ۆەلوسيپەدپەن الەمدى شارلاپ جۇرگەن فرانتسۋز رومان پيشار قاراعاندىعا كەلدى. جول جۇرۋگە ونىڭ 14 ايى كەتكەن. وسى ۋاقىت ارالىعىندا ول 23 ەلدە بولىپتى.
– مەن فرانتسيادا ينجەنەر بولىپ جۇمىس ىستەيمىن, – دەيدى ول. – بىزدە ءار ادام جۇمىستان ءبىر جىلعا ءۇزىلىس الا الادى جانە سول ۋاقىتتا ءوزى قالاعان ىسپەن اينالىسىپ, ۋاقىتىندا قايتا جۇمىسىنا كەلەدى. مەن دە سونداي ءۇزىلىس الىپ, الدىما موڭعولياعا دەيىن جەتەمىن دەگەن ماقسات قويعان ەدىم. الايدا, وعان ۇلگەرمەيمىن, سەبەبى كۇن سۋىتتى. مەنىڭشە استاناعا دەيىن بارامىن, ال ول جاقتان فرانتسياعا ۇشامىن. اعىمداعى جىلدىڭ 1 جەلتوقسانىندا جۇمىسقا شىعۋىم كەرەك.
روماننىڭ ايتۋىنشا, ول ءوز ەلىندە مۇلدەم اۆتوكولىككە وتىرمايدى ەكەن, ونىڭ ويىنشا كولىك ەكولوگياعا زيان كەلتىرەدى جانە قىزمەتى تىم قىمبات. جۇمىسى مەن جەكە كەزدەسۋلەرىنە ۆەلوسيپەدپەن بارادى. سول سەبەپتى ساياحات ءۇشىن دە كولىكتىڭ وسى ءتۇرىن تاڭداعان.
بارلىق ءجۇرىپ وتكەن جولىندا رومان ۆەلوسيپەدتەن باسقا ەش كولىككە وتىرماعان. ول شاتىرلاردا قونىپ, تاماقتى وتتا دايىنداعان, قول شام مەن ۇيالى تەلەفونىن كىشكەنە كۇن باتارەياسىنىڭ كومەگىمەن قۋاتتاپ وتىرعان.
ساياحاتى بارىسىندا ول يتاليا, شۆەيتساريا, تۇركيا, يران, گرۋزيا, وزبەكستان, تۇرىكمەنستان, تاجىكستان جانە باسقا ەلدەردە بولدى. رومان اتاپ وتكەندەي, جولدا شاعىن اپاتتان باسقا ەشقانداي وقىس وقيعا بولماعان. اپات سالدارىنان دوڭگەلەگى جارىلىپ قالىپتى.
– مەن يراندا ەكى اي بولدىم, – دەيدى ساياحاتشى. – ول جەردەن وزىمە دوستار تاپتىم. بارلىعى ماعان ول ەلگە بارۋ قاۋىپتى, سەن قاتەلىك جاسايسىڭ دەگەن-ءدى. بىراق ناتيجەسىندە ولاي بولماي شىقتى. مەن وندا بولعانىمدا ول سوزدەردىڭ جالعان ەكەنىن ءتۇسىندىم. يران – مەن بولعان ەلدەردىڭ ىشىندەگى ەڭ سۇيىكتىسى.
رومان قازاقستاندا كىدىرەم دەپ ويلاماعان. الايدا قاراعاندى ماڭىندا 200 شاقىرىم جەردە ورنالاسقان اۆتوكەشەنگە كىرگەننەن سوڭ جوسپارى وزگەرگەن.
– سول كۇنى كەشكىلىك مەن اۆتوكەشەنگە باردىم, – دەپ باستادى اڭگىمەسىن تۇراقتىڭ يەسى عازيز ىسقاق. – روماندى كورىپ, ونىمەن سويلەسىپ كەتتىم. ول شۋدان قاراعاندىعا دەيىن كەلىپ قازاقستان تۋرالى ەشتەڭە بىلمەگەن. مەن نامىستاندىم. مەن وعان ءبىزدىڭ قازاقستاندىق قوناقجايلىعىمىزدى كورسەتۋدى شەشتىم. مەنىڭ اۆتوكەشەنىمدە ساۋنا بار, ءبىز سوندا باردىق, كەشكى اس ىشتىك. ءدال وسى ۋاقىتتا ءبىزدىڭ كەشەندە حالىق اسپاپتار ءانسامبلى بولعان-دى. مەن ولاردان رومان ءۇشىن اسپاپتارىندا ويناپ بەرۋلەرىن سۇرادىم. وعان دومبىرانىڭ ءۇنى ەرەكشە ۇنادى. ول ءتىپتى ءوزى ويناپ كورمەك بولدى.
قاراعاندىدا روماندى عازيزدىڭ تۋىستارى كۇتىپ الىپ, ءبىراز قالۋىن سۇراپ, ەت اسىپ, قالانى ارالاتقان.
روماننىڭ سوزىنشە, وسى ساياحاتتان سوڭ ونىڭ الەمگە دەگەن كوزقاراسى وزگەرگەن, ءتىپتى ەلىنە ورالعان سوڭ ءوزىنىڭ ءومىر ءستيلىن وزگەرتۋى دە مۇمكىن.
– مەن جالپى ادامدارعا قاتىستى پەسسيميستتىك ويدا بولدىم, – دەيدى ول. – ادامدار وسىنشا مەيىرىمدى جانە جاقسى دەپ ويلامادىم. بۇل ساياحات مەنىڭ ادامدارعا دەگەن پىكىرىمدى وزگەرتتى.
ميراس اسان,
«ەگەمەن قازاقستان»
قاراعاندى وبلىسى
