كەزدەسۋگە «ەگەمەن قازاقستان» گازەتىنىڭ ارداگەرى, قازاقستاننىڭ قۇرمەتتى ءجۋرناليسى ماماديار جاقىپ پەن باسىلىمنىڭ الماتىداعى تىلشىلەر قوسىنىنىڭ باسشىسى نۇرعالي وراز قاتىستى. باسقوسۋ بارىسىندا باسىلىمداعى مۇعالىمدەرگە ارنالعان ارنايى ء«تالىم», ء«بىلىم» بەتتەرىنىڭ ۇزدىكسىز شىعىپ كەلە جاتقاندىعى, بۇل ءوز كەزەگىندە ۇستازدار مەن اتا-انالاردىڭ, ءوسىپ كەلە جاتقان وسكەلەڭ ۇرپاقتىڭ يگىلىگىنە باعىتتالعان جوبا ەكەندىگى كەڭىنەن ايتىلدى. وقۋشىلار باسىلىمنىڭ ارعى-بەرگى تاريحى, وتكەنى مەن بۇگىنى جايلى كوپتەگەن ماعلۇماتقا قانىعىپ, اعالارىنا ساۋالدارىن جولدادى. جوعارعى سىنىپ وقۋشىلارى كۇمبىرلەتىپ كۇي ويناپ, جىردان شاشۋ شاشتى.
كەزدەسۋدە ارداگەر جۋرناليست ماماديار جاقىپ مەكتەپ ۇجىمىنا العىسىن ايتىپ, «عاسىرعا جۋىق تاريحى بار اتا باسىلىم «ەگەمەن قازاقستان» گازەتى ەلىمىزدىڭ مەكتەپتەرىمەن شىعارماشىلىق بايلانىس جاساۋدى ءاردايىم نازاردا ۇستاپ كەلەدى. نازارباەۆ زياتكەرلىك مەكتەپتەرى ءبىلىم بەرۋدىڭ بارلىق تالاپتارىنا, زاماناۋي ستاندارتتارىنا ساي ەلىمىزدەگى ەڭ ءبىر ىرگەلى ءبىلىم شاڭىراعى دەپ بىلەمىز. ءبىز نەبىر قيىن زامانداردى كوردىك. جەرتولەدە ساباق وقىعان كۇنىمىز بولعان. وقۋعا كىتاپ تاپپايتىنبىز. ال, قازىر زامان سىزدەردىكى. وقىپ ءبىلىم الۋلارىڭىز ءۇشىن ۋاقىت تالابىنا ساي بارلىق جاعداي جاسالعان. حالقىمىز «بىلەكتى ءبىردى, ءبىلىمدى مىڭدى جىعادى» دەپ بەكەر ايتپاسا كەرەك. راسىندا دا, قازىر ءبىلىمنىڭ, بىلىكتىڭ زامانى. ادامدى بيىككە كوتەرەتىن – وقۋ-ءبىلىم, جاقسى مىنەز, جاقسى تاربيە. ەندەشە, جان-جاقتى ساۋاتتى, ءبىلىمدى, زەردەلى, باسەكەگە قابىلەتتى, رۋحاني دۇنيەسى باي ازامات بولىپ قالىپتاسۋلارىڭىزعا تىلەكتەسپىن» دەپ اق تىلەگىن ءبىلدىردى.
2014 جىلى اشىلعان ءبىلىم ورداسىندا بۇگىنگى تاڭدا مىڭنان استام شاكىرت ءبىلىم الۋدا. وقىتۋشىلار قۇرامى تاجىريبەسى مول بىلىكتى مامانداردان قۇرالعان. شەت ەلدەردەن ارنايى شاقىرتىلعان ۇستازدار ءدارىس بەرەدى. ءبىر ايتا كەتەرلىگى, از جىلدار ىشىندە اتالعان مەكتەپتىڭ شاكىرتتەرى حالىقارالىق وليمپيادالاردا توپ جارىپ, جاس زياتكەرلەرگە ارنالعان الەمدىك جوبالاردا كوش باسىنان كورىنگەن. «بۇل مەكتەپ ۇجىمىنا جاسالعان قولداۋ مەن ۇستازدار تاراپىنان قويىلاتىن جوعارى تالاپتىڭ, زور ىزدەنىستىڭ ناتيجەسى دەيدى» شاكىرتتەر.
كەزدەسۋ سوڭىندا مەكتەپ باسشىلىعى كەلگەن قوناقتارعا زور العىسىن ءبىلدىرىپ, وقۋشىلاردىڭ ءوز قولىنان جاسالعان ەستەلىك سىيلىقتارىن تارتۋ ەتتى.
ارمان وكتيابر,
«ەگەمەن قازاقستان»
الماتى
