وسى وقيعاعا وراي وتكەن سالتاناتتى راسىمدە «استانا ەكسپو-2017» ۇك» اق باسقارما توراعاسى احمەتجان ەسىموۆ ءسوز سويلەپ, الداعى ۋاقىتتا قولعا الىناتىن شارۋالاردىڭ ءمان-جايىن مالىمدەدى. ونىڭ سوزىنە قاراعاندا, قازىرگى ۋاقىتتا كورمەگە قاتىسقان شەت مەملەكەتتەر ءوز ەكسپوزيتسيالارىندا دەمونتاجداۋ جۇمىستارىن اياقتاۋ ۇستىندە.
«كوپتەگەن كورمەلەردىڭ نىساندارى شارا اياقتالعان سوڭ كوممەرتسيالىق الاڭعا اينالادى نەمەسە تاراتىلادى. ماسەلەن, ميلاندا وتكەن سوڭعى كورمەدە سولاي بولدى. ءبىزدىڭ دە پاۆيلونىمىز ول كورمەگە قويىلدى, كەيىن جيناپ الىندى. وعان دەيىن بولعان ەكسپو كورمەلەرىنىڭ نىساندارى كوممەرتسيالىق ورتالىقتارعا بەرىلدى. پرەزيدەنتتىڭ يدەياسى – كورمە پەرسپەكتيۆاعا باعىتتالۋى كەرەك. بۇل – بولاشاققا سالىنعان ينۆەستيتسيا, كاپيتالدى دامىتۋ جولى. پرەزيدەنتتىڭ ساليقالى تۇجىرىمداماسىنىڭ تيىمدىلىگىن نىسانداردى قولدانۋ شەشىمى كورسەتىپ وتىر», دەدى ا.ەسىموۆ.
جاڭا جىلدان باستاپ ەكسپو-2017 قالاشىعىنداعى پاۆيلونداردا كۇردەلى جوندەۋ جۇمىستارى باستالادى ەكەن. «س-3», «س-4» پاۆيلوندارىندا «استانا» حالىقارالىق قارجى ورتالىعى ورنالاسپاق. «C-1» پاۆيلونىندا ءبىلىم بەرۋ ورتالىعى قۇرىلادى. ۇلتتىق كومپانيا باسشىسى اتاپ وتكەندەي, بۇل ورتالىقتىڭ نەگىزگى يدەياسى ەرتە جاستان باستاپ بولاشاق مامانداردىڭ مۇمكىندىكتەرى مەن الەۋەتىن انىقتاۋ جانە دامىتۋ بولماق. «مۇنداي قىزمەت كورسەتۋ نىساندارى قازىردىڭ وزىندە دامىعان ەلدەردە جۇمىس ىستەيدى. بالانىڭ ەرتە جاسىنان قانداي كاسىپكە يكەمدى ەكەنى انىقتالادى, بۇل قادام بولاشاقتا تابىستى بولۋى مۇمكىن. ورتالىق ءبىلىم بەرۋدەگى جاھاندىق ءۇردىستى قولدانۋعا, ءومىردى قاناعاتتاندىرۋعا باعىتتالعان. بۇل ءبىزدىڭ وڭىردەگى وسىنداي العاشقى ورتالىق بولادى. قازىرگى ۋاقىتتا ونىڭ تۇجىرىمداماسى نازارباەۆ ۋنيۆەرسيتەتىمەن بىرلەسىپ ازىرلەنۋدە», دەدى ا.ەسىموۆ.
جيىندا بەلگىلى بولعانداي,
«C-2» پاۆيلونىندا كورمە كەشەنى ورنالاسادى. ول ءتۇرلى كورمەلەرگە, حالىقارالىق جانە وتاندىق ەكسپوزيتسيالارعا ارنالعان الاڭ بولادى. «وڭىرلەر مەن مەملەكەتتەر وزدەرىنىڭ جەتىستىكتەرىن كورسەتىپ, تاجىريبەلەرىمەن ۇنەمى بولىسە الماق. قازىر ديزاينەرلىك تاپسىرمانى ازىرلەۋ جۇمىستارى جۇرگىزىلۋدە. بۇل جۇمىسقا «اتامەكەن» ۇلتتىق كاسىپكەرلەر پالاتاسى تارتىلىپ وتىر», دەدى ۇلتتىق كومپانيانىڭ باسقارما توراعاسى. ونىڭ ايتۋىنشا, كورپوراتيۆتىك پاۆيلوننىڭ نەگىزىندە IT-ستارتاپتاردىڭ حالىقارالىق تەحنوپاركى قۇرىلادى. ول باعىتتاعى جۇمىس اقپارات جانە كوممۋنيكاتسيالار مينيسترلىگىمەن بىرلەسىپ جۇرگىزىلمەك. «كوممۋنيكاتسيا ورتالىعى جەتەكشى باق-تىڭ لوكاتسياسى بولادى. ول الاڭ ەكسپو كورمەسى كەزىندە وتە ىڭعايلى ينفراقۇرىلىمدىق الاڭ رەتىندە ءوزىن كورسەتە ءبىلدى», دەيدى احمەتجان ەسىموۆ.
كورمەنىڭ تۋريستىك اۋماعىنىڭ اشىلۋ سالتاناتىندا استانا قالاسىنىڭ اكىمى اسەت يسەكەشەۆ حالىقارالىق شارادان كەيىن ەلوردانىڭ قالاي وزگەرگەنىن اڭگىمەلەدى. «ەكسپو-2017 كورمەسىنىڭ ستراتەگيالىق جوباسىنىڭ ارقاسىندا استانا قالاسى وتە كوركەم كەلبەتكە يە بولدى. حالىقارالىق كورمە ەلىمىزدىڭ «جاسىل» تەحنولوگيالارعا دەگەن ەرەكشە قىزىعۋشىلىعىن كورسەتتى. قازاقستان ەۋرازيالىق اۋماقتا قاۋىپسىز ءارى جىلدام دامىپ كەلە جاتقان مەملەكەت رەتىندە ءيميدجىن جاقسارتا ءتۇستى. ال استانا ەلىمىزدىڭ ەڭ ىسكەر ءارى قارجىلىق ورتالىعىنا اينالدى. كورمە نىساندارىنىڭ الداعى ۋاقىتتا دا ەل يگىلىگىنە جارايتىنى, اتاپ ايتقاندا حالىقارالىق قارجى ورتالىعى, ءىت-ستارتاپتار تەحنوپاركى, «جاسىل» تەحنولوگيالاردى دامىتۋ بويىنشا حالىقارالىق ورتالىقتىڭ اشىلاتىنى قۋانتادى», دەگەن قالا باسشىسى IT-تەحنوپاركتىڭ اشىلۋى ءبىزدىڭ عالىمدارعا, بيزنەسمەندەر مەن جاس ماماندارعا وزدەرىنىڭ يننوۆاتسيالىق جوبالارىن ىسكە اسىرۋعا مۇمكىندىك بەرەتىنىن ايتتى.
«نۇر الەم» استانانىڭ جاڭا كورىكتى ورنىنا اينالىپ, ەكسپو-2017 كورمەسىنىڭ باستى تۋريستىك مۇراسى بولىپ قالدى. ەلىمىزدىڭ باس شىرشاسى جانە ەڭ ءىرى مۇز قالاشىعى «نۇر الەمنىڭ» ماڭىندا سالىناتىنى تۋرالى شەشىم قابىلداندى», دەدى اكىم. ول سونىمەن قاتار ەكسپو-2017 اشىلعالى بەرى وعان 4 ملن ادام كەلگەنىن, بۇل استانا ءۇشىن ماڭىزدى كورسەتكىش ەكەنىن ايرىقشا جەتكىزدى.
«شىۇ جانە تمد ەلدەرى اراسىنداعى ءىس-شارالاردىڭ رەيتينگىندە استانا وسى بىرلەستىكتەردىڭ توپ-5 قالالارىنىڭ قاتارىنا ەندى. ينفراقۇرىلىمدىق جوبالار جۇزەگە اسىرىلىپ, جاڭا اۋەجاي مەن تەمىر جول ۆوكزالى ىرگە قالادى. 11 كوشە اشىلدى. 50 شاقىرىمنان استام جىلۋ جەلىسى مەن 25 شاقىرىم ەلەكتر جەلىسى سالىندى. قالادا قوناقۇيلەردىڭ سانى ارتتى. ەگەر 2016 جىلى ولاردىڭ سانى 165 بولسا, بيىل قوناقۇيلەردىڭ سانى 200-دەن استى. ەلوردادا جۇزدەگەن جاڭا مەيرامحانالار مەن ءدامحانالار اشىلدى. ەكسپو-نىڭ باستالۋىنا دەيىن 2 مىڭنان استام بەينەباقىلاۋ كامەرالارى ورناتىلىپ, بۇل جۇمىس قالادا قىلمىس دەڭگەيىن تومەندەتۋگە مۇمكىندىك بەردى. ماسەلەن, 2017 جىلدىڭ 8 ايى ىشىندە تىركەلگەن قىلمىستاردىڭ سانى شامامەن 20 پايىزعا تومەندەگەن. جىل سوڭىنا دەيىن قالادا 13 مىڭ كامەرا ورناتىلاتىن بولادى», دەدى استانا اكىمى.
سالتاناتتى ءراسىم كوركەمونەرپازدار قاتىسقان مەرەكەلىك كونتسەرتپەن جالعاستى.
اسحات رايقۇل,
«ەگەمەن قازاقستان»
