كەشە ەلۋدەن استام ادام قان قۇيۋ ورتالىعىنا كەلىپ, قان تاپسىردى. نەگىزى قان تاپسىرۋ اكتسياسى جول-كولىك وقيعاسى قۇرباندارىن ەسكە الۋ كۇنىنە ارنالدى. 2005 جىلى بەلگىلەنگەن بۇل حالىقارالىق شارا جىل سايىن قاراشا ايىنىڭ ءۇشىنشى جەكسەنبىسىندە اتالىپ وتەدى, ول بيىل 19 قاراشاعا تۇسپا تۇس كەلىپ تۇر. مۇنداي شاراعا پوليتسەيلەردىڭ ءبىرىنشى رەت قاتىسۋى ەمەس, ءتارتىپ ساقشىلارىنىڭ ءبىرسىپىراسىندا دونور كۋالىگى, بەلگىلەرى دە بار. وبلىستىق قان قۇيۋ ورتالىعىنىڭ مەنەدجەرى انتونينا مىشكوۆەتستىڭ ايتۋىنشا, قوستانايلىق پوليتسەيلەر اراسىندا دونور بولۋعا تىلەك بىلدىرەتىندەر كوپ. مىسالى, ءبىر كۇندە قان تاپسىرۋعا 70 پوليتسەي كەلگەن, ولاردىڭ ەلۋدەن استامى قان تاپسىرعان, قالعانى كەلەسى كۇنى كەلۋگە كەلىسكەن.
«جول-كولىك وقيعالارىنان زارداپ شەككەندەردى دونورلىق قاندار اجالدان ساقتاپ قالادى. ال جولدا مۇنداي اۋىر وقيعالاردى وزدەرى كورىپ جۇرگەن پوليتسەيلەر قان تاپسىرۋدان ەشقاشان باس تارتپايدى», دەيدى پوليتسيا مايورى ەلەنا ماگاسۋموۆا.
اكتسياعا قاتىسقانداردىڭ ارقايسىسى بۇل كۇنى ءبىر قۇتى يوگۋرت, 567 تەڭگە جانە ەكى كۇن دەمالىس الدى.
ءنازيرا جارىمبەتوۆا,
«ەگەمەن قازاقستان»
