كۇن تارتىبىندەگى «كۇزگى جيىن تەرىم جۇمىستارىنىڭ اياقتالۋى جانە اۋىل شارۋاشىلىعى سالاسى بويىنشا 2017 جىلعا بەلگىلەنگەن ينديكاتورلارعا قول جەتكىزۋ تۋرالى» وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ بايانداما جاسادى. ونىڭ ايتۋىنشا, بيىل وڭىردە ەگىستىك كولەمى 29 مىڭ 300 گەكتارعا ارتقانىمەن, جالپى ءداندى داقىلدار بويىنشا ءونىم الۋ 1 گەكتاردان 24,3 تسەنتنەردەن 22,8 تسەنتنەرگە كەمىگەن. سونداي-اق, بيىل ماقتا القابىنىڭ دا كولەمى 25 مىڭ گەكتارعا ارتىق ەگىلگەنىمەن, وتكەن جىلدان ءار گەكتاردان ءونىم الۋ 2,6 تسەنتنەرگە ازايعان. ماماندار مۇنىڭ سەبەبىن ەگىستىك كولەمىنىڭ ارتىپ, زيانكەستەردىڭ كوبەيىپ كەتۋىمەن بايلانىستىرادى.
«بيىل ماقتادان بولەك, ماساقتى داقىلداردىڭ ءتۇسىمى مەن الىنعان ءونىمى بىلتىرعى جىلمەن سالىستىرعان ازايعانىن بايقاپ وتىرمىز. مىسالى, 2016 جىلى ءار گەكتاردان 20,2 تسەنتنەر ماساقتى ءداندى داقىلدارى الىنعان بولسا, بيىل ءار گەكتاردان 18,3 تسەنتنەر ءونىم الىندى. ماقتارال, سوزاق اۋداندارى جانە تۇركىستان, كەنتاۋ قالالارىنان باسقا بارلىق اۋدانداردا ءونىم الۋ كورسەتكىشتەرى ازايىپ وتىر», - دەدى سەرىك وردابەك ۇلى.
بيىل وڭتۇستىك كوكونىس پەن باقشا ونىمدەرى وندىرۋدە جاقسى كورسەتكىشتەرگە قول جەتكىزگەن. جاڭا باعىت رەتىندە جاڭعاق پەن بادامشا ەگۋ جۇمىستارى دا قارقىن الىپ كەلەدى. الداعى جىلى اۋىل شارۋاشىلىعى داقىلدارى 7 مىڭ گەكتارعا ارتىپ, 825 مىڭ گەكتارعا ورنالاستىرىلادى دەگەن بولجام بار. ونىڭ ىشىندە ينتەنسيۆتى باۋلار 804 گەكتارعا, جاڭعاق شارۋاشىلىعى قوسىمشا 500 گەكتارعا ەگىلەدى دەپ جوسپارلانۋدا. الداعى جوسپارلاردى بۇگىننەن باستاپ پىسىقتاۋدى ەسكەرتكەن ءوڭىر باسشىسى ەگىستىك كولەمىن ارتتىرىپ قانا قويماي, ءونىم ساپاسى مەن كولەمىن ۇلعايتۋعا دا ءمان بەرۋدى تاپسىردى.
كەلەسى جىلى وبلىستا 220 گەكتارعا جىلىجايلار سالىنىپ, جالپى كولەمى 1514 گەكتارعا جەتكىزىلمەك. سونداي-اق, 13,8 مىڭ گەكتار سۋارمالى جەر جاڭادان اينالىمعا قوسىلاتىن بولادى. ال, تامشىلاتىپ سۋرارۋ ءادىسى 8,1 مىڭ گەكتارعا ەنگىزىلىپ, جالپى كولەمى 66, 6 مىڭ گەكتارعا ۇلعايماق.
