مەرەيلى مەرەيتوي اياسىندا ءبىلىم ورداسى «جۇلدىزدى 30 كۇن» اتتى قوعامدىق-مادەني ءىس-شارالاردى ۇيىمداستىرۋعا مۇرىندىق بولىپ وتىر. قاراشا ايىنىڭ العاشقى كۇنىنەن باستاۋ العان شارالار ايدىڭ سوڭىنا دەيىن جالعاسىن تاپپاق. شارانىڭ العاشقى اپتاسى سپورت كۇندەرىنە ارنالىپ, جەرگىلىكتى جانە رەسپۋبليكالىق باق وكىلدەرىنە ۋنيۆەرسيتەتتىڭ سپورتتىق جارىستارى, ناتيجەلەرى جانە سپورت سەكتسيالارى تانىستىرىلدى. ەستەرىڭىزگە سالا كەتەيىك, وليمپيادانىڭ ەكى دۇركىن چەمپيونى يليا يلين, حالىقارالىق دارەجەدەگى زىلتەمىرشى الماس وتەشوۆ, بوكسشى قامشىبەك قوڭقاباەۆ, 2016 جىلعى ريو وليمپياداسىنىڭ قولا جۇلدەگەرى الەكساندر زايچيكوۆ جانە وزگە داڭقتى سپورتشىلار قورقىت اتا ۋنيۆەرسيتەتىنىڭ تۇلەكتەرى. بۇدان بولەك, «80 جىلدىققا 80 مينۋتتىق جاتتىعۋ» تاقىرىبىندا ۋنيۆەرسيتەتتىڭ پروفەسسور-وقىتۋشىلارى مەن ستۋدەنتتەرىنىڭ سەنبىلىك سەرگىتۋ ءساتى ءوتتى.
ەلباسىنىڭ «رۋحاني جاڭعىرۋ: بولاشاققا باعدار» باعدارلاماسى دا ۋنيۆەرسيتەت شارالارىنان تىس قالعان جوق. ۋنيۆەرسيتەتتىڭ عىلىمي-تەحنيكالىق كىتاپحاناسىندا «رۋحاني جاڭعىرۋ – بولاشاققا سەنىم» تاقىرىبىندا كىتاپتار كورمەسى ءوتتى. سونداي-اق, «مادەني مۇرا – رۋحاني قۇندىلىق» تاقىرىبىندا «ارحەولوگيا جانە ەتنوگرافيا» عىلىمي-زەرتتەۋ ورتالىعىنىڭ جۇمىسى ۋنيۆەرسيتەت ستۋدەنتتەرى مەن جەرگىلىكتى باق وكىلدەرىنە تانىستىرىلدى. ىرگەلى وقۋ ورداسىنىڭ ارداگەر-ۇستازدارىمەن دە كەزدەسۋ ۇيىمداستىرىلىپ, جاستارعا ۇلگى-ونەگە جيىنى كورسەتىلدى.
الدا اكادەميك ا.د.تايمانوۆتىڭ 100 جىلدىعىنا ارنالعان «قازىرگى زامانعى ماتەماتيكا: پروبلەمالارى جانە قولدانىستارى» اتتى II حالىقارالىق عىلىمي تايمانوۆ وقۋلارىنىڭ پلەنارلىق ءماجىلىسى, ۋنيۆەرسيتەتتىڭ جۇلدىزدى تۇلەكتەرىمەن كەزدەسۋ جانە وزگە دە ماڭىزدى ءىس-شارالار جالعاسىن تابادى.
ەرجان بايتىلەس,
«ەگەمەن قازاقستان»
قىزىلوردا
