اۋليەكول اۋداندىق مۋزەيىندە شىعارمانىڭ تۇساۋكەسەرى ءوتتى. وعان قوستانايلىق بەلگىلى قىلقالام شەبەرلەرى نيكولاي گونچاروۆ, ولەگ كۋسكوۆ, «نۇر وتان» پارتياسى جانە ىسكەر ايەلدەر قاۋىمداستىعى وبلىستىق فيليالدارىنىڭ مۇشەلەرى, مادەنيەت قىزمەتكەرلەرى, زيالى قاۋىم وكىلدەرى قاتىستى. الدىمەن بەكتۇرعانوۆتار تۋرالى. سەرىك شىڭعىس ۇلى – سەناتور, ريمما شىڭعىسقىزى – پەداگوگيكا عىلىمدارىنىڭ دوكتورى, كوپ جىلدار قوستاناي پەداگوگيكالىق كوللەدجىن باسقاردى, «نۇر وتان» پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى قىزمەتىن اتقاردى. قازىر دە ءبىلىم سالاسىندا قىزمەت ەتەدى.
– بۇل شىعارمانى ءبىز ءىنىم سەرىك شىڭعىس ۇلى ەكەۋمىز الاش قوزعالىسىنىڭ 100 جىلدىعىنا ارنادىق, سونىمەن قاتار اۋليەكول اۋدانىنىڭ 90 جىلدىعى قارساڭىندا دا وسىنداي شارانىڭ وتكەنى دۇرىس دەپ بىلەمىز. احاڭنىڭ حالقىمىزعا جاساعان رۋحاني ەڭبەگىنىڭ, مەملەكەتكە جاساعان قايراتكەرلىگىنىڭ الدىندا ءبىز ماڭگىلىك قارىزدارمىز. ال ءبادريسافا شەشەمىزدىڭ تاعدىرى ماحابباتقا ادالدىقتىڭ, قايسارلىقتىڭ سيمۆولى ءتارىزدى. بىراق كەمەڭگەر ادام تاعدىرىنىڭ بىزگە بەيمالىم جۇمباعى دا جەتەرلىك.
احاڭنىڭ ءبادريسافاسى ءبىز ءۇشىن وسىنداي شەشىلمەگەن جۇمباق دەسەك تە بولادى. ء«بادريسافا» تاريحي-تانىمدىق ەكسپەديتسياسى ءبىراز جۇمىس ءبىتىردى. يۋري دميتريەۆيچتىڭ قىلقالامىنان شىققان سۋرەتتى مۋزەيگە سىيلاۋعا شەشىم جاسادىق, ول كەلۋشىلەرگە احاڭ مەن ءبادريسافا ماحابباتى تۋرالى ايتىپ تۇرعانداي بولادى, – دەدى ريمما شىڭعىسقىزى.
كىمنىڭ باسىنان جاستىق شاق وتپەدى دەيسىز؟ ءومىرى كۇرەسپەن وتكەن احاڭ دا قوستانايدىڭ جازىنداي جاستىقتىڭ قىسقا عانا سامالىن سەزىنسە كەرەك. دەرەگى قاعازعا تۇسپەسە دە, اۋليەكول مەكتەبىنە كەلگەن جاس مۇعالىمنىڭ بادريسافامەن وسىندا كەزدەسكەنى تۋرالى اۋىزشا جەتكەن اڭگىمە بار. اۋدان اكىمى جانسۇلتان تاۋكەنوۆ اۋداندىق مۋزەيگە تاپسىرعان پورترەت ءۇشىن اعايىندى بەكتۇرعانوۆتارعا العىس ايتتى.
– ءبادريسافا شەشەمىزدىڭ تاعدىرى دەكابريستەر ايەلدەرىنەن اسىپ تۇسپەسە, كەم بولعان جوق. ول احاڭا اياعىنا دەيىن ادال بولدى, «تورەسى» ءۇشىن وتقا دا ءتۇستى, شوققا دا كۇيدى. تاعدىردىڭ سالعانىنا قاسقيىپ قارسى تۇردى, بارىنە دە كوندى. ۇلت ۇستازى احمەت بايتۇرسىنوۆتىڭ شىعارمالارىمەن, قايراتكەرلىگىمەن قاتار, ونىڭ تاعدىرىن دا جاس ۇرپاق ءبىلىپ ءوسۋى ءتيىس. احاڭ مەن ءبادريسافانىڭ ماحابباتى, ولار باستان كەشكەن بەينەتتى ءبىلۋدىڭ ءوزى جاس بۋىنعا رۋحاني ازىق بەرەدى, – دەدى جانسۇلتان قوڭىرتاي ۇلى.
تۇساۋكەسەردەن كەيىن وبلىستىق ورىس دراما تەاترىنىڭ ۇجىمى احاڭ مەن ءبادريسافا تاعدىرىنان سىر شەرتەتىن «اق كەلىن» سپەكتاكلىن قويدى.
ءنازيرا جارىمبەت,
«ەگەمەن قازاقستان»
قوستاناي وبلىسى,
اۋليەكول اۋدانى
