ءداستۇرلى سىيلىققا Web of Science Core Collection رەسۋرسىندا 2014-2016 جىلدارى عىلىمي ماقالالار جاريالاپ, جوعارى سىلتەمەلىك كورسەتكىشكە يە بولعان وتاندىق عالىمدار قول جەتكىزەدى.
ايتۋلى شاراعا ەلىمىزدەگى ءبىلىم, ساياسات جانە ەكونوميكا سالاسىندا ەڭبەك ەتىپ جۇرگەن بەدەلدى تۇلعالار قاتىستى. شارانى اشقان «ۇلتتىق مەملەكەتتىك عىلىمي-تەحنيكالىق ساراپتاما ورتالىعى» اق پرەزيدەنتى ءادىل ىبىراەۆ: بۇگىندە عالامدىق زاماناۋي دامۋ ءۇردىسى جاھاندانۋ مەن ىنتىماقتاستىققا نەگىزدەلەگەنى ايان. مەملەكەت باسشىسى نۇرسۇلتان نازارباەۆ وسىدان التى جىل بۇرىن وتاندىق عىلىمدى دامىتۋ ءۇشىن دۇنيە جۇزىندەگى بەدەلى مىقتى عىلىمي مالىمەتتەر قورىنا قولجەتىمدىلىكتى ارتتىرۋدىڭ ماڭىزىن اتاپ وتكەنىن بىلەسىزدەر. قازىر بۇل باعىتتاعى جۇمىستار وڭ ناتيجە بەرىپ, قازاقستان عىلىمى الەمدىك عىلىمي قوعامداستىقپەن قويان-قولتىق ارالاسۋىنا ىقپالى ايتارلىقتاي ارتتى. عالامدىق ماڭىزى جوعارى سونداي مالىمەتتەر قورىنىڭ ءبىرى – Clarivate Analytics كومپانياسى. اتالمىش عىلىمي مالىمەتتەر قورىنىڭ ساراپتامالىق, عىلىمي قىزمەتتىڭ نەگىزگى ينديكاتورلارىن جانە عىلىم سالاسىنداعى الەمدىك ۇردىستەردى انىقتاۋدا ماڭىزدى ءرول اتقارادى. بۇگىندە «عىلىم كوشباسشىسى- 2017» بايقاۋىنىڭ ۇيىمداستىرىلۋى ىنتىماقتاستىقتىڭ جەمىسى دەپ ەسەپتەيمىن. ماقالالارى جوعارى سىلتەمەگە يە بولىپ, وتاندىق عىلىمنىڭ ورگە باسۋىنا ەڭبەك سىڭىرگەن عالىمداردى شىن جۇرەكتەن قۇتتىقتايمىن!» دەدى.
عالىمداردىڭ ەڭبەكتەرىنىڭ ەلەنۋىنە سەپتىگى جوعارى سىيلىق ەكى اتالىم بويىنشا بەرىلەدى. بۇل – «قازاقستانداعى ۇزدىك عىلىمي باسىلىم» جانە «شەتەلدىڭ اۆتورلارىنسىز عىلىمي ماقالا جاريالاپ, جوعارى سىلتەمەگە يە بولعان قازاقستاندىق عالىم» بولىپ جىكتەلەدى. ءبىرىنشى اتالىم بويىنشا Emerging Sources Citation Index (Clarivate Analytics) يندەكسىنە يە بولعان قازاقستاندىق عىلىمي جۋرنالدار ماراپاتتالادى. ال «شەتەل اۆتورلارىنسىز عىلىمي ماقالا جاريالاپ, جوعارى سىلتەمەگە يە بولعان قازاقستاندىق عالىم» اتالىمى بويىنشا فيزيكا, تەحنيكا, مەديتسينا, بيولوگيا جانە اگرارلى عىلىم سالاسىندا ەڭبەك ەتىپ جۇرگەن عالىمدار ماراپاتتالادى.
حالىقارالىق Clarivate Analitics كومپانياسىنىڭ Emerging Sources Citation Index يندەكسىنە بيىل قازاقستاننىڭ التى عىلىمي جۋرنالى ىلىگىپ, ۇزدىك عىلىمي باسىلىمدار دەگەن اتاققا يە بولدى. وسىلايشا, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «Eurasian Mathematical Journal», جانۋ ماسەلەلەرى ينستيتۋتىنىڭ «Eurasian Chemico-Technological Journal» باسىلىمدارى ارناۋلى ديپلوممەن ماراپاتتالدى. سونىمەن قاتار ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ءۇش بىردەي عىلىمي جۋرنالى – «Bulletin of the University of Karaganda – Chemistry», «Bulletin of the University of Karaganda – Physics», «Bulletin of the University of Karaganda – Mathematics» جانە «نازارباەۆ ۋنيۆەرسيتەتىنىڭ» Central Asian Journal of Global Health عىلىمي باسىلىمى ۇزدىكتەر قاتارىنا ىلىكتى.
ال «شەتەل اۆتورلارىنسىز عىلىمي ماقالا جاريالاپ, جوعارى سىلتەمەگە يە بولعان قازاقستاندىق عالىم» اتالىمى بويىنشا فيزيكا سالاسىنان ءال-فارابي اتىنداعى قازۇۋ مەن قازاق-بريتان تەحنيكالىق ۋنيۆەرسيتەتىنىڭ ءبىر توپ عالىمدارى تىلەكقابىل رامازانوۆ, عابدۋللين ماراتبەك, توميريس يسماعامبەتوۆا, ماتەماتيكا جانە ماتەماتيكالىق مودەلدەۋ ينستيتۋتىنىڭ عالىمدارى ماحمۋد سادىبەكوۆ, بەرىكبول تورەبەك, حيميا سالاسى بويىنشا د.سوكولسكي اتىنداعى وتىن, كاتاليز جانە ەلەكتروحيميا ينستيتۋتىنىڭ عالىمدارى شولپان يتقۇلوۆا,ەرجان نۇرماقانوۆ ماراپاتتالدى. حيميا سالاسى بويىنشا ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ عالىمدارى – تيمۋر داۋلەتباقوۆ پەن نۇرلان شوقىباەۆتىڭ عىلىمي جۇمىستارى جوعارى سىلتەمەگە يە بولعان. مەديتسينا سالاسىنان «نازارباەۆ ۋنيۆەرسيتەتىنىڭ» عالىمدارى بولات سۇلتانقۇلوۆ تيمۋر ساليەۆ, دەنيس بۋلانين ايتۋلى سىيلىقپەن ماراپاتتالدى.
ال بيولوگيا جانە ارگارلىق سالاسى بويىنشا قازاق ورمان شارۋاشىلىعى جانە اگروورمان مەليوراتسياسى عىلىمي زەرتتەۋ ينستيتۋتى مەن «فيتوحيميا» حالىقارالىق عىلىمي-وندىرىستىك حولدينگىنىڭ عالىمدارى بولات مۇقانوۆ, ۆيتالي كيريللوۆ, ماريا سەرافيموۆيچ, گايانە اتاجانوۆانىڭ مەرەيى ارتتى.
ءدال وسى بيولوگيا جانە اگرارلىق سالا بويىنشا بيولوگيالىق قاۋىپسىزدىك ماسەلەلەرى عىلىمي زەرتتەۋ ينستيتۋتىنىڭ ءبىر توپ عالىمدارى ابىلاي سانسىزباي, بولات ەسپەمبەتوۆ, نۇريكا اسانجانوۆا, جايلاۋباي قىدىرباەۆ, نادەجدا زينينا عىلىم كوشباسشىسى اتاندى. سول سياقتى گۋمانيتارلىق-الەۋمەتتىك عىلىمدار سالاسى بويىنشا قازاق مەملەكەتتىك زاڭ ۋنيۆەرسيتەتىنىڭ عالىمى عالىمجان سەيلوۆ ارناۋلى سىيلىققا يە بولدى.
ايناش ەسالي,
«ەگەمەن قازاقستان»
