شىمكەنت قالاسىنىڭ اكىمى بولىپ نۇرلان ساۋرانباەۆ تاعايىندالدى

بۇگىن وبلىس اكىمى ج.تۇيمەباەۆ شىمكەنت قالاسىنىڭ اكىمى لاۋازىمىنا

تاعايىندالعان نۇرلان ەرمەك ۇلى ساۋرانباەۆتى قالا اكتيۆىنە تانىستىرىپ, الداعى جۇمىسىنا ساتتىلىك تىلەدى. شىمكەنت قالاسى ەلباسىنىڭ نازارىنداعى ەكونوميكاسى مەن قۇرىلىسى قارقىن العان ەلىمىزدەگى ءۇشىنشى قالا ەكەنىن ايتقان ايماق باسشىسى قالا اكىمىنە جاڭا جۇمىسىندا جۇكتەلگەن مىندەتتەردى ابىرويمەن اتقاراتىنىنا سەنىم ءبىلدىرىپ, بىرقاتار تاپسىرمالار جۇكتەدى.

ء«سىز كاسىبي دەڭگەيى جوعارى, مەملەكەتتىك قىزمەتتىڭ ءتۇرلى سالاسىنان وتكەن تاجىريبەلى مامانسىز, سوندىقتان دا  نۇرلان ەرمەك ۇلى قالانىڭ الەۋمەتتىك-ەكونوميكالىق دامۋىنا كەرى اسەر ەتىپ وتىرعان بىرقاتار ماسەلەلەرگە نازار اۋدارىپ, مەملەكەتتىك باعدارلامالاردىڭ ورىندالۋىن  قامتاماسىز ەتۋدى, قالا بيۋدجەتىنىڭ كىرىس بولىگىن ارتتىرۋدى. سونداي-اق, شاعىن جانە ورتا بيزنەستى دامىتۋ ماقساتىندا ينۆەستورلار تارتۋدى, جاڭا ءوندىرىس ورىندارىن اشۋ ارقىلى تۇرعىنداردى جۇمىسپەن قامتۋدى, قالاعا جاڭادان قوسىلعان ەلدى مەكەندەردىڭ ينفراسرتۋكتۋراسىن دامىتۋ بويىنشا ناقتى شارالار قابىلداۋدى تاپسىرامىن»,-دەدى وبلىس اكىمى.

ن.ە.ساۋرانباەۆ 1967 جىلى 20 مامىردا تۋىلعان, ءبىلىمى جوعارى, ماماندىعى بويىنشا بىلىكتىلىگى - ەكونوميست.

ەڭبەك جولىن 1991 جىلى استانا قالاسىندا «ەڭبەك» كومپانياسىنىڭ باس ديرەكتورى بولىپ باستاعان.

1997-2002 جىلدارى قازاقستاننىڭ كاسىپكەرلەر كونگرەسسىنىڭ اتقارۋشى ديرەكتورى, «قازاقستان تەمىر جولى» رەسپۋبليكالىق مەملەكەتتىك كاسىپورىننىڭ «جولاۋشىلار تاسىمالى» ەنشىلەس كاسىپورىن ديرەكتورى, «انپز» اشىق اكتسيونەرلىك قوعامىنىڭ ءبىرىنشى ۆيتسە-پرەزيدەنتى رەتىندە ەڭبەك ەتكەن.

2002-2016 جىلدارى «قازمۇنايگاز» ۇلتتىق كومپانياسى» اكتسيونەرلىك قوعامىنىڭ ينجينيرينگتىك جانە سەرۆيستىك قىزمەتتەر دەپارتامەنتىنىڭ ديرەكتورى, مۇنايدى تاسىمالداۋ جونىندەگى باسقارۋشى ديرەكتورى, سەرۆيستىك جوبالار جونىندەگى باسقارۋشى ديرەكتورى, قازاقستان رەسپۋبليكاسىنىڭ يندۋستريا جانە جاڭا تەحنولوگيالار ۆيتسە-ءمينيسترى, قازاقستان رەسپۋبليكاسىنىڭ قورعانىس ءمينيسترىنىڭ ورىنباسارى لاۋازىمدارىن اتقارعان.

2017 جىلدىڭ اقپان ايىنان باستاپ ەكسپو-2017 حالىقارالىق مامانداندىرىلعان كورمەسىن ازىرلەۋ جانە وتكىزۋ ماسەلەلەرى جونىندەگى شتابتىڭ ۇيىمداستىرۋ كوميتەتىنىڭ باسشىسى  لاۋازىمىن اتقارىپ كەلگەن.

 «قۇرمەت» جانە «پاراسات» وردەندەرىمەن, «قازاقستان رەسپۋبليكاسىنىڭ تاۋەلسىزدىگىنە 20 جىل» مەرەكەلىك مەدالىمەن ناگرادتالعان.