بيىل 7 ويىن وتكىزگەن قۇرامامىز 6 ويىندا جەڭىلىپ, تەك ءبىر عانا ماتچتا تەڭ ءتۇستى. قاقپامىزعا 18 گول سوعىپ, ءوزىمىز قارسىلاس قاقپاسىن نەبارى 4 رەت ءدال كوزدەپپىز. ونىڭ ەكەۋىن سوڭعى ەكى ويىندا «قايراتتىڭ» قوسالقى كومانداسىندا وينايتىن باۋىرجان تۇرىسبەك سوقتى. ال جالپى مۇنداي تومەن كورسەتكىش تەك 2008 جىلى تىركەلگەن ەدى. سول ءبىر ءساتcىز وتكەن جىلدا قازاقستان 8 ويىندا جەڭىلىس تاپتى. مىنە, سودان بەرى سەگىز جىل بويى مۇنداي قۇلدىراۋ بولماعان. بۇل ەندى بۋىن الماسۋدىڭ كەسىرى مە, جوق الدە باپكەردىڭ ناشارلىعىنان با؟
باپكەر دەمەكشى قۇراما تىزگىنىن ۇستاعان الەكساندر بوروديۋكتىڭ ءالى 2 جىلدىق كەلىسىمشارتى بار. ياعني قۇرامانى تاعى ءبىر ىرىكتەۋ تسيكلىندە جاتتىقتىرۋى عاجاپ ەمەس. الايدا بيىلعى تومەن كورسەتكىشتەن كەيىن قازاقستان فۋتبول فەدەراتسياسىنىڭ باسشىلارى باپكەردى اۋىستىرادى دەپ كۇتكەن ەدىك.
جالپى, قازاقستانعا كەلگەلى بەرى ءبىر وڭ ناتيجە كورسەتپەگەن رەسەيلىك ماماندى ەلىمىزدە دە ۇستاپ تۇرعان نەندەي كۇش ەكەنىن ايتۋ قيىن. «قايرات» كومانداسىنىڭ باپكەرى بولىسىمەن العاشقى 4 تۋردا بىردە-ءبىر جەڭىسكە جەتپەگەن مامان, ورنىنان ەرتە باستان قۋىلعان بولاتىن. بىراق, سوندا دا قازاقستان فۋتبول فەدەراتسياسى بوروديۋكتى باس باپكەر ەتىپ تاعايىندادى. گۋس حيددينك پەن ديك ادۆوكاتقا كومەكشى بولعانىنان باسقا جەكە-دارا ءوزى كورىنە الماعان مامانعا قاراعاندا ەلىمىزدە ءجىبى ءتۇزۋ بىرنەشە بىلىكتى باپكەر بار ەدى.
2018 جىلعى الەم چەمپيوناتىنىڭ ىرىكتەۋىن وتە ناشار وتكىزگەن سوڭ, قۇرامامىز كەلەسى جولى مۇنداي ولقىلىقتى قايتالاماۋ ءۇشىن ىسكە كىرىسەر دەپ شەشتىك. فيفا جولداستىق كەزدەسۋلەرگە بەلگىلەگەن ارنايى كۇندى قۇرامامىز بارىنشا پايدالانىپ قالۋى ءتيىس ەدى. الايدا جولداستىق كەزدەسۋ وتكىزەتىن قارسىلاس تاپپاي دال بولىپ قالدى. شىنىن ايتۋ كەرەك, ءبىزدىڭ قۇرامامەن ەشكىم ويناعىسى كەلمەيتىندەي كورىنەدى. العاشقىدا رەسەيمەن جولداستىق كەزدەسۋ وتكىزەتىن ارگەنتينا قۇراماسىن شاقىرۋىمىز مۇمكىن دەلىندى. سويتسەك ارگەنتينا 14 قاراشا كۇنى رەسەي جەرىندە نيگەريامەن كەزدەسۋدى جوسپارلاپ قويىپتى. ءيا, قۇرامىندا مەسسي, يگۋاين, ديبالا سەكىلدى جۇلدىزدار وينايتىن ارگەنتينا ءبىزدى نەعىلسىن. ۇنەمى قارسىلاس تاپپاي قالعاندا قىرعىزستان قۇراماسىن شاقىرتاتىنبىز. سوڭعى جولداستىق كەزدەسۋدە قىرعىزستاننان جەڭىلىپ, بىشكەكتەن ماسقارامىز شىعىپ قايتقاننان كەيىن قازاقستان فۋتبول فەدەراتسياسى ول ەلدىڭ قۇراماسىمەن ويناۋدى ءتيىمسىز دەپ سانادى. راسىمەن دە, ازيا قۇرلىعىنىڭ ورتاڭقولى سانالاتىن قىرعىزستاننان جەڭىلگەنىمىز كۇللى قازاق جانكۇيەرىنىڭ شامىنا ءتيدى. وسىدان سوڭ, بارلىق جاعدايدى سارالاي كەلە, قازاقستان ۇلتتىق قۇراماسى تالعارداعى بازادا وقۋ-جاتتىعۋ جيىندارىن وتكىزەتىن بولدى. ەكى بىردەي جولداستىق كەزدەسۋدى دە ۇيىمداستىردى. قارسىلاس – قازاقستان جاستار قۇراماسى. كۇلەتىن جاعداي ەمەس, ارينە. قازاقستان جاستار قۇراماسى تالانتتى جاستارعا باي. ءتىپتى, باستى كومانداعا قارسىلاس بولا الادى.
ەرمۇحامەد ماۋلەن,
«ەگەمەن قازاقستان»
