مۇنداي جاعىمدى جاڭالىقتى بۇگىن وسكەمەندە اقپاراتتىق ورتالىقتا وتكەن بريفينگتە كوكپەكتى اۋدانىنىڭ اكىمى راميل ساعاندىقوۆ جەتكىزدى. ومبى جەرىندە دۇنيە ەسىگىن اشقان الاشتىڭ اردا ۇلى 1920 جىلى كوكپەكتى اۋىلىنىڭ ماڭىندا قىزىلداردىڭ قولىنان مەزگىلسىز قازا تاپقانى بەلگىلى.
بەلگىلى ايتىسكەر اقىن, زەرتتەۋشى قاليحان التىنباەۆ ءوزىنىڭ «كوكپەكتى» اتتى كىتابىندا حاميت توقتامىشەۆ اتىلعاننان كەيىن كوكپەكتىلىك اقساقالدار «مۇسىلمانشا جەرلەيمىز» دەپ قىزىلداردان ونىڭ دەنەسىن سۇراپ الىپ, جۋىندىرىپ, اسكەري كيىمىمەن بىرگە ءداۋىت حازىرەت دەگەن كىسىنىڭ اياعىنا جەرلەگەنىن جازعان-دى.
جۋىردا بۇگىندە ۇلان اۋدانىنىڭ ايىرتاۋ اۋىلىندا تۇراتىن سپورت ارداگەرى مۇقان اعزاموۆپەن كەزدەسىپ قالىپ, سوزدەن ءسوز شىعىپ, ايتىسكەر اقىن جازىپ وتىرعان ءداۋىت حازىرەتتىڭ ول كىسىنىڭ ءتورتىنشى اتاسى ەكەنىن ەستىپ, الاش اسكەرىنىڭ جەتەكشىسىنە قاتىستى ءبىر دەرەكتىڭ ۇشىعىنىڭ شىققانىنا قۋانعان ەدىك. ءداۋىت حازىرەت كەزىندە كوكپەكتى وكرۋگىنىڭ (ول ۋاقىتتا وكرۋگكە جاڭا سەمەيدەن باستاپ, كۇرشىمگە دەيىنگى اۋماقتىڭ ءبارى قاراعان) يمامى قىزمەتىن اتقارىپ, 1910 جىلى دۇنيەدەن ءوتىپتى. مۇقان اعزاموۆ باباسىنىڭ باسىنا بيىل 19 مامىردا ەسكەرتكىش تاقتا قويدىرىپتى. ءتورتىنشى اتاسىنىڭ بەيىتىندەگى ەسكى اراب تىلىمەن تاسقا جازىلعان جازۋدى ەشكىم وقي الماعان سوڭ تاجىكتىڭ مولداسىن اكەلىپ وقىتىپتى.
«كوكپەكتى اۋىلىنىڭ ىرگەسىندەگى ەسكى بەيىتتەردى وسىدان ونشاقتى جىل بۇرىن ءرامزي بەسپاەۆ دەگەن سول كەزدەگى اۋدان اكىمى قورشاتىپتى. شامامەن جارتى گەكتارداي اۋماقتى الىپ جاتىر. قاۋلاپ قالىڭ ءشوپ ءوسىپ كەتكەن. قاي جەردە بەيىت بارىن انىقتاۋ دا قيىن. قاليحان التىنباەۆ جازباسىنا سۇيەنە وتىرىپ حاميت توقتامىشەۆتىڭ جاتقان جەرىن قورشاپ, باسىنا بەلگى قويىلعانى ءجون-اق. وسى ءىستى جەدەلدەتىپ قولعا العانىمىز ءلازىم», - دەيدى سپورت ارداگەرى.
ازامات قاسىم,
«ەگەمەن قازاقستان»
