فورۋمنىڭ قازۇۋ-دە ۇيىمداستىرىلىپ وتىرۋى كەزدەيسوق ەمەس. سەبەبى قازاقستان جۋرناليستيكاسىنا قىزمەت ەتىپ كەلە جاتقان ءتىلشى مامانداردىڭ بىرنەشە بۋىنىن تاربيەلەپ, ۇلتتىق جۋرناليستيكانىڭ قالىپتاسۋى جولىندا ماڭىزدى مىندەت ارقالاپ كەلە جاتقان قاراشاڭىراق وسى ۋنيۆەرسيتەت بولىپ ەسەپتەلەدى. ۋنيۆەرسيتەتتىڭ جۋرناليستيكا فاكۋلتەتىنەن تۇلەپ ۇشقان بىلىكتى ماماندار, سىرتتان كەلگەن ساراپشى مەيماندار قوعامدى رۋحاني جاڭعىرتۋ مەن سانانىڭ اشىقتىعىن قالىپتاستىرۋدا جانە ۇلتتىق بىرەگەيلىكتى نىعايتۋداعى بۇقارالىق اقپارات قۇرالدارىنىڭ ءرولىن, كاسىبي ەتيكا ماسەلەلەرىن, سونداي-اق كوپ ەتنوستى قوعامدا ماسس-مەديا مادەنيەتىن دامىتۋ ماسەلەلەرىن تالقىلاۋعا بايلانىستى ءسوز الدى.
قالاي بولعاندا دا, ءبىرىنشى كەزەكتە قوعامدىق ساناعا اسەر ەتەتىن كۇش – جۋرناليستيكا. قوعامدىق پىكىردى قالىپتاستىراتىن اقپارات قۇرالدارىنىڭ وكىلدەرى بولعاندىقتان, اقپاراتتى ايقىن, ءادىل, ناقتى ءارى جەدەل جەتكىزۋدە ءجۋرناليستىڭ كاسىبي بىلىكتىلىگى كۇن وتكەن سايىن سىنعا ءتۇسىپ كەلەدى.
تىلشىلەر قاۋىمىنا تەگىن ساباق ۇيرەتەتىن فورۋمنىڭ اسسامبلەيا ۇيىمداستىرىپ وتىرعان كەزەكتى جيىنىنىڭ ءجونى ءتىپتى بولەك. حالىقارالىق باسقوسۋدى قۇتتىقتاۋ سوزىمەن اشقان دارحان مىڭباي: «رۋحاني جاڭعىرۋ يدەياسىنىڭ اياسىندا وتكىزىلىپ وتىرعان جيىننىڭ «سانانىڭ اشىقتىعى» دەپ اتالۋىنىڭ ءمانى زور. بۇل ەڭ الدىمەن, جەتىستىككە جەتۋ جولى. رۋحاني جاڭعىرۋ اشىق سانا, ىزگى ويمەن قاتار جۇرەدى. ەلىمىزگە شەتەلدەن كەلگەن ساراپشىلار كوپۇلتتى مەملەكەت جاعدايىندا جۋرناليستيكانىڭ قالاي دامىپ وتىرعانىن ءوز كوزىمەن كورىپ, تاجىريبە ۇيرەنىپ, پايدالى وي ءتۇيىپ وتىر. ەتنوسارالىق ماسەلە وتە نازىك, شەتىن ماسەلە بولىپ ەسەپتەلەدى. ەتنوس تۋرالى ايتاتىن جۋرناليست ەڭ الدىمەن ەتيكا نورمالارى تۋرالى ءبىلۋى ءتيىس. بۇل تاقىرىپ جۋرناليستەن وتە وبەكتيۆتى بولۋدى, جان-جاقتى زەرتتەپ, زەردەلەپ بارىپ كوتەرۋدى تالاپ ەتەدى. ۇلت, ۇلىس تۋرالى يدەيالار, ۇلتارالىق قارىم-قاتىناس ماسەلەسىن باق بەتىندە كوتەرۋدىڭ, جازۋدىڭ, ساراپتاۋدىڭ قىر-سىرى, يىرىمدەرى وسىنداي الاڭداردا ايتىلىپ, تالقىلانادى. بولاشاق جۋرناليستەردى دايارلاۋدا جانە ولارعا دۇرىس باعىت-باعدار بەرۋدە تەك ستۋدەنت جاستار ءۇشىن عانا ەمەس, كاسىبي جۋرناليستەرگە دە مۇنداي مەديا فورۋمداردىڭ بەرەتىن پايداسى زور», دەدى.
فورۋم اياسىندا وتاندىق جانە شەتەلدىك سپيكەرلەردىڭ شەبەرلىك ساباقتارى, TEDح كونفەرەنتسياسى, ەتنوستىق باق كورمەسى وتكىزىلدى. ال جيىن سوڭىندا قازاقستان حالقى اسسامبلەياسىنىڭ جۋرناليستيكا سالاسىندا جىل سايىن وتكىزەتىن «شاڭىراق» بايقاۋىنىڭ جەڭىمپازدارى ماراپاتتالدى.
ايگۇل احانبايقىزى,
«ەگەمەن قازاقستان»
الماتى
