جاڭا انشلاگتار قوراپ ءتارىزدى جاسالعان, وندا كوشە اتاۋى مەن ءۇيدىڭ ءنومىرى جازىلعان. ولاردىڭ بارلىعى جارىقتاندىرىلعان. ماڭدايشالاردىڭ ءبىرازى كۇن باتارەياسىنان قۋاتتاندىرىلادى, ال قالعانى ەلەكتر جۇيەلەرىنە قوسىلعان.
جاڭا ماڭدايشالار تەك تۇرعىن ۇيلەردە عانا ەمەس, سونداي-اق مەملەكەتتىك مەكەمەلەردە, شاعىن جانە ورتا بيزنەس نىساندارىندا دا ورناتىلادى. بۇگىندە ءا.ءاليحانوۆ كوشەسى بويىنداعى عيماراتتارعا ولاردى ورناتۋ جۇمىستارى اياقتالعان.
– قازىبەك بي اۋدانىندا جالپى سوماسى 35 000 000 تەڭگەگە بارلىعى وسىنداي 1 521 ماڭدايشا ورناتىلاتىن بولادى, – دەيدى قاراعاندى وبلىسى اكىمدىگىنىڭ جوسپارلاۋ جانە اباتتاندىرۋ ءبولىمىنىڭ جەتەكشىسى ەربول نۋكيچ. – ازىرگە مۇنداي انشلاگتار تەك استانادا عانا بار. ەندى قاراعاندىدا بولادى.
جاڭا نۇسقاۋلىقتاردا QR-كودى بار, ونى سمارتفوننىڭ كومەگىمەن وقۋعا بولادى. ول ارقىلى ءسىز سايتتاعى پاراقشاعا كىرەسىز, ول جەردە عيماراتتىڭ پوشتالىق يندەكسى كورسەتىلگەن. سونىمەن قاتار وندا بىرنەشە ءبولىم بار, بولاشاقتا ولاردا عيماراتقا كىمدەر قىزمەت كورسەتەتىنى: پيك, ەلەكتريكتەر, سانتەحنيكتەر تۋرالى مالىمەتتەر ورنالاستىرىلادى. سول جەردەن اتالمىش ۇيگە قاي مەكەمەلەردىڭ قىزمەت كورسەتەتىنىن بىلۋگە بولادى: ەمحانا, بالاباقشا, مەكتەپ جانە ت.ب. بۇل اقپاراتتاردى ساۋلەت بولىمىمەن كەلىسكەننەن سوڭ پيك وكىلدەرى تولتىرىپ وتىرادى.
بولاشاقتا وكتيابر اۋدانىندا دا ءدال وسىنداي 2 326 جاڭا ماڭدايشا ورناتىلماق. ولاردىڭ 2090-ى تۇرعىن ۇيلەردە, 236-سى مەملەكەتىك مەكەمەلەر مەن شاعىن جانە ورتا بيزنەس نىساندارىندا ورناتىلادى. ول ءۇشىن 17 465 000 تەڭگە جۇمسالماق.
ميراس اسان,
«ەگەمەن قازاقستان»
قاراعاندى وبلىسى
