قازىر وڭتۇستىك قازاقستان وبلىسىنىڭ 844 ەلدى مەكەنىندە 3 ملن-عا جۋىق حالىق تۇرادى, بۇل دەگەنىمىز, قازاقستان حالقىنىڭ التىدان ءبىر بولىگى دەگەن ءسوز. حالىقتىڭ كوپتىگى سالدارىنان بۇل وبلىستا ءارتۇرلى ماسەلەلەر تۋىنداۋدا, اتاپ وتەر بولساق, باسپانا مەن جۇمىستىڭ جەتىسپەۋشىلىگى, مەكتەپ, بالاباقشا, اۋرۋحانالاردا ادامدار سانىنىڭ بەلگىلەنگەن نورمادان تىس كوپ بولۋى ورىن العان.
ال سولتۇستىك وڭىرلەردە (قوستاناي, پاۆلودار, سولتۇستىك قازاقستان وبلىستارى) كەرىسىنشە, مۇندا قازاقستان حالقىنىڭ تەك 17 پايىزى عانا قونىستانعان, حالىقتىڭ ازدىعى سالدارىنان جۇمىس كۇشى تاپشى, مەكتەپ, بالاباقشالار قاڭىراپ بوس قالۋدا. اتالعان ماسەلەلەردىڭ ماڭىزدىلىعىن ەسكەرىپ ەلباسى العا قويعان مىندەتتەردىڭ ءبىرى – ىشكى كوشى-قون پروتسەستەرىن رەتتەۋ جانە ەڭبەك رەسۋرستارىنىڭ تەڭگەرىمدىلىگىن ارتتىرۋ. حالىقتى كەڭ-بايتاق جەرگە بىركەلكى جايلاستىرۋ ماقساتىندا ۇكىمەت ەلباسىنىڭ تاپسىرماسىمەن ەڭبەك كۇشى مول ايماقتان ەڭبەك كۇشى جەتىسپەيتىن وڭىرلەرگە حالىقتى ءوز ەركىمەن قونىستاندىرۋ جۇمىستارىن جالعاستىرىپ كەلەدى.
اتاپ ايتار بولساق, قازىرگى ۋاقىتتا «ناتيجەلى جۇمىسپەن قامتۋ جانە كاسىپكەرلىكتى جاپپاي دامىتۋدىڭ 2017-2021 جىلدارعا ارنالعان باعدارلاماسى» قولعا الىنىپ, ىسكە اسىرىلىپ جاتىر. وسى باعدارلامانىڭ ءۇشىنشى باعىتى شەڭبەرىندە جۇمىس كۇشى تاپشى وڭىرلەرگە (قوستاناي, پاۆلودار, سولتۇستىك قازاقستان, شىعىس قازاقستان وبلىستارى) جۇمىس كۇشى مول وڭىرلەردەن (وڭتۇستىك قازاقستان, ماڭعىستاۋ, جامبىل, قىزىلوردا, الماتى وبلىستارىنان) ەرىكتى تۇردە قونىس اۋدارۋ جۇرگىزىلىپ, ول وڭ سەرپىن بەرۋدە. باعدارلامانىڭ جوسپارىنا سايكەس, 2017 جىلى وڭتۇستىكتەن سولتۇستىككە 362 وتباسى كوشەدى دەپ مەجەلەنسە, قازىرگى تاڭدا 1479 مۇشەسى بار 389 وتباسى كوشكەن. ال 2018-2020 جىلدار ارالىعىندا وڭتۇستىكتەن سولتۇستىككە 7 828, ياعني جىل سايىن 2600-گە جۋىق وتباسىن كوشىرۋ جوسپارلانعان. بۇل 2018-2020 جىلدار كەزەڭىندە وڭتۇستىكتەن سولتۇستىككە كوشىرۋ 2017 جىلعىمەن سالىستىرعاندا ء ار جىلعا 7 ەسە كوپ وتباسىن قامتيدى دەگەن ءسوز. ءوز كەزەگىندە بۇل باعدارلامانى ودان ءارى جەتىلدىرۋدى كوزدەيدى, ولاي بولماسا باعدارلاماداعى جوسپار ورىندالماي قالۋى مۇمكىن. ءبىز, سەنات دەپۋتاتتارى پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداپ, باعدارلامانى جەتىلدىرۋ بويىنشا تومەندەگى ماسەلەلەردى قاراستىرۋدى ۇسىندىق:
- رەسپۋبليكامىزدىڭ سولتۇستىك وڭىرلەرىنە قونىس اۋدارۋشىلارعا تۇرعىلىقتى جەرىنە جەتىپ الۋ ءۇشىن قارالاتىن قارجىنى الدىن الا تولەۋ تەتىكتەرىن قاراستىرۋ كەرەك, سەبەبى قونىس اۋداراتىن وتباسىلاردىڭ كوپشىلىگى ءۇيى, جۇمىسى جوق ازاماتتار. ولاردىڭ كوشۋگە دەگەن نيەتتەرى بار, ال كوشۋگە قارجىلارى جەتكىلىكسىز;
- قونىس اۋدارۋشىلار بارعاننان كەيىن كەمىندە 1-2 اي كولەمىندە ءتيىستى تابىس الا المايدى, سوندىقتان الدىن الا قارجىلاي كومەك بەرۋ ماسەلەسى قاراستىرىلسىن;
- سولتۇستىكتەگى شەكارالىق سەلولاردا قاڭىراپ بوس قالعان, كوشىپ كەتكەندەردىڭ ۇيلەرىن جەرگىلىكتى اتقارۋشى ورگاندار ءوز بالانستارىنا قويىپ, وڭتۇستىكتەن كەلگەن قونىس اۋدارۋشىلارعا 5 جىل بويى تەگىن بەرىپ, كەيىن جەكەشەلەندىرۋ شارتىمەن بەرىلگەنى ءجون.
ءالىمجان قۇرتاەۆ,
سەناتور
