ءابدىماجيت قوڭىرباي ۇلى وتەش ۇستىمىزدەگى جىلعى 17 قاراشادا دۇنيەدەن ءوتتى. ول 1958 جىلى 28 ماۋسىمدا جامبىل وبلىسىنىڭ سارىسۋ اۋدانىنداعى اقتوعاي اۋىلىندا دۇنيەگە كەلدى.
1972 جىلى رەسپۋبليكالىق فيزيكا-ماتەماتيكا مەكتەبىنە وقۋعا ءتۇسىپ, 1974 جىلى ءبىتىرىپ شىقتى.
1978 جىلى اباي اتىنداعى قازپي-ءدى ماتەماتيكا ءپانىنىڭ مۇعالىمى ماماندىعى بويىنشا تامامداعان. ستۋدەنت شاعىندا لەنيندىك ستيپەنديانىڭ يەگەرى بولدى. پەداگوگيكالىق ءوتىلى – 34 جىل. 1997 جىلدان بەرى مەكتەپ ديرەكتورى قىزمەتىن اتقاردى.
ءبىلىم بەرۋ سالاسىنداعى ەرەن ەڭبەگى جانە وقۋشىلاردى وليمپياداعا دايىنداۋ ىسىندەگى جەتىستىكتەرى ءۇشىن ءبىلىم مينيسترلىگىنىڭ قۇرمەت گراموتالارىمەن ماراپاتتالدى.
1999 جىلى ءبىلىم بەرۋ سالاسىنداعى ەرەن ەڭبەگى ءۇشىن «قازاقستان رەسپۋبليكاسى ءبىلىم بەرۋ ءىسىنىڭ ۇزدىگى» بەلگىسىمەن, ى.التىنسارين توسبەلگىسىمەن, 2009 جىلى «قۇرمەت» وردەنىمەن جانە «قازاقستان تاۋەلسىزدىگىنە 20 جىل» مەرەكەلىك مەدالىمەن ماراپاتتالدى.
ءابدىماجيت قوڭىرباي ۇلى الماتى قالاسىندا فيزيكا-ماتەماتيكا باعىتىندا وقىتاتىن كوپتەگەن مەكتەپتەردى اشۋعا اتسالىستى.
1997-2000 جىلدارى الماتى قالاسى رەسپۋبليكالىق فيزيكا-ماتەماتيكا مەكتەپ-ينتەرناتىندا ديرەكتور بولدى.
2000 جىلى №141 مەكتەپكە, ال 2003 جىلى دارىندى بالالارعا ارنالعان №173 فيزيكا-ماتەماتيكا ليتسەيىنە ديرەكتور بولىپ تاعايىندالدى.
2010 جىلدان №126 فيزيكا-ماتەماتيكا مەكتەپ-ليتسەيىنىڭ ديرەكتورى بولىپ قىزمەت ەتتى.
2013 جىلدىڭ قاڭتار ايىنان باستاپ جاڭادان اشىلعان №178 فيزيكا- ماتەماتيكا ليتسەيىندە ديرەكتورلىق قىزمەتتى اتقاردى.
ءابدىماجيت قوڭىرباي ۇلىنىڭ حالىقارالىق, رەسپۋبليكالىق عىلىمي-ادىستەمەلىك باسىلىمداردا ماتەماتيكا ءپانىن وقىتۋ ادىستەمەسى بويىنشا ماقالالارى ۇدايى جاريالانىپ تۇردى. ول شىققانىنا 20 جىل تولاتىن رەسپۋبليكالىق «الگوريفم» جۋرنالىنىڭ نەگىزىن قالادى.
كوپتەگەن وقۋ قۇرالدارى مەن وقۋلىقتاردىڭ رەتسەنزەنتى.
ءا.وتەشتىڭ وقۋ پروتسەسىن دۇرىس ۇيىمداستىرا ءبىلۋىنىڭ ارقاسىندا ول باسشىلىق ەتكەن مەكتەپتەر الماتى قالاسى بويىنشا تەك قانا الدىڭعى قاتاردان كورىنىپ كەلدى. وسى ۋاقىت ارالىعىندا 235 وقۋشى «التىن بەلگى» يەگەرى اتاندى.
ءابدىماجيت قوڭىرباي ۇلىنىڭ مەزگىلسىز اۋىر قازاسىنا ارىپتەستەرى, ۇزەڭگىلەستەرى, زامانداستارى, كەيىنگى تولقىن وكىلدەرىنىڭ بارلىعى قاتتى قايعىرادى. ءبىلىم سالاسىنىڭ مايتالمانى اتانعان ونىڭ ورنى ءاردايىم ويسىراپ تۇرارى ءسوزسىز. اللانىڭ ىسىنە امال نە؟! ءابدىماجيت قوڭىرباي ۇلىنىڭ ەلگە سىڭىرگەن ەڭبەگىن, جارقىن بەينەسىن, ازاماتتىق تۇلعاسىن ءاردايىم ەستە ساقتايتىن بولامىز. جانىڭ ءجانناتتا بولسىن, اياۋلى ۇستاز, ارداقتى ازامات!
№178 ليتسەي ۇجىمى
