بۇل ورايدا وڭىرىمىزدە كوپتەگەن يگى شارالار جۇزەگە اسۋدا. «تۋعان جەرگە تۋىڭدى تىك!» اتتى جاستار فورۋمى, قاراساي اۋدانىنداعى «باتىر بابالار» مەموريالدى كەشەنىنىڭ اشىلۋى وسىنىڭ دالەلى دەسەك تە بولادى. جەتىسۋلىقتار ءۇشىن تاريحي كۇندە تەاتر ۇجىمى دا قالىس قالماي, «بابالار اماناتى» اتتى تەاترلاندىرىلعان كورىنىستى كوپشىلىك نازارىنا ۇسىنعان ەدى. پاتريوتيزم ۇعىمىن ۇلعايتۋعا باعىتتالعان بۇل «تۋعان جەر» باعدارلاماسى بولاشاقتىڭ ىرگەسىن قالار ءاربىر جاس ۇرپاققا بيىك رۋح, سونى سەرپىن, جاڭا بەلەس بەرەتىنى حاق. سەبەبى, بۇل باعدارلاما ءتول تاريحىمىزدى دا, رۋحانياتىمىزدى دا كەڭىنەن قامتيدى ەمەس پە؟ دەمەك, ەلىم, جەرىم, وتانىم دەگەن جاس قازاقستاندىقتاردىڭ باسەكەگە قابىلەتتى, جان-جاقتى بولۋىنا ءبىر قادام جاقىنداتا تۇسپەك.
سونداي-اق ماقالادا «ۇلتتىق سالت-داستۇرلەرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس» دەلىنگەن. بۇگىنگى تاڭدا حالقىمىزدىڭ رۋحاني كەمەلدەنۋى مەن مادەني وسۋىنە ىقپال ەتەر, تاريحىمىز بەن بولمىسىمىزدان سىر شەرتەر ونەر شاڭىراعى تەاتر مەن ونىڭ بولىنبەس بولشەگى اكتەرلەردىڭ قوعامداعى ءرولى زور. نەمىس اكتەرى ءارى تەاتر رەجيسسەرى م.تالحايمەر «ەگەر قوعامدا جارا بولىپ جاتسا, ونى تەاتر ەمدەۋگە, نە ءبارى جاقسى بولادى دەپ سەندىرۋگە ءتيىستى ەمەس, تەاتر سول جاقتى ساۋساعىمەن نۇسقاپ كورسەتۋى كەرەك. سوندا عانا قوعام الدىنداعى پارىزى وتەلەدى», دەگەن ەكەن.
بيىل كورەرمەندەرىمىزگە ارناپ ا.ىقساننىڭ قالامىنان تۋىنداعان «حاق جولى» اتتى الەۋمەتتىك درامانى ۇسىندىق. ايتا كەتەرلىگى بۇل تەاترىمىزدا ساحنالانعان ءدىني ەكسترەميزم مەن تەرروريزم تاقىرىبىن قامتىعان العاشقى تۋىندى بولدى. جەتىسۋ جۇرتشىلىعىنا ۇسىنىلعان الەۋمەتتىك درامادا بۇگىندە كۇللى الەم حالقى ءۇشىن باس اۋرۋى بولىپ وتىرعان تەرىس ءدىني اعىمدار ماسەلەسى كوتەرىلدى. مۇسىلمان مەن كاپىرلەردىڭ اراسىنداعى تارتىس, قاراپايىم قازاق وتباسىنداعى جاس جەتكىنشەكتەردىڭ ءتۇرلى ءدىني اعىمداردىڭ جەتەگىندە كەتۋى, سونىمەن قاتار بۇل وقيعانىڭ وكىنىشكە قاراي قوعامدىق دەرتكە اينالىپ كەلە جاتقاندىعى انىق كورسەتىلەدى. ءبىر قۋانارلىعى, وزەكتى ماسەلەنى قاۋزاعان سپەكتاكلدى – تەك قالا جۇرتشىلىعى عانا تاماشالاعان جوق. ترۋپپا الماتى وبلىسى اكىمدىگى مەن وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن «رۋحاني كەرۋەن» جوباسى اياسىندا وبلىسىمىزعا قاراستى 25 ەلدىمەكەندى ارالاپ كەلدى. اق پەن قارانىڭ, جاقسىلىق پەن جاماندىقتىڭ اراسى قاس-قاعىم ءسات ەكەنى بەلگىلى. وسى جاعدايلاردىڭ تامىرىن ءدوپ باسقان قويىلىم ارقىلى قانشاما جاستارىمىز كوكەيىندە جۇرگەن ساۋالعا تۇشىمدى جاۋاپ الىپ, ءداستۇرلى جانە ءداستۇرلى ەمەس ءدىني اعىمداردىڭ اراجىگىن اجىراتقانىنا سەنىمدىمىز.
ءبىزدىڭ بۇل قارقىنمەن توقتاپ قالماسىمىز انىق. جاڭا ماۋسىمعا جاڭا قويىلىمدار دايىندادىق. بۇگىنگى تاڭدا ەلباسىمىزدىڭ تىكەلەي قولداۋىمەن, وبلىس باسشىلارىنىڭ باستاماسىمەن ءۇش قاباتتى, 510 ورىندى جاڭا تەاتر عيماراتىنىڭ قۇرىلىسى قارقىندى تۇردە جۇرگىزىلۋدە. الداعى جىلى زامان تالابىنا ساي جابدىقتالعان, ساۋلەتى كەلىسكەن سارايدا كورەرمەندەرىمىزبەن قاۋىشاتىن كۇندى اسىعا كۇتۋدەمىز.
عاليا تەمەرباەۆا,
ب.ريموۆا اتىنداعى تالدىقورعان دراما تەاترىنىڭ ديرەكتورى
