عىلىمي سەمينار بيىل توقسانعا كەلگەن ادەبيەتتانۋشى عالىمدارعا, سول عىلىمنىڭ كوكجيەگىن كەڭەيتىپ, كوسەگەسىن كوگەرتكەن, بۇگىندە ارامىزدا جۇرگەن سەرىك قيراباەۆ, وكىنىشكە قاراي دۇنيەدەن ءوتىپ كەتكەن زەينوللا قابدولوۆ, تۇرسىنبەك كاكىش ۇلى, نىعمەت عابدۋللين, ءمۇسىلىم بازارباەۆ, راحمانقۇل بەردىباي سىندى تارلان اكادەميكتەرگە ارنالدى. ۋنيۆەرسيتەت ۇستازدارى مەن ستۋدەنتتەر قاتىسقان القالى جيىندا وسى تۇلعالاردىڭ عىلىمي ەڭبەكتەرىمەن قاتار ادامگەرشىلىك قاسيەتتەرى, ۇلگى تۇتار قىرلارى جان-جاقتى قامتىلا باياندالىپ, عىلىمعا ۇلەس قوسۋ مەن كوپتىڭ مۇددەسى ءۇشىن جۇمىس ىستەۋدىڭ ماڭىزدىلىعى تۋرالى اسەرلى ەستەلىكتەر ايتىلدى.
فيلولوگيا عىلىمدارىنىڭ دوكتورى, اكادەميك سەيىت قاسقاباسوۆ ءباسپاسوز وكىلدەرىنە بەرگەن سۇحباتىندا وتكەن عاسىردىڭ 50-جىلدارى عىلىمعا كەلگەن وسى توپتىڭ قازىرگى قازاق ادەبيەتتانۋىنىڭ وسۋىنە, كاسىبي عىلىم رەتىندە قالىپتاسۋىنا زور ۇلەس قوسقانىن اتاپ ءوتتى. «وتكەن عاسىرداعى ساياسي وقيعالاردى وزدەرىڭىز جاقسى بىلەسىزدەر. اعا بۋىن عالىمدار سوتتى بولدى, قۋعىندالدى, جازىقسىز جاپا شەكتى. ينستيتۋتتاردا قازاق ادەبيەتىنەن ساباق بەرەتىن عالىمدار قالماعان كەزدەر دە بار. سول كەزدە وسى بۋىن جوقتىڭ ورنىن تولتىرىپ, ينستيتۋتتار مەن مەكتەپتەرگە ارنالعان وقۋلىقتار جازدى, عىلىممەن اينالىستى, شاكىرت تاربيەلەدى», دەدى ول.
جيىن بارىسىندا بايانداما جاساعان فيلولوگيا عىلىمدارىنىڭ دوكتورى, اكادەميك ديحان قامزابەك ۇلى سول تۇلعالاردىڭ كۇندەلىكتى ومىردە كوزىن كورگەن, تاعىلىمىن العان شاكىرت رەتىندە ارقايسىسىنا سيپاتتاما بەرىپ, ءبىرىنىڭ زيالىلىعىن, ءبىرىنىڭ شەشەندىگىن, تاعى ءبىرىنىڭ شاكىرتتەرى ءۇشىن ەرەكشە جان تولقىتار جاقسى قاسيەتتەرىن اڭگىمە وزەگىنە اينالدىردى.
عىلىمي سەميناردا «زەينوللا قابدولوۆ جانە قازىرگى ادەبيەت تەورياسى ماسەلەلەرى» دەگەن تاقىرىپتا فيلولوگيا عىلىمدارىنىڭ دوكتورى, پروفەسسور ايگۇل ۇسەن, «تۇرسىنبەك كاكىش ۇلى – قازاق ادەبيەتى سىنىنىڭ تاريحىن قالىپتاستىرۋشى» دەگەن تاقىرىپتا فيلولوگيا عىلىم دارىنىڭ دوكتورى, پروفەسسور ساعىمباي جۇماعۇلوۆ, «راحمانقۇل بەردىباي زەرتتەۋىندەگى قازاقتىڭ اۋىز ادەبيەتى ماسەلەلەرى» دەگەن تاقىرىپتا فيلولوگيا عىلىمدارىنىڭ كانديداتى, پروفەسسور ب.قورعانبەك, «نىعمەت عابدۋللين جانە قازاق ادەبيەتىندەگى جاڭا ادامدى بەينەلەۋ ماسەلەلەرى» دەگەن تاقىرىپتا فيلولوگيا عالىمدارىنىڭ كانديداتى, دوتسەنت گۇلداريا ەرجانوۆا سىندى عالىمدار بايانداما جاساپ, جوعارىدا اتتارى اتالعان تۇلعالاردىڭ عىلىمي ەڭبەكتەرى مەن ادامگەرشىلىك كەلبەتتەرىن جان-جاقتى سيپاتتاپ, ستۋدەنتتەر ءۇشىن ءتالىم-تاعىلىمى مول جيىننىڭ وتۋىنە اتسالىستى.
ايگۇل سەيىل,
«ەگەمەن قازاقستان»
