ءوڭىردىڭ ءىرى جۇيە قۇراۋشى كاسىپورنى اۋىل شارۋاشىلىعىنا ارنالعان مينەرالدى تىڭايتقىشتار, جەم-شوپتىك فتورسىزداندىرىلعان فوسفاتتار وندىرەدى. باقىتجان ساعىنتاەۆ وندىرىستىڭ اعىمداعى كورسەتكىشتەرىمەن تانىسىپ, ەكسپورت كولەمىن ارتتىرۋ بويىنشا باياندامانى تىڭدادى.
«قازفوسفات» جشس باس ديرەكتورى مۇقاش ەسكەندىروۆتىڭ ايتۋىنشا, يدمب اياسىندا 2016 جىلى زاۋىتتى قايتا جوندەۋ ءوندىرىس كولەمىن 2 ەسەگە ارتتىرۋعا مۇمكىندىك بەرگەن. بيىل 300 مىڭ توننا فوسفورلى مينەرالدى تىڭايتقىشتار ءوندىرىلىپ, ولاردىڭ 108 مىڭ تونناسى قازاقستاننىڭ قاجەتتىلىكتەرىن 100% قامتي وتىرىپ, ىشكى نارىقتا وتكىزىلەدى. 200 مىڭ تونناعا جۋىعى قىتاي, اۋعانستان, رەسەي, ۋكراينا, ۋرۋگۆاي, ارگەنتينا ەلدەرىنە ەكسپورتتالادى. رۋمىنيا, چەحيا, بولگاريا, يران نارىقتارىن يگەرۋ جۇمىستارى جۇرگىزىلىپ جاتىر. كەلەر جىلى فوسفورلى مينەرالدى تىڭايتقىشتار ءوندىرىسى كولەمىن 500 مىڭ تونناعا دەيىن ۇلعايتۋ جوسپارلانعان.
جامبىل وبلىسى اكىمىنىڭ ورىنباسارى تيمۋر جانكە يدمب يندۋستريالاندىرۋ كارتاسى اياسىندا 2017 جىلى وڭىردە 1448 جاڭا جۇمىس ورنىن قۇرا وتىرىپ, 18,8 ملرد تەڭگە سوماعا 13 جوبانى ىسكە اسىرۋ كوزدەلگەنىن ايتتى. جىل باسىنان بەرى 8,3 ملرد تەڭگە سوماعا 6 جوبا ەنگىزىلدى, 398 جۇمىس ورنى قۇرىلدى.
جالپى ەلىمىزدە بيىل 10 ايدا ەكونوميكانىڭ بارلىق بازالىق سالالارى بويىنشا ءوندىرىس ءوسىمى بايقالعان. ونەركاسىپ كورسەتكىشتەرى وتكەن جىلدىڭ ۇقساس كەزەڭىمەن سالىستىرعاندا 7,5%-عا جاقساردى, ونىڭ ىشىندە جامبىل وبلىسى بويىنشا ءوسىم 1,4% قۇرايدى.
