ولاردىڭ قاتارىندا مەرەيتوي يەسى قر مەملەكەتتىك سىيلىقتىڭ لاۋرەاتى, «قۇرمەت» وردەنىنىڭ يەگەرى, حالىقارالىق پەن كلۋبى جانە پلاتينالى «تارلان» سىيلىقتارىنىڭ لاۋرەاتى, جازۋشى-دراماتۋرگ دۋلات يسابەكوۆ, جازۋشى, "قۇرمەت" وردەنىنىڭ يەگەرى بەكسۇلتان نۇرجەكەەۆ, حالىقارالىق "الاش" ادەبي سىيلىعى مەن "قۇرمەت" وردەنىنىڭ يەگەرى قازىبەك يسالار بار.
كەزدەسۋدە ءسوز العان ءوڭىر باسشىسى مەرەيتوي يەسىن قۇتتىقتاپ, "ۇلتىن سۇيگەن دارا تۇلعا" اتتى شىعارماشىلىق كەشتىڭ ءساتتى وتۋىنە تىلەگىن ءبىلدىردى.
ء«بىز ءسىزدى جازۋشى, دراماتۋرگ, ۇلتىمىزدىڭ بولمىس-ءبىتىمىن سول كۇيى كەلەشەككە جەتكىزۋشى رەتىندە, ۇلتتىق ادەبيەتىمىزدىڭ الەمدىك دەڭگەيدە تانىلا تۇسۋىنە ەرەكشە ۇلەس قوسىپ كەلە جاتقان, ءوزىنىڭ دارا جولى بار ەل ازاماتى رەتىندە ماقتان تۇتامىز. بيىلعى جىلدىڭ قازان ايىندا ۇلىبريتانيا استاناسى لوندون تورىندە لوردتار پالاتاسىندا ارنايى قابىلداۋ ءوتىپ, «پەسالار جيناعى» كىتابىڭىزدىڭ تۇساۋى كەسىلىپ, «اققۋ جىبەك» اتتى پەساڭىزدىڭ قويىلىمىنىڭ وتۋىمەن ءسىزدى شىن جۇرەكتەن قۇتتىقتايمىن», - دەدى جانسەيىت قانسەيىت ۇلى.
دۋلات يسابەكوۆ - قازاق ادەبيەتىندە ەشكىمگە ۇقسامايتىن, تىڭنان تۇرەن سالعان جازۋشى. تۋىندىلارىنىڭ ءار ءسوزى ءتىرى, ءار ءسوزى ماڭگىلىك قوزعالىستا. ويتكەنى, دۋلات يسابەكوۆ كۇردەلى زاماننىڭ ءتول جازۋشىسى. وتكەن عاسىردىڭ 60-شى جىلدارى «جولدا» اڭگىمەسى جارىق كورىپ, كەيىنەن «بەكەت», «اششى بال», «مازاسىز كۇندەر», «قارا شاڭىراق», «تىرشىلىك» پوۆەستەر مەن اڭگىمەلەر جيناقتارى جارىق كورسە, 80-ءشى جىلدارى «قارعىن» رومانى باسىلىپ شىقتى.
كەزدەسۋدە ءسوز العان جازۋشى بەكسۇلتان نۇرجەكەەۆ دۋلات يسابەكوۆتىڭ قازاق ادەبيەتىن دامىتۋعا قوسقان ۇلەسىنە توقتالدى. ال, اقىن قازىبەك يسا حالىق جازۋشىسىنىڭ ءومىر عۇمىردارياسىنان كەڭىنەن ءسوز قوزعادى.
كەزدەسۋدى قورىتقان وبلىس اكىمى مەرەيتوي يەسى مەن قوناقتارعا سىي-سياپات جاساپ, باعالى سىيلىقتار تابىس ەتتى.
ايتا كەتەيىك, بۇگىن ج.شانين اتىنداعى وبلىستىق اكادەميالىق قازاق دراما تەاترىندا دۋلات يسابەكوۆتىڭ 75 جاسقا تولۋىنا ارنالعان "ۇلتىن سۇيگەن دارا تۇلعا" اتتى شىعارماشىلىق كەشى ۇيىمداستىرىلماق. سونىمەن قاتار, تەاتر ساحناسىندا رەسپۋبليكالىق ۇيعىر مۋزىكالىق كومەديا تەاترى ارتيستەرىنىڭ ورىنداۋىندا جازۋشىنىڭ «مۇراگەرلەر» اتتى قويىلىمى كورەرمەندەر نازارىنا ۇسىنىلماق.
