«قازاقستاننىڭ ۇزدىك ينجەنەرى» اتالىمى بويىنشا ءوندىرىستىڭ جەتەكشى عالىمدارى مەن ينجەنەرلەرىن, ءىرى كومپانيالار مەن ۇيىمداردىڭ جانە عىلىمي-زەرتتەۋ ينستيتۋتتاردىڭ قىزمەتكەرلەرى اراسىنداعى ناعىز ماماندى انىقتايتىن بايقاۋ جىل سايىن ۇيىمداستىرىلادى. سونداي-اق, ۇلتتىق ينجەنەرلىك اكادەميا «قازاقستاننىڭ قۇرمەتتى ينجەنەرى» اتاعىن بەرۋدى دە ءداستۇرلى تۇردە جالعاستىرىپ كەلەدى. بيىل بۇل ماراپاتقا بەلگىلى قوعام قايراتكەرلەرى نىعمەتجان ەسەنعارين مەن م.ەسەنوۆ لايىق دەپ تابىلىپ, اكادەميانىڭ ارنايى ديپلومى مەن ءتوس بەلگىسى تاپسىرىلدى.
ال «قازاقستاننىڭ ۇزدىك ينجەنەرى» ماراپاتى استانا قالاسى بويىنشا ينفراقۇرىلىمدىق قايتا قۇرۋدىڭ ءىرى يننوۆاتسيالىق باعدارلامالارىن ىسكە اسىرۋعا ۇلەس قوسقانى ءۇشىن سەرگەي حوروشۋن, مەديتسيناعا جانە ەلەكترونيكاعا نانوقۇرىلىمدى ماتەريالداردى ازىرلەپ, ەنگىزگەنى ءۇشىن ارتەم كوزلوۆسكي, الماتى وبلىسىندا جۇگەرىنى قايتا تەرەڭدەتە وڭدەۋ بويىنشا كاسىپورىندارىنىڭ يننوۆاتسيالىق كەشەنىن تۇرعىزعانى ءۇشىن زاكيرجان كۋزيەۆ, «الاتاۋ جارىق كومپانياسى» اق جەلىلەرىندە ەنەرگيا تيىمدىلىك ادىستەرىن جاساۋ جانە ەنگىزۋگە قول جەتكىزگەنى ءۇشىن التاي ابدراحمانوۆ, KazSTSat عارىش اپپاراتىن ازىرلەۋگە قاتىسقانى ءۇشىن ارمان بەكەمباەۆ, قازاقستاندا العاش رەت مۇناي قۇبىرلارىنا ءۆينتتى سورعىلاردى جانە شىنى پلاستيكالىق قۇبىرلاردى ورناتقانى ءۇشىن نىسانباي قۋانتاەۆ, فوسفور ونەركاسىبى كاسىپورىندارىندا پەش گازىن پايدالانۋ بويىنشا يننوۆاتسيالىق تەحنولوگيالاردى ەنگىزگەنى ءۇشىن لەونيد فرانگۋليدي جانە سەرگەي اساينوۆ «بوگاتىر كومىر» شاحتالارىندا اۋا ءبولۋ تەحنولوگياسىنا يننوۆاتسيالىق ادىستەر ەنگىزگەنى ءۇشىن بەرىلدى.
قالماحانبەت مۇقامەتقالي,
«ەگەمەن قازاقستان»
