11, 12 جانە 13 قاراشادا اشىق ەسىك كۇندەرى اياسىندا استانا تۇرعىندارى مەن قوناقتارى «نۇر الەم» پاۆيلونى مەن «بولاشاق مۋزەيىن», تاقىرىپتىق پاۆيلوندار, ۇزدىك تاجىريبەلەر ايماعى, كونرگەسس ورتالىعى, ەنەرگيا حوللى جانە ارت-ورتالىعىنا بارا الادى. ءدال وسى نىساندار اشىلعان تۋريستىك كەشەننىڭ نەگىزىنە اينالىپ, قالىپتى ءتارتىپ بويىنشا جۇمىس ىستەيتىن بولادى.
«پرەزيدەنتىمىزدىڭ يدەياسى كورمە كەلەشەگىنىڭ جارقىن بولۋىندا. بۇل بولاشاققا دەگەن ينۆەستيتسيا, ادام كاپيتالىن دامىتۋ باعىتى. پرەزيدەنتىمىزبەن ازىرلەنگەن جانە ماقۇلدانعان كورمەدەن كەيىنگى نىسانداردى قولدانۋ تۇجىرىمداماسى وسىنىڭ جارقىن مىسالى», – دەدى احمەتجان ەسىموۆ.
كەلۋشىلەر تاقىرىپتىق پاۆيلوننىڭ ەكەۋىندە دە ەنەرگيانى ۇنەمدەيتىن ءارى ەنەرگەتيكالىق ءتيىمدى بولاشاق قالاسىن قۇرۋعا كومەكتەسەتىن جاڭا تەحنولوگيالاردىڭ تاجىريبە جۇزىندە قولدانىسىن تاماشالاي الادى. «ۇزدىك تاجىريبەلەر ايماعىندا» الەمنىڭ 13 ەلىنەن اكەلىگەن جاڭعىرتىلاتىن ەنەرگيا كوزدەرى سالاسىنداعى 24 جەتەكشى جوبا ۇسىنىلعان. ارت-ورتالىعى زاماناۋي ونەر ورتالىعى رەتىندە جۇمىسىن جالعاستىرىپ, سونداي-اق ەڭ كىشكەنتاي قوناقتار ءۇشىن ءبىلىم بەرۋ ورتالىعى اشىلعان.
احمەتجان ەسىموۆ ەكسپو-2017 كورمەسى كەزىندە تانىمال بولعان «نۇر الەم» پاۆيلونىنا توقتالىپ ءوتتى. كورمە بارىسىندا مۇندا 1 ملن 300 مىڭ ادام كەلگەن. ەندى ول بولاشاق ەنەرگياسى مۋزەيى رەتىندە جۇمىس ىستەپ, كەلۋشىلەرىن ءارتۇرلى جاڭارتىلعان ەنەرگيا كوزدەرىمەن, وسى سالاداعى سۋ جاڭا جەتىستىكتەرمەن تانىستىراتىن بولادى.
«مەن «نۇر الەم» پاۆيلونى, پاريجدەگى ەيفەل مۇناراسى, بريۋسسەلدەگى «اتوميۋم» ىسپەتتى بەلگىلى نىسانعا اينالارىنا سەنىمدىمىن», - دەپ اتاپ ءوتتى احمەتجان ەسىموۆ.
ايتا كەتسەك, كورمە اۋماعىنا كىرۋ تەگىن جانە بۇرىنعى – سولتۇستىك, وڭتۇستىك, باتىس جانە شىعىس كىرۋ توپتارىنان جۇزەگە اسىرىلادى. بيلەتتىڭ قۇنى - 1500 تەڭگە بولادى. ول ارقىلى «نۇر الەم» پاۆيلونىن, ەكى تاقىرىپتىق پاۆيلوندى جانە ۇزدىك تاجىريبەلەر ايماعىن تاماشالاۋعا بولادى. سونداي-اق, ۇوس ارداگەرلەرى, مۇمكىندىگى شەكتەۋلى ازاماتتار, اتا-انا قاراۋىنسىز قالعان بۇلدىرشىندەر مەن كوپبالالى انالار ءۇشىن ەكسپو-2017 تۋريستىك ايماعىنا كىرۋ تەگىن بولادى. ال, زەينەتكەرلەر مەن مەكتەپ وقۋشىلارىنا ارنالعان بيلەت قۇنى 500 تەڭگە بولسا, ستۋدەنتتەر بيلەتتى 800 تەڭگە كولەمىندە ساتىپ الا الادى. بيلەتتەردى ەكسپو-2017 اۋماعىنداعى بيلەت-كاسسالارىندا جانە ەكسپو-2017 رەسمي سايتى ارقىلى ساتىپ الۋعا بولادى.
سونىمەن قاتار, ەكسپو كەشەنىندە اۋماعى 3,5 مىڭ شارشى مەتردى قۇرايتىن مۇز ايدىنى اشىلادى. مۇز ايدىنىندا 1 سەانس قۇنى 1000 تەڭگە بولماق. سونداي-اق, بيىل استانا قالاسىندا باستى جاڭا جىلدىق شىرشا ەكسپو-2017 اۋماعىندا ورناتىلاتىن بولادى.
ايتا كەتەيىك, كورمە اۋماعىندا 23 تاماقتانۋ نىسانى جۇمىس ىستەيتىن بولادى. ال, اۆتوكولىكتەر ءۇشىن جەراستى كولىك تۇراعى اشىلادى, وندا العاشقى 3 ساعاتى تەگىن, ال كەيىنگى ءار ساعات ءۇشىن اۆتوتۇراق قۇنى 100 تەڭگە بولماق.
