە ەكى ەل اراسىنداعى ىنتىماقتاستىقتى نىعايتۋ جونىندەگى جۇمىستارعا توقتالدى. يرانمەن اراداعى بايلانىس جىل ساناپ جاقسارىپ كەلەدى. جۋىردا وبلىس دەلەگاتسياسى يراننىڭ مازانداران, گ ۇلىستان پروۆينتسيالارىنا جۇمىس ساپارمەن بارىپ قايتقانىن ايتتى.
سول ساپار بارىسىندا يران كاسىپكەرلەرىمەن جەرگىلىكتى كۇرىش سورتتارىن ايماقتا ءوندىرۋدى قارجىلاندىرۋ جانە وندىرگەن ءونىمدى تۇگەل يرانعا ەكسپورتتاۋ جونىندە كەلىسىمگە كەلدى. بيىل كۇرىشتىڭ العاشقى 60 تونناسى يرانعا ەكسپورتقا جىبەرىلەتىن بولسا, الداعى جىلدارى يراندىق كۇرىش سورتتارىن 5 مىڭ گەكتارعا جەتكىزۋ كوزدەلۋدە.
جيىن بارىسىندا «ارالسودا» «قازاقستان-قىتاي بىرلەسكەن كاسىپورنى» اق باسقارما توراعاسى دينگ چاو ران جانە تۇركيالىق «Yıldızlar SSS» حولدينگى ەنەرگەتيكالىق توبىنىڭ باسشىسى ەرتەم سۋات, كورەيا رەسپۋبليكاسىنىڭ قازاقستانداعى باس كونسۋلى مين دجون سىن, ەلىمىزدەگى پولشا رەسپۋبليكاسى ەلشىسىنىڭ كەڭەسشىسى سكشيدلو اندجەي ءسوز سويلەپ, ىنتىماقتاستىق اياسىندا اتقارىلىپ جاتقان جۇمىستاردى اتاپ ءوتتى.
پلەنارلىق ءماجىلىس سوڭىندا وبلىس اكىمدىگىمەن جانە ايماق كاسىپكەرلەرىمەن تۇركيا, قىتاي, يران, پولشا, رەسەي, وزبەكستان ەلدەرىنىڭ كومپانيالارىمەن بىرقاتار مەموراندۋمعا قول قويىلدى.
بۇعان دەيىنگى فورۋمدار ءوڭىردىڭ ينۆەستيتسيالىق تارتىمدىلىعىن ارتتىرىپ, حالىقتىڭ ءال-اۋقاتىن كوتەرۋگە باعىتتالعان جوبالاردىڭ جۇزەگە اسۋىنا نەگىز بولعان ەدى. توعىزىنشى فورۋم دا ءوڭىر كومپانيالارىنىڭ شەتەلدىك جانە وتاندىق ينۆەستورلارمەن ءوزارا ءتيىمدى ارىپتەستىك ورناتۋىنا, بيزنەس پەن عىلىم سالالارىنىڭ جانە بيلىك وكىلدەرىنىڭ ينۆەستيتسيالىق جوبالاردى جۇزەگە اسىرۋدا, ايماق ەكونوميكاسىن ءارتاراپتاندىرۋدا, جەتىلدىرۋدە كۇش بىرىكتىرۋىنە مۇمكىندىك تۋعىزدى.
تۋعان جەرگە تۋىڭدى تىك؟
«Baikonyr Invest» ينۆەستيتسيالىق فورۋمى اياسىندا «تۋعان جەرگە تاعزىم» شاراسى ءوتتى. مودەراتور, وبلىس اكىمىنىڭ ورىنباسارى رۋسلان رۇستەموۆ وسى جولعى ينۆەستفورۋمنىڭ ەرەكشەلىگى ايماق باسشىسىنىڭ باستاماسىمەن تۋعان جەر تاقىرىبىنىڭ ەنگىزىلۋى ەكەنىن اتاپ ءوتتى. ەلباسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «تۋعان جەرگە, ونىڭ مادەنيەتى مەن سالت-داستۇرلەرىنە ايرىقشا ىڭكارلىكپەن اتسالىسۋ – شىنايى ءپاتريوتيزمنىڭ ماڭىزدى كورىنىستەرىنىڭ ءبىرى» دەگەن ەدى.
سەكتسيا جۇمىسىن وبلىس اكىمى ق.كوشەرباەۆ اشىپ, قۇتتىقتاۋ ءسوز سويلەدى.
– ىقىلىم زاماننان بەرى ۇلى دالادا «ەلىڭدە كىمىڭ بار؟» دەپ سۇراق قوياتىن ءداستۇر بولعان. تۇلعالى, قابىرعالى ازاماتتار ارقىلى ەلدىڭ كەلبەتى قالىپتاسادى. ەلگە قاجەت بولعاندا جاۋ بەتكە – بىلەكتىسىن, داۋ بەتكە جۇرەكتىسىن قويادى, جاراستىققا جاقسىلارىن جۇمساعان. ءبىزدىڭ سىر ەلىنەن شىققان قابىرعالى ازاماتتار مول, ولار ەلدىڭ ىشىندە جۇرسە دە, سىرتتا جۇرسە دە ءبىزدىڭ ماقتانىشىمىز, – دەدى ايماق باسشىسى ءوز سوزىندە.
ەلباسى تاۋەلسىزدىكتىڭ العاشقى جىلدارىندا «الدىمەن ەكونوميكا, سودان سوڭ ساياسات» دەگەن ۇستانىممەن ەلدىڭ الەۋمەتتىك-ەكونوميكالىق وركەندەۋىنە باسا ءمان بەردى. ساياسات العا شىعىپ كەتكەن مەملەكەتتەردەگى بەيبەرەكەت تىرلىك ءبىزدىڭ كوز الدىمىزدا. قازىر ورتالىق ازيا ەلدەرىندەگى ينۆەستيتسيانىڭ 87 پايىزى قازاقستانعا كەلگەن. بۇل – ەلباسىنىڭ سارابدال ساياساتىنىڭ ناتيجەسى.
ەندى ادام مەن سانانىڭ ساپاسىنا كوڭىل بولەتىن كەزەڭ كەلدى. ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ءپاتريوتيزمنىڭ باستاۋىندا كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىك تۇراتىنىن اتاپ كورسەتكەن.
سىر ەلى – الاشتىڭ اناسى بولعاندىقتان, رۋحاني جاڭعىرۋ ماسەلەسىندە نيۋسمەيكەر بولۋى كەرەك. بۇل ورايدا بارلىق جاڭالىقتار, ۇلتىمىزدىڭ مۇددەسى مەن رۋحاني جەتىلۋىنە, ۇيىسۋىنا, رۋحاني قۇندىلىقتاردى دارىپتەۋگە قاتىستى باستامالار سىر ەلىنەن باستاۋ الۋى ءتيىس.
– سىرتتا وقىعان جاستاردىڭ تۋعان جەرگە, وتانعا دەگەن سۇيىسپەنشىلىگى ەرەكشە بولادى. جاقىندا ماسكەۋدەگى ستۋدەنتتەرمەن كەزدەسكەنىمدە, ولاردىڭ بولمەلەرىنەن قازاقتىڭ كۇيلەرى جازىلعان ديسكىلەردى, تۋىمىزدى كوردىم. ءبىر جاس جىگىت قىزىلوردادا جۇرگەندە دومبىرا ۇيرەنۋگە ءمان بەرمەپتى. قازىر دومبىرا ۇيرەنۋگە دەن قويىپ ءجۇر ەكەن. مىنە, وسىنداي جاستاردى قولداۋ, دەمەۋ كەرەك دەپ ويلايمىن, – دەدى ايماق باسشىسى.
رەسەي جوو-لارىن ءبىتىرۋشى جاستاردىڭ ەڭ تالانتتىلارىن «سكولكوۆو» يننوۆاتسيالىق ورتالىعىنىڭ ماگيستراتۋراسىنا وقىتۋ دا جوسپارلانعان. ويتكەنى ءبىلىمدى جاستاردىڭ ەلگە قايتقانىنان گورى, سونداي ورتالىقتا تاجىريبە جيناقتاعانى, كەيىن سول تاجىريبەسىن ەلدىڭ يگىلىگىنە جاراتقانى پايدالىراق.
سەكتسيا جۇمىسىنا قاتىسقان كومپوزيتور كەڭەس دۇيسەكەەۆ رۋحاني جاڭعىرۋ ءىس جۇزىندە بۇدان ءبىرشاما ۋاقىت بۇرىن باستالىپ كەتكەنىن ايتتى. قىزىلوردادا «تۋعان جەر», «سالەم ساعان, تۋعان ەل» سياقتى اسەم اندەردىڭ اۆتورى اتىنداعى كونكۋرس ءداستۇرلى تۇردە وتكىزىلىپ كەلەدى. كومپوزيتور جاس تالانتتاردى قولداۋ, قازاق ءانىن دۇنيە جۇزىنە تانىتۋ جولىندا ەڭبەك ەتىپ كەلە جاتىر.
باسقوسۋدا «ايقىن» گازەتىنىڭ باس رەداكتورى نۇرتورە ءجۇسىپ ايماقتىڭ سوڭعى جىلدارداعى دامۋ ءۇردىسىن «سىرىم مەنىڭ, سىرلاسىم» اتتى دەرەكتى اڭگىمەلەر جيناعىنا ارقاۋ ەتىپ, قالامگەرلىك, پەرزەنتتىك پارىزىن وتەمەك نيەتى بار ەكەنىن, سونداي-اق عارىش تاقىرىبىندا شىعارما جازۋ كوپتەن بەرى ويىندا ءپىسىپ-جەتىلگەنىن ايتتى.
سونداي-اق ول جاس تىلشىلەردى «ايقىن» گازەتىندە تاعىلىمدامادان وتكىزۋ, سىر ءوڭىرى تۋرالى جاڭا اندەرگە كونكۋرس جاريالاۋ تۋرالى ۇسىنىستارىن جەتكىزدى. وعان قوسا قىزىلوردا وبلىسىنىڭ فوتوشەجىرەسىن جاساعان بايىرعى فوتوتىلشىلەر بولات وماراليەۆ پەن سايدحاسان حۋتاەۆتىڭ سۋرەتتەرىن تسيفرلىق فورماتقا كوشىرۋ, سىر بويىنىڭ جىراۋلىق ءداستۇرىن ناسيحاتتاۋ, تۋعان جەردى كوگالداندىرۋ ءۇشىن «1001 اعاش» اكتسياسىن باستاۋ تۋرالى ويلارىن ايتتى.
سەكتسيا جۇمىسىنا قاتىسقان «نۇر-مۇباراك» ۋنيۆەرسيتەتىنىڭ پرورەكتورى ءشامشادين كەرىم ءدىنتانۋشىلار مەن يمامداردى, تەولوگ مامانداردى دايارلاۋدا اتقارىلىپ جاتقان جۇمىستارعا توقتالدى. سىر وڭىرىندەگى ءدىني احۋالدىڭ تۇراقتىلىعىنا جوعارى باعا بەردى. بىلىكتى تەولوگتەر دايارلاۋداعى ىنتىماقتاستىقتى ارتتىرۋ تۋرالى ۇسىنىس ءبىلدىردى.
جاڭا زاۋىت اشىلدى
ينۆەستيتسيالىق فورۋم اياسىندا جاڭا كۇرىش وڭدەۋ زاۋىتى ىسكە قوسىلدى. ەلدىڭ ىرىسى مەن بەرەكەسىن ارتتىرىپ, قامباسىن دانگە, دالاسىن انگە تولتىرىپ وتىرعان حالىق ءۇشىن بۇل ۇلكەن قۋانىش. وبلىستىڭ ەكونوميكالىق تا, الەۋمەتتىك تە ماسەلەلەرىنە وڭ ىقپال ەتەتىن جاڭا كاسىپورىننىڭ اشىلۋ سالتاناتىنا وبلىس اكىمى ق.كوشەرباەۆ قاتىسىپ, زاۋىت جۇمىسىنا ساتتىلىك تىلەدى.
«اباي داۋلەت» جشس-عا قاراستى كاسىپورىن تولىقتاي جاڭا تەحنولوگيامەن قامتىلعان. زاۋىت ديرەكتورى داۋلەت سارسەنباەۆتىڭ ايتۋىنشا, ءوندىرىس ورنى ساعاتىنا 7 توننا اق مارجاندى وڭدەۋگە قاۋقارلى. سونداي-اق كاسىپورىن قالدىقسىز ءوندىرىستى قولدانادى. سۇرىپتالىپ, قاپتالعان ءونىم ۇلكەن سىيىمدىلىقتاعى قويمادا ساقتالادى. ەڭ باستىسى كوپتەگەن جۇمىس ورنى اشىلىپ, تۇرعىندارعا تابىس كوزى تابىلماق. ىسكەر ازاماتتىڭ وڭ باستاماسىنا العىس بىلدىرگەن ايماق باسشىسى كۇرىش ىرىستى بولسىن دەگەن تىلەگىن جەتكىزدى.
– كەڭەس زامانىندا كراسنودار ايماعى مەن قىزىلوردا وبلىسى بۇكىل وداقتى كۇرىشپەن قامتاماسىز ەتكەن بولاتىن. تاۋەلسىزدىكتىڭ العاشقى جىلدارىندا قيىنشىلىقتار كەزىگىپ, كۇرىش شارۋاشىلىعى تۇرالاعان ەدى. ەلباسىنىڭ قولداۋى ارقاسىندا بۇل سالا قايتا جاندانىپ, سىر مارجانىنىڭ داڭقى قايتا اسقاقتادى.
وعان دالەل رەتىندە جىل سايىن رەكوردتىق كورسەتكىشكە قول جەتكىزىپ كەلە جاتقاندىعىمىزدى ايتساق بولادى. مىنە, قازىر ۇلكەن زاۋىتتى ىسكە قوسقالى تۇرمىز. وسى كاسىپورىننىڭ ارقاسىندا 80-گە جۋىق ادام جۇمىسپەن قامتىلادى. جوسپار بويىنشا 100-گە جەتكىزۋ دە كوزدەلىپ وتىر. سوڭعى تەحنولوگيامەن جاراقتالعان وسىنداي ءوندىرىس ورىندارىنىڭ ارقاسىندا الەۋمەتتىك ماسەلەلەر دە شەشىلەتىن بولادى, – دەدى قىرىمبەك ەلەۋ ۇلى.
جالپى العاندا, ءىح «Baikonyr Invest» فورۋمى ءساتتى اياقتالدى. شارا اياسىندا بىرقاتار مەموراندۋمعا قول قويىلىپ, ينۆەستورلارمەن كەلىسىمدەر جاسالدى.
ەرجان بايتىلەس,
«ەگەمەن قازاقستان»
قىزىلوردا وبلىسى
