اسحات رايقۇل,
«ەگەمەن قازاقستان»
«نۇر الەم», ارت-ورتالىق, ۇزدىك تاجىريبەلەر ايماعى جانە تاقىرىپتىق پاۆيلون سىندى ەكسپو-نىڭ ءتورت نىسانى تۋريستىك ورىن رەتىندە قايتا اشىلعان بولاتىن. وسى وقيعاعا بايلانىستى استانا تۇرعىندارى مەن قوناقتارى 11-12 قاراشا كۇندەرى ەكسپو-2017 كورمەسىنەن قالعان تۋريستىك نىسانداردى تەگىن ارالاۋ مۇمكىندىگىنە يە بولدى.
پرەمەر-مينيستر مەن «استانا ەكسپو-2017 ۇك» اق باسقارما توراعاسى احمەتجان ەسىموۆ عيماراتتىڭ سەگىزىنشى قاباتىنا كوتەرىلىپ, استانانىڭ بولاشاعى جونىندەگى ەكسپوناتتاردى ارالاپ شىقتى. سونداي-اق ا.ەسىموۆ پرەمەر-مينيسترگە ەكسپو-2017 اۋماعىنىڭ الداعى جوسپارى تۋرالى باياندادى. «پرەزيدەنتىمىزدىڭ يدەياسى – كورمە كەلەشەگىنىڭ جارقىن بولۋىندا. بۇل – بولاشاققا دەگەن ينۆەستيتسيا, ادام كاپيتالىن دامىتۋ باعىتى. ازىرلەنگەن جانە ماقۇلدانعان كورمەدەن كەيىن نىسانداردى قولدانۋ تۇجىرىمداماسى وسىنىڭ جارقىن مىسالى», دەدى باسقارما توراعاسى.
احمەتجان ەسىموۆ ەكسپو-2017 كورمەسى كەزىندە تانىمال بولعان «نۇر الەم» پاۆيلونىنا توقتالىپ, مۇندا شارا بارىسىندا 1 ملن 300 مىڭ ادام كەلگەنىن ەسكە سالدى. ەندى ول «بولاشاق ەنەرگياسى» مۋزەيى رەتىندە جۇمىس ىستەپ, كەلۋشىلەرىن ءارتۇرلى جاڭعىرمالى ەنەرگيا كوزدەرىمەن, وسى سالاداعى سوڭعى جەتىستىكتەرمەن تانىستىرماق. «مەن «نۇر الەم» پاۆيلونى پاريجدەگى ەيفەل مۇناراسى, بريۋسسەلدەگى «اتوميۋم» ىسپەتتى بەلگىلى نىسانعا اينالارىنا سەنىمدىمىن», دەدى ول.
ايتا كەتەرلىگى, «نۇر الەم» عيماراتى مەن تاقىرىپتىق پاۆيلوندار ەنەرگيا مۋزەيى رەتىندە جۇمىستارىن جالعاستىرۋدا. ال وسى اۋماقتاعى وزگە عيماراتتار «استانا» حالىقارالىق قارجى ورتالىعىنا, حالىقارالىق «جاسىل» تەحنولوگيالاردى دامىتۋ ورتالىعىنا جانە حالىقارالىق IT-ستارتاپتار تەحنوپاركىنە بەرىلەدى. «استانا ەكسپو-2017» ۇك» اق كونتەنت جانە ءىس-شارالاردى ۇيىمداستىرۋ دەپارتامەنتىنىڭ ديرەكتورى مارات وماروۆتىڭ ايتۋىنشا, جۇمىستارىن قايتا باستاعان «نۇر الەم» سفەراسى, ارت-ورتالىق, تاقىرىپتىق پاۆيلون مەن ۇزدىك تاجىريبەلەر ايماعىنا كەلگەن قوناقتاردىڭ قاتارى قازىردىڭ وزىندە كوپ. «بارلىق پاۆيلوندار تانىمالدىلىققا يە. تۋريستىك نىسانداردى تاماشالاۋشىلاردىڭ سانى تۇسكى 12.00-گە دەيىن 3 مىڭ ادامعا جەتتى. حالىقتىڭ قىزىعۋشىلىعى ءالى دە باسىلعان جوق. ولارعا جاڭارتىلاتىن ەنەرگيا كوزدەرى جانە تۇرلەرى تۋرالى مول دەرەكتەر ۇسىنىپ وتىرمىز», دەدى ول.
شارا بارىسىندا «استانا ەكسپو-2017» ۇك» اق قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ 11 قاراشا كۇنى كورمە ماڭىنان اشىلادى دەپ جوسپارلانعان مۇزايدىننىڭ كوپشىلىككە پايدالانۋعا بەرىلۋى كەيىنگە شەگەرىلگەنىن مالىمدەدى. «مۇزايدىندى سالۋمەن جەكە ۇيىم اينالىسۋدا. ولار بىزدەن جەر تەلىمىن جالعا الدى. قازىرگى تاڭدا مۇز قاتىرۋ جۇمىسى جۇرگىزىلۋدە. اۋا رايىنا بايلانىستى ولاردىڭ جوسپارلارى ازداپ وزگەردى. جاساندى مۇزدى ۇستاپ تۇرۋ ءۇشىن كۇندىزگى اۋا تەمپەراتۋراسى – 5 گرادۋس بولۋى كەرەك. ال قازىر تەمپەراتۋرا بۇل تالاپقا سايكەس كەلمەي تۇر», دەدى س.كۋيانوۆ. ونىڭ ايتۋىنشا, مۇزايدىننىڭ قاشان جۇمىسىن باستايتىنى بەلگىسىز جانە اۋا رايىنا تاۋەلدى بولىپ وتىر.
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
