ا.مامين ازەربايجان پرەزيدەنتىنە قازاقستان پرەزيدەنتى ن.نازارباەۆتىڭ سالەمى مەن ىزگى تىلەكتەرىن جەتكىزدى.
ي.اليەۆ تە قازاقستان پرەزيدەنتىنە ىستىق ىقىلاسىن ءبىلدىرىپ, ەلباسىنىڭ بيىلعى ساۋىردەگى باكۋگە رەسمي ساپارى قازاقستان – ازەربايجان ەلدەرىنىڭ اراسىنداعى قارىم-قاتىناسقا تىڭ سەرپىن بەرگەندىگىن اتاپ ءوتتى.
كەزدەسۋ بارىسىندا ەكى ەل اراسىنداعى ساۋدا-ەكونوميكالىق قاتىناستاردىڭ بارلىق سالاسىن دامىتۋدىڭ بولاشاعى تالقىلاندى.
«ازەربايجان قازاقستاننىڭ كاۆكاز وڭىرىندەگى ءىرى ستراتەگيالىق سەرىكتەسى», دەي كەلىپ ا. مامين قازىرگى تاڭدا قازاقستان-ازەربايجان قارىم-قاتىناسى بارلىق سالادا جوعارى قارقىنمەن دامىپ كەلە جاتقانىنا توقتالدى.
كەزدەسۋ بارىسىندا قازاقستان پرەمەر-ءمينيسترىنىڭ ءبىرىنشى ورىنباسارى قازاقستان-ازەربايجان ۇكىمەتارالىق كوميسسياسىنىڭ ەكى ەل اراسىنداعى 2017-2020 جىلدارعا ارنالعان ساۋدا-ەكونوميكالىق جول كارتاسىن جاساعانىن حابارلادى.
ي.اليەۆ قازاقستاننىڭ ترانسكاسپي حالىقارالىق كولىك ءدالىزىنىڭ الەۋەتىن ءتيىمدى پايدالانۋداعى باكۋ −تبيليسي – كارس جەلىسىنىڭ زور ماڭىزىن اتاپ ءوتتى.
«قۇرىق پورتى ارقىلى اۆتوكولىك جانە اۆتوموبيل جولدارىن پايدالانۋعا بەرۋ ازيا − ەۋروپا باعىتىنداعى جۇك اعىنىن ەداۋىر كوتەرەدى. بيىلعى 10 ايدا پورت ارقىلى جۇك تاسىمالداۋ كولەمى 2,5 ەسەگە ارتىپ, 1 ميلليون 650 مىڭ توننانى قۇرادى. 2020 جىلعا قاراي كونتەينەرلىك تاسىمال كولەمىن 300 مىڭ جفە-گە جەتكىزۋ كوزدەلۋدە», دەدى ا. مامين.
كەزدەسۋدە ەكى ەل اراسىنداعى كولىك-لوگيستيكالىق جانە تەمىر جول ماشيناسىن جاساۋ سالاسىنداعى قاتىناستىڭ تابىستى ەكەندىگى اتاپ ءوتىلدى.
«ساۋدا اعىندارىن زاماناۋي لوگيستيكالىق ينفراقۇرىلىممەن قامتاماسىز ەتۋ جانە ساپالى قىزمەت كورسەتۋ ترانزيتتىك دالىزگە قاتىسۋشى ەلدەردىڭ جاڭا نارىقتى تەز مەڭگەرىپ, جۇك اعىندارىن تارتۋى ءۇشىن جۇكتىڭ جەتكىزىلۋ جىلدامدىعى مەن باعاسىنىڭ ارزانداۋىنا سەپتىگىن تيگىزەدى», دەپ اتاپ ءوتتى ا. مامين.
تاراپتار اقتاۋ, قۇرىق جانە اليات پورتتارىنداعى قىزمەتتەردى جاپسارلاس اتقارىپ, كوممەرتسيالىق تارتىمدىلىعىن كوتەرۋ ارقىلى جۇك تاسىمالداۋشىلارعا قولايلى جاعداي جاساۋ كەرەكتىگىنە نازار اۋداردى.
كەزدەسۋدە تاراپتار تاۋار اينالىمىن ءارى قاراي وسىرە ءتۇسۋ ءۇشىن قاجەتتى شارالاردى قابىلداپ, قازاقستان استىعىنىڭ جىلىنا 1 ميلليون تونناسىن ەكسپورتقا شىعارۋ كولەمىن قالپىنا كەلتىرۋگە ۋاعدالاستى.
تاراپتار سونىمەن قاتار ينۆەستيتسيا سالاسىنداعى, اگرارلىق-ونەركاسىپ سەكتورىنداعى, مۇناي-گاز سالاسىنداعى قاتىناستى ودان ءارى دامىتۋ ماسەلەلەرىن تالقىلادى.
