ۇلتتىق ەكونوميكانىڭ ءبىرىنشى ۆيتسە-ءمينيسترى رۋسلان دالەنوۆ ەلەكتروندىق كوممەرتسيانى ءتيىمدى دامىتۋ ماقساتىندا ەلەكتروندىق ساۋدا-ساتتىقتى دامىتۋ بويىنشا 2018-2020 جىلدارعا ارنالعان جول كارتاسى ازىرلەنگەنىن جانە بەكىتىلگەنىن باياندادى. «ينتەرنەت-دۇكەن» تۇسىنىگىن, سونداي-اق ساتۋشىلار مەن دەلدالداردىڭ ينتەرنەت-دۇكەندەر قۇرۋ ماسەلەلەرىن رەگلامەنتتەيتىن نورمالاردى قاراستىراتىن «ساۋدا قىزمەتىن رەتتەۋ تۋرالى» زاڭعا تۇزەتۋلەر جاسالدى.
سونداي-اق, ءموبيلدى تولەمدەردىڭ جەڭىلدەتىلگەن تەتىگىن ەنگىزۋدى ىنتالاندىرۋ, ءموبيلدى تولەمدەرگە كوميسسيانى تومەندەتۋ بويىنشا ۇسىنىستار, ەلەكتروندىق شوت-فاكتۋرانى پايدالانۋعا تولىق كوشۋدى قامتاماسىز ەتۋ ماسەلەلەرى پىسىقتالۋدا.
جول كارتاسىندا سونداي-اق UNCTAD كورسەتكىشتەرىن ارتتىرۋ بويىنشا ءىس-شارالار قاراستىرىلعان. ءمالىم بولعانداي, وتكەن جىلى قازاقستان 88-ءشى, ال 2017 جىلى — 51-ءشى ورىنعا يە بولدى.
اقپارات جانە كوممۋنيكاتسيالار ءمينيسترى داۋرەن اباەۆ, قارجى ءمينيسترى باقىت سۇلتانوۆ, «قازپوشتا» اق باسقارما توراعاسى ساكەن سارسەنوۆ ەلەكتروندىق كوممەرتسيانى دامىتۋ بويىنشا قابىلدانعان شارالار تۋرالى باياندادى.
ماسەلەنى قاراستىرۋ قورىتىندىسى بويىنشا پرەمەر-مينيستر ەلەكتروندىق ساۋدا-ساتتىقتى دامىتۋ ءۇشىن ەلىمىزدە ءبىراز جۇمىس اتقارىلىپ جاتقانىن, سالىق جەڭىلدىكتەرى بەرىلەتىنىن, سايكەس جول كارتاسى ازىرلەنگەنىن, الايدا سونىمەن بىرگە تۇتىنۋشىلاردىڭ قۇقىقتارىن قورعاۋ تۋرالى ۇمىتپاۋ كەرەك ەكەنىن اتاپ ءوتتى.
وسىعان بايلانىستى ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرگە تۇتىنۋشىلاردىڭ قۇقىقتارىن قورعاۋدى جانە بيزنەستى ونلاين ساۋدا-ساتتىققا ىنتالاندىرۋ بويىنشا تاسىلدەردى قاراستىراتىن زاڭنامانى جەتىلدىرۋ شارالارىن قابىلداۋ تاپسىرىلدى.
ينۆەستيتسيالار جانە دامۋ, ۇلتتىق ەكونوميكا مينيسترلىكتەرىنە ەلەكتروندىق كوممەرتسيانىڭ جەدەلدەتىلگەن دامۋىنا باعىتتالعان وزىندىك ءوندىرىس تاۋارلارى, جۇمىستار جانە قىزمەت كورسەتۋلەر ءتىزىمىن كەڭەيتۋ ماسەلەلەرىن پىسىقتاۋ تاپسىرىلدى.
