كابۋلعا ساپارى بارىسىندا كەڭەس وكىلدەرى اۋعانستان پرەزيدەنتى اشراف گانيمەن, اتقارۋشى بيلىكتىڭ باسشىسى ابدۋللا ابدۋللامەن, الەمدىك جوعارعى كەڭەستىڭ توراعاسى موحامماد حاليليمەن جانە ەلدەگى قاۋىپسىزدىكتى قامتاماسىز ەتۋگە جانە تەرروريزمدى قارجىلاندىرۋعا قارسى جاۋاپتى بىرقاتار ۆەدومستۆو باسشىلارىمەن كەزدەستى.
باسقوسۋدا اۋعانستان باسشىلىعى دەلەگاتسياعا ەلدەگى جاعدايدى تانىستىرىپ, ۇلتتىق تاتۋلىقتى دامىتۋ, تەرروريزممەن كۇرەس جانە بەيبىتشىلىكتى قامتاماسىز ەتۋ جونىندە اتقارىلعان جۇمىستاردى كورسەتتى. كابۋل بيلىگى قاۋىپسىزدىك كەڭەسى سانكتسيالارىنىڭ ءتيىمدى تەتىكتەرىن پايدالانۋ ارقىلى اۋعانستانداعى شيەلەنىستى بەيبىت جولمەن شەشۋگە نيەت ءبىلدىردى.
Gandhara راديوسى اتقارۋشى بيلىكتىڭ باسشىسى ابدۋللا ابدۋللانىڭ قاۋىپسىزدىك كەڭەسى وكىلدەرىن «تاليبان» كوسەمدەرىنە سانكتسيا سالۋعا شاقىرعانىن حابارلادى. اقپارات اگەنتتىگىنىڭ ايتۋىنشا, ا.ابدۋللا مۇنداي مالىمدەمەنى بۇۇ قاۋىپسىزدىك كەڭەسى سانكتسيالار جونىندەگى كوميتەتىنىڭ توراعاسى ق.وماروۆپەن كەزدەسكەننەن كەيىن جاساعان. اتقارۋشى بيلىك باسشىسى «تاليبان» لاڭكەستەرىن «قاتىگەز جانالعىش» دەپ سيپاتتاپ, «مەملەكەتتىڭ قيراۋىنىڭ باستى سەبەپكەرلەرى» ەكەنىن جەتكىزگەن. ونىڭ پىكىرىنشە, حايباتۋللا احۋندزادا باستاعان بىرقاتار «تاليبان» مۇشەلەرى تەررورشىلار تىزىمىنە كىرۋى كەرەك.
اۋعانستان تاراپىنىڭ ق.وماروۆ باستاعان دەلەگاتسياعا قولقا سالۋى بەكەر ەمەس. بۇۇ قاۋىپسىزدىك كەڭەسى الەمدەگى بەيبىتشىلىك ماسەلەسىن شەشۋدەن بولەك, حالىقارالىق تەرروريستەر تىزىمىنە ەنەتىندەردى انىقتاپ, ولارعا سانكتسيا سالىپ وتىرادى. كەڭەس كوميتەتتەرىنىڭ 1267 جانە 1988 سانكتسيالار رەجىمى لاڭكەستىك قۇرىلىمداردىڭ قىزمەتىنە بايلانىستى جەكە, زاڭدى تۇلعالار جانە ۇيىمدارعا قاتىستى جول ءجۇرۋ, اكتيۆتەرگە تىيىم سالۋ, سونداي-اق قارۋ-جاراق ەمبارگوسىنا تىيىم سالۋدى كوزدەيدى.
ونىڭ ۇستىنە, جەكە جانە زاڭدى تۇلعالار مەن ۇيىمداردى تەرروريست دەپ تانۋ ءۇشىن قاۋىپسىزدىك كەڭەسى قۇرامىنداعى مەملەكەتتەردىڭ كەلىسىمى كەرەك. الدا-جالدا كەڭەستىڭ تۇراقتى مۇشەسى وعان ۆەتو قويسا, ولار تەرروريست رەتىندە تانىلمايدى. ماسەلەن, تاياۋدا اقش, فرانتسيا جانە ۇلىبريتانيا «دجايش موحاممەد» لاڭكەستىك توبىنىڭ باسشىسى ازحار ماسۋدتى حالىقارالىق تەررورشى رەتىندە تانۋعا ۇسىنىس بىلدىرگەن. الايدا قىتاي كەڭەستىڭ تۇراقتى مۇشەسى رەتىندە وعان ۆەتو قويدى. ناتيجەسىندە ۇندىستانداعى بىرقاتار تەررورلىق ارەكەتتى ۇيىمداستىردى دەپ ەسەپتەلەتىن ازحار ماسۋد تاعى دا «قارا تىزىمگە» ەنبەي قالدى.
اۋعانستان ماسەلەسى – قاۋىپسىزدىك كەڭەس قۇرامىنداعى قازاقستاننىڭ باسىمدىق بەرەتىن باعىتتاردىڭ ءبىرى. جىل باسىندا ەلباسى ن.نازارباەۆ بۇۇ قاۋىپسىزدىك كەڭەسىنە جولداعان ساياسي ۇندەۋىندە اۋعانستانداعى جاعداي جانە ورتالىق ازياداعى بەيبىتشىلىك, قاۋىپسىزدىك پەن دامۋدى نىعايتۋ شارالارى بويىنشا اۋقىمدى, تەڭدەستىرىلگەن, مازمۇندى جانە ناتيجەلى تالقىلاۋ ۇيىمداستىرۋعا نيەتتى ەكەنىن مالىمدەگەن بولاتىن. وسىعان سايكەس, ەلىمىز قاۋىپسىزدىك كەڭەسىنىڭ تۇراقتى ەمەس مۇشەسى رەتىندە يليم (دايش), ء«ال-كايدا» جانە «تاليبان» قوزعالىسى جونىندەگى 1988 كوميتەتتىڭ توراعاسى رەتىندە ماقساتتى جۇمىس اتقارىپ كەلەدى.
اۋعانستان پرەزيدەنتى ا.گانيمەن كەزدەسۋ بارىسىندا دا بىرقاتار ماسەلەلەر تالقىلاندى. ەل باسشىسى تۇراقتىلىقتى نىعايتۋ ءۇشىن قاۋىپسىزدىك پەن دامۋ ماسەلەلەرى اراسىنداعى بەرىك بايلانىس, سونداي-اق وڭىرلىك ىنتىماقتاستىقتىڭ ماڭىزدىلىعىن اتاپ ءوتتى. سونىمەن قاتار ول قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قازاقستانعا بۇۇ اياسىندا ايماقتىڭ جانە اۋعانستانداعى جاعدايدى رەتتەۋ ماسەلەلەرىنە قولداۋ كورسەتكەنى ءۇشىن ريزاشىلىق ءبىلدىردى.
حالىقارالىق كۇن تارتىبىندەگى ماسەلەلەردى تالقىلاۋمەن قاتار, ا. گاني كابۋل مەن استانا اراسىنداعى ەكى جاقتى قاتىناستاردى جوعارى باعالادى جانە قازاقستان پرەزيدەنتى نۇرسۇلتان نازارباەۆقا اۋعانستانداعى بەيبىت دامۋ ماسەلەلەرىنە كوڭىل بولگەنى ءۇشىن العىس ايتتى.
اباي اسانكەلدى ۇلى,
«ەگەمەن قازاقستان»
