ەندى اۆتوبۋستا تيىن ساناپ جاتپايسىز, ەلەكتروندى بيلەت الۋ ءۇشىن تەك ۇيالى تەلەفون عانا قاجەت. ارينە, جولاقىنى قولما-قول اقشامەن تولەۋ ءتاسىلى دە ساقتالادى. ورال قالاسىندا «Smart city» - «اقىلدى قالا» جوباسى بىلتىردان ەنگىزىلە باستادى. قازىردىڭ وزىندە «اشىق اكىمدىك», «ونلاين-كسك», «قاۋىپسىز اۋلا» جۇيەسى جۇمىس ىستەيدى. ەندى كەزەك قوعامدىق كولىككە دە جەتتى.
ەلىمىزدە ەلەكتروندى بيلەت جەلىسىن العاش بولىپ الماتىلىقتار قولعا العان ەكەن. ورال قالاسى اكىمدىگىنىڭ ماماندارى تاجىريبە الۋ ءۇشىن وڭتۇستىك استاناعا ارنايى بارىپ قايتقان.
- «SMS BUS» اتتى جاڭا جوبا ازىرگە قاناتقاقتى نەگىزدە سىناقتان وتەدى. الدىمەن №5, 10, 22 جانە 36-شى قوعامدىق كولىك جولاۋشىلارى جولاقىنى ونلاين تولەۋدىڭ وڭ-تەرىسىن بايقاپ كورمەك. جوبا ءساتتى ىسكە اسسا, بۇل تولەم جۇيەسىن بارلىق اۆتوبۋسقا ەنگىزەمىز, - دەيدى ورال قالالىق جولاۋشىلار تاسىمالى جانە اج ءبولىمىنىڭ باسشىسى قايرات مۇحامبەتقاليەۆ.
جاڭا جۇيەنى قولدانۋ وتە وڭاي, كەز كەلگەن قاراپايىم ۇيالى تەلەفون دا جاراي بەرەدى. جولاقى تولەۋ ءۇشىن 2505 نومەرىنە اۆتوبۋستىڭ كودى جازىلعان sms جىبەرۋ كەرەك. حابارلاما تەگىن. ال قاسىڭىزداعى كىسىگە تولەگەندە, اۆتوبۋس كودىنان كەيىن بوس ورىن قويىپ, ونىڭ تەلەفون ءنومىرىن جازىپ جىبەرەسىز.
ءبىر ءتاۋىرى, جولاقىنى تەلەفون بالانسىنداعى بىرلىكپەن نەمەسە بانك كارتوچكاسىنان دا تولەۋگە بولادى ەكەن.
- بانك كارتاسىمەن تولەۋ ءۇشىن جولاۋشى الدىن الا smsbus.kz سايتىنا كىرىپ, تىركەلۋى كەرەك. كەز كەلگەن بانكتىڭ VISA جانە Master Card كارتالارى قولدانىلادى. كوميسسيا الىنبايدى. ءتىپتى, بانك ارقىلى تولەم جاساعانى ءۇشىن بونۋستار دا قاراستىرىلعان, - دەيدى «SMS BUS» كومپانياسىنىڭ وكىلى سەرجان يدياتوۆ.
قازبەك قۇتتىمۇرات ۇلى
«ەگەمەن قازاقستان»
ورال قالاسى
