سونداي باستامالاردىڭ ءبىرى جانە بىرەگەيى, 2003 جىلدان بەرى استانادا جۇيەلى تۇردە ءوتىپ كەلە جاتقان الەمدىك جانە ءداستۇرلى دىندەر كوشباسشىلارىنىڭ سەزدەرى بۇگىنگى تاڭدا الەمدىك وركەنيەتتەر اراسىنداعى بەيبىت سۇحباتتى دامىتۋعا, قازاقستاننىڭ ءدىن جانە ۇلتارالىق قارىم-قاتىناستاردى نىعايتۋ باعىتىنداعى جيناقتاعان باي تاجىريبەسىن كەڭىنەن ناسيحاتتاۋعا زور مۇمكىندىكتەر بەرۋدە.
ەلوردادا بەس دۇركىن الەمدىك دىنارالىق فورۋمنىڭ جوعارى دارەجەدە ءوتۋى, حالىقارالىق قوعامداستىقتا جاڭاشا ءداستۇردى قالىپتاستىرىپ, قازاقستاندى الەمدىك ارەنادا سىندارلى وركەنيەت پەن مادەنيەتارالىق سۇحباتتىڭ باستاۋشىسى رەتىندە تانىتتى.
بۇگىنگى تاڭدا دىنارالىق كەلىسىم مەن سۇحباتتىڭ قازاقستاندىق ۇلگىسى جونىندە ناقتى دەرەكتەرمەن كەڭىنەن اڭگىمەلەۋگە بولادى. قازىرگى كەزدە حالىقارالىق ارەنادا وسىنداي برەند قالىپتاسىپ, ول كەڭىنەن قولدانىلۋدا. ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) مەن يسلام ىنتىماقتاستىعى ۇيىمىنا (يىۇ) جانە بۇۇ-نىڭ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋى, ءبىزدىڭ مەملەكەتىمىزدىڭ كونفەسسياارالىق كەلىسىم مەن ءدىني توزىمدىلىك ماسەلەسىندە جيناقتاعان باي تاجىريبەسى مەن قول جەتكىزگەن جەتىستىكتەرىنىڭ زاڭدى ناتيجەسى.
ءبىز جوعارىدا اتالعان بەدەلدى حالىقارالىق ۇيىمدارعا توراعالىق ەتۋ بارىسىندا وسى سالاداعى جيناقتالعان تاجىريبەمىزدى كەڭىنەن قولدانىپ, مەكەمەلەردىڭ قىزمەتىنە جاڭا قارقىن بەرىپ, ءبىرازدان بەرى شەشىمىن تاپپاي كەلە جاتقان ماسەلەلەر كۇن تارتىبىنە شىعارىلىپ, كەيبىرىنىڭ تۇبەگەيلى شەشىلۋىنە ىقپال ەتكەنىمىز بارشاعا بەلگىلى.
2010 جىلى ەقىۇ-دا توراعالىق ەتۋ بارىسىندا قازاقستان ۇيىم قىزمەتىنىڭ نەگىزگى قاۋىپسىزدىك جانە گۋمانيتارلىق باعىتتارى بويىنشا مۇشە ەلدەر اراسىنداعى بايلانىستاردى كەڭەيتۋگە تىرىسسا, 2011 جىلى يىۇ-عا توراعالىعى بارىسىندا ەقىۇ-داعى توراعالىق تاجىريبەسىن كەڭىنەن پايدالانا وتىرىپ, الەمدەگى جەتەكشى ەكى ۇيىمنىڭ مۇشە مەملەكەتتەرى اراسىنداعى ىنتىماقتاستىقتى نىعايتىپ, ولاردى زامان تالابىنا ساي جاڭا ساتىعا كوتەرۋگە ناقتى ءىس-قيمىلدار جاسادى.
الەمدىك جانە ءداستۇرلى دىندەر كوشباسشىلارىنىڭ V سەزىنە بۇۇ-نىڭ سول كەزدەگى باس حاتشىسى پان گي مۋن مەن بىرقاتار مەملەكەت باسشىلارىنىڭ جانە الەمنىڭ 42 ەلىنەن 80-نەن استام دەلەگاتسيانىڭ قاتىسۋى, ءوز كەزەگىندە فورۋمنىڭ الەمدىك وزەكتى ماسەلەلەردى تالقىلاۋداعى مىڭىزدىلىعىن كورسەتسە, ەكىنشى جاعىنان ونى حالىقارالىق ۇيىمدار مەن جاھان مەملەكەتتەرىنىڭ تولىقتاي مويىنداۋى دەپ بىلەمىز. سەزدىڭ ىزگىلىكتى يدەيالارى الەمدىك قوعامداستىقتا, ءدىني, سونداي-اق ساياسي توپتاردا كەڭ قولداۋ تاۋىپ وتىر. ولار الەمگە دىنارالىق قاتىناستار تۋرالى عاسىرلار بويى قالىپتاسقان قاساڭ قاعيدالاردى ەڭسەرۋگە, ءححى عاسىردا جاھاندىق تولەرانتتىلىق پەن ءوزارا تۇسىنىستىكتىڭ ءىس-قيمىل تانىتا الاتىن فورمۋلاسىن جاساۋعا مۇمكىندىك بەرەدى.
ەلىمىزدىڭ گەوگرافيالىق تۇرعىدا ءۇش ۇلى وركەنيەتتەر توعىسۋىندا ورنالاسۋى مەن مەملەكەتىمىزدىڭ حالىقتىڭ پوليەتنوستىق جانە پوليكونفەسسيالىق قۇرامىن ەسكەرە وتىرىپ ناتيجەلى جۇرگىزىلىپ كەلە جاتقان سالماقتى دا, ساليقالى ساياساتى, الداعى ۋاقىتتاردا ودان ءارى قاراي عالامدىق ينتەگراتور رەتىندە باستامالار كوتەرىپ, ناقتى ءىس-قيمىلدار جاساۋىنا مۇمكىندىكتەر بەرەرى ءسوزسىز. قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋى, مەملەكەتىمىزدىڭ الەمدىك قاۋىمداستىقپەن قارىم-قاتىناسىنىڭ لوگيكالىق جالعاسۋى بولىپ تابىلادى. ۇيىم قىزمەتىندە بۇگىنگى تاڭدا الەمدە ورىن العان ءدىني استارداعى قاراما-قايشىلىقتار مەن قاقتىعىستاردى شەشۋدە, ەلىمىزدىڭ باي تاجىريبەسى كەڭىنەن قولدانىلۋدا.
كەلەر جىلعا جوسپارلانعان الەمدىك جانە ءداستۇرلى دىندەر كوشباسشىلارىنىڭ ءVى سەزى قازاقستاننىڭ الەمدىك قوعامداستىقتاعى ماڭىزدى قادامدارىنىڭ ءبىرى بولماق.
نۇرلان سەيدىن,
ساياساتتانۋشى
