ەلجان ءبىرتانوۆتىڭ ايتۋىنشا, دەنساۋلىق ساقتاۋ سالاسىن تسيفرلاندىرۋ پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ىسكە اسىرۋ اياسىندا «دەنساۋلىق ساقتاۋ جۇيەسىن جاڭعىرتۋ» جوباسى بويىنشا جەكە باستاما رەتىندە ىسكە اسىرىلۋدا, سونىمەن قاتار «تسيفرلىق قازاقستان» مەملەكەتتىك باعدارلاماسىمەن تولىق سايكەستەندىرىلگەن.
دەنساۋلىق ساقتاۋ جۇيەسىن تسيفرلاندىرۋدىڭ 2017–2018 جىلدارعا ارنالعان جول كارتاسى ازىرلەندى. جىل سوڭىنا دەيىن بىرىڭعاي ينتەگراتسيالىق پلاتفورمانى پيلوتتىق ەنگىزۋ كوزدەلگەن, ونىڭ اياسىندا قازاقستان رەسپۋبليكاسىنىڭ ءاربىر ازاماتىنىڭ جەكە ۇياشىعى — دەنساۋلىعىنىڭ ەلەكتروندى پاسپورتى بولادى. سونداي-اق, جەكەلەگەن قىزمەتتەردىڭ جۇمىسى اۆتوماتتاندىرىلادى: مەديتسينالىق ساقتاندىرۋ قورى, قوعامدىق دەنساۋلىق ساقتاۋ مەن ءدارى-دارمەكپەن قامتاماسىز ەتۋ سالاسى.
«دەنساۋلىق ساقتاۋ مينيسترلىگى مەن IBM كومپانياسىنىڭ اراسىندا ىنتىماقتاستىق تۋرالى مەموراندۋمعا قول قويىلدى, ونىڭ شەڭبەرىندە «Watson for oncology» — دەنساۋلىق ساقتاۋ سالاسىنا جاساندى ينتەللەكتىنى پيلوتتىق ەنگىزۋ جوسپارلانعان. قازىرگى تاڭدا جوعارىدا اتالعان مەموراندۋم اياسىندا پيلوتتىق جوبانى وتكىزۋ بويىنشا جول كارتاسى ازىرلەنۋدە», — دەدى مينيستر.
سونىمەن قاتار بۇگىندە يۋنيسەف-پەن بىرلەسىپ «پاتروناج مەيىربيكەسى جانە ەرتە جاستاعى بالالاردى كۇتۋ» ءموبيلدى قوسىمشاسىن ازىرلەۋ جۇمىستارى جۇرگىزىلۋدە. ءموبيلدى قوسىمشانى ىسكە قوسۋ 2017 جىلدىڭ جەلتوقسان ايىنا جوسپارلانعان.
2018 جىلى قاعازسىز دەنساۋلىق ساقتاۋ جۇيەسى پيلوتتىق رەجيمدە ءتورت وڭىردە: قاراعاندى, قوستاناي, اقمولا جانە باتىس قازاقستان وبلىستارىندا, سونداي-اق, رەسپۋبليكالىق دەڭگەيدەگى بىرقاتار ۇيىمدا ىسكە قوسىلادى. 2019 جىلدىڭ 1 قاڭتارىنان باستاپ مەديتسينا ۇيىمدارى مەديتسينالىق قۇجاتتامانى قاعازسىز فورماتتا جۇرگىزۋگە تولىقتاي كوشەدى, سونىڭ ىشىندە: ەلەكتروندىق امبۋلاتوريالىق كارتالار, اۋرۋلاردىڭ ەلەكتروندىق تاريحى جانە ەلەكتروندىق رەتسەپتىلەردىڭ كوشىرمەسى.
ءمينيستردىڭ ايتۋىنشا, دەنساۋلىق ساقتاۋ سالاسىن تسيفرلاندىرۋ ارقىلى مەديتسينا قىزمەتكەرلەرىنىڭ ەڭبەك ونىمدىلىگىن ۇلعايتىپ, حالىقتىڭ مەديتسينالىق قىزمەتتەرگە قاناعاتتانۋ دەڭگەيىن ارتتىرۋ كوزدەلگەن.
