«جۇرە بەرسەڭ, كورە بەرەسىڭ», دەيدى حالقىمىز. «ومىردە نە بولمايدى», دەپ جاتاتىنىمىز تاعى بار. ايتقىمىز كەلگەنى – وزدەرىن ونەرگە ءبىرتابان جاقىنبىز دەپ سانايتىن كەيبىر اقىنسىماق پىسىقايلاردىڭ ادامنىڭ ويىنا كەلمەيتىن تاسىلدەردى شەبەر قولدانىپ, وڭاي ولجا تابۋدىڭ جولىن يگەرىپ العاندىعى. ونىسىن ەرسى كورىپ تە جاتقان ولار جوق.
وتكەندە ءبىر تانىسىمىزدان مىناداي اڭگىمە ەستىدىك. ءبىر توپ جەرلەستەر تۋريستىك ساپارعا شىعادى. ىشتەرىندە ءوزىن اقىنمىن دەپ ەسەپتەيتىن بىرەۋ بولسا كەرەك. قىسقاسى الگى اقىن ساپارلاس سەرىكتەرىنىڭ بىرنەشەۋىنە وزىنشە ماداق ولەڭ ارناپ, ونىسىنا اقى دامەتكەن كورىنەدى. ءوزىن ماقتاعاندى كىم جەك كورسىن, ارناۋ ولەڭنىڭ كەيىپكەرلەرى دە قارىزدار بولىپ قالماي, تەڭگەلەرىن ۇسىنىپتى.
مىنا سايكەستىكتى قاراڭىز: ءدال وسىنداي جايعا كۋا بولامىز دەپ ءسىرا ويلاپپىز با؟ الايدا, ومىردە ءبارى دە بولا بەرەدى ەكەن-اۋ...
وبلىس ورتالىعىنداعى شيپاجايدىڭ بىرىندە ەم-دوم الىپ, دەمالىپ جاتقانبىز. ادەتتەگىدەي اڭگىمەلەسىپ وتىرعانىمىزدا تىنىعۋشىلاردىڭ ءبىرى: «ارامىزدا ءبىر اقىن جاتىر ەكەن. ازاننان كەشكە دەيىن بولمەسىنەن شىقپايدى, قاجەت ەتكەن ادام بولسا, اقىسىنا ارناۋ ولەڭ جازىپ بەرەتىن كورىنەدى», دەپ سوڭعى جاڭالىقتىڭ شەتىن شىعاردى.
كۇتكەن وقيعا دا كوپ كۇتتىرمەدى. «ىزدەگەنگە – سۇراعان» دەگەندەي, ارادا شامامەن ۋاقىت وتكەندە, ءتۇس الەتىندە دەمالۋشىلاردىڭ ورتاسىنا اقىنىمىزدىڭ ءوزى كەلە قالماسى بار ما. بىردەن جينالعانداردىڭ نازارىن اۋدارىپ الدى دا, الدەكىمگە جازعان ارناۋ ولەڭىن وقي جونەلدى. ولەڭى مۇنداي ۇزاق بولار ما, ون بەس-جيىرما شۋماقتىڭ توڭىرەگىندە بولىپ قالار.
تىنىعۋشىلارعا دا قىزىق كەرەك: «وي ءپالى, جارايسىڭ!», نەگىزىندە وزىڭدە بىردەڭە بار عوي, ايتپەسە جايدان-جاي ادام ولەڭ شىعارا الۋشى ما ەدى» دەسىپ, وزدەرىنشە اقىندى كوتەرمەلەپ, قولپاشتاپ جاتتى. تەك ءبىر كوكەمىز عانا: «شىراعىم, مىناۋىڭ پوەما بولىپ كەتتى مە, قالاي؟ تىم ۇزاق ەكەن», دەپ قالعانى. ونىسىنا اقىن ەلەمەگەندەي قالىپ تانىتىپ, كەزەكتى دۇنيەسىن كەيىپكەرىنە تاپسىرىپ جاتتى.
كەيىننەن اقىنمەن كەزدەسىپ تە قالىپ جۇردىك. ارناۋ ولەڭ جازۋدى كوپتەن كاسىپكە اينالدىرعان سەكىلدى. ونىسىن ءوزى سوكەت كورمەيتىندەي. نەسى بار, «قازانشىنىڭ ەركى بار, قايدان قۇلاق شىعارسا» دەگەن عوي.
ءيا, اعايىن, ومىردە نە بولمايدى. الدا-جالدا ارناۋ ولەڭ جازعىش اقىندى كورە قالساڭىز, استە تاڭ قالماي-اق قويىڭىز...
كارىباي امزە ۇلى,
زەينەتكەر
وڭتۇستىك قازاقستان وبلىسى,
سوزاق اۋدانى
