«بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسىن ىسكە اسىرۋ 2017 جىلدان باستالدى. بارلىعى 817 كوللەدج جۇمىس ىستەيدى, ولاردىڭ 473 كوللەدجى مەملەكەتتىك, 344-ءى — جەكەمەنشىك. سونداي-اق, ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسى شەڭبەرىندە جەرگىلىكتى بيۋدجەت ەسەبىنەن 2900 ورىندىق ءتورت كوللەدجدىڭ قۇرىلىسى, 520 ورىندىق ءۇش جاتاقحانانى سالۋ جانە جوندەۋ قاراستىرىلعان.
تجكب وقۋ ورىندارىنا مەملەكەتتىك ءبىلىم بەرۋ تاپسىرىسى بويىنشا بارلىعى 100 815 ادام قابىلداندى. وتكەن وقۋ جىلىمەن سالىستىرعاندا تجكب-مەن كادرلار دايارلاۋعا ارنالعان مەملەكەتتىك ءبىلىم بەرۋ تاپسىرىسىنىڭ كولەمى - 24,8 مىڭ ورىنعا ۇلعايدى.
باعدارلاما شەڭبەرىندە وقىتۋ قىسقا مەرزىمدى كۋرستار بويىنشا جۇزەگە اسىرىلادى. 2017 جىلعا 71 مىڭ ادامدى وقىتۋ جوسپارلانعان. بۇگىنگى تاڭدا قىسقا مەرزىمدى وقىتۋعا 61 مىڭ ادام جىبەرىلدى.
اعىمداعى جىلى ءبىلىم بەرۋ مازمۇنىنا وزگەرىستەر ەنگىزىلدى. ول ءۇشىن تۇلەكتەرگە ءۇش جۇمىسشى بىلىكتىلىگىنە دەيىن جانە «ورتا بۋىن مامانى» بىلىكتىلىگىن الۋعا مۇمكىندىك بەرەتىن 130 ۇلگىلىك وقۋ جوسپارى مەن باعدارلاماسى قايتا قارالدى.
وقۋ جوسپارلارىندا قايتالاناتىن پاندەردى الىپ تاستاۋ, وقىتۋ مەرزىمدەرىن قىسقارتۋ, جۇمىس بەرۋشىلەردىڭ تالاپتارىنا سايكەس ءبىلىم باعدارلامالارى 50%-عا دەيىن وزگەرتۋ ەسەبىنەن وقۋ پروتسەسى وڭتايلاندىرىلدى. اعىمداعى جىلدىڭ سوڭىنا دەيىن تاعى 32 ۇلگىلىك وقۋ جوسپارى مەن باعدارلاماسىنىڭ جاڭارتىلۋى اياقتالادى.
قازىرگى تاڭدا 125 تجكب وقۋ ورنىنىڭ وقۋ پروتسەسىنە الەمدىك وزىق تاجىريبە نەگىزىندە ازىرلەنگەن 45 مودۋلدىك ءبىلىم بەرۋ باعدارلاماسى ەنگىزىلدى. اعىمداعى جىلى جۇمىس بەرۋشىلەردىڭ ۇسىنىستارى نەگىزىندە تەحنيكالىق جانە كاسىپتىك ءبىلىم بەرۋ ماماندىقتارى مەن كاسىپتەرىنىڭ جىكتەۋىشى قايتا قارالدى.
بۇدان وزگە, تجكب پەداگوگيكالىق كادرلاردىڭ بىلىكتىلىگىن ارتتىرۋ بويىنشا مودۋلدىك باعدارلامالار ازىرلەندى. 2017 جىلى وسى باعدارلامالار بويىنشا 5 200 ادام, ونىڭ ىشىندە 300 كوللەدج باسشىسى بىلىكتىلىگىن ارتتىردى.
جالپى, 2021 جىلعا دەيىن تجكب تەگىن بىلىكتىلىگىن 720 مىڭنان استام ازامات الادى.
ەڭبەك جانە حالىقتى الەۋمەتتىك قورعاۋ ءمينيسترى تامارا دۋيسەنوۆانىڭ مالىمەتىنە سايكەس ءونىمدى جۇمىسپەن قامتۋ جانە جاپپاي كاسىپكەرلىكتىڭ 2017-2021 جىلدارعا ارنالعان باعدارلاماسى اياسىندا رەسپۋبليكالىق بيۋدجەت ەسەبىنەن تەحنيكالىق جانە كاسىپتىك ءبىلىمى بار كادرلاردى دايارلاۋ جانە قىسقامەرزىمدى كاسىپتىك ءبىلىم بەرۋ قاراستىرىلعان. باعدارلاماعا قاتىسۋشىلار ستيپەنديامەن, ءبىر رەتتىك ىستىق تاعاممەن, جولاقىمەن قامتاماسىز ەتىلەدى.
وڭىرلەردە 402 كوللەدجدە قىسقامەرزىمدى وقىتۋمەن 60 مىڭنان استام ادام قامتىلعان. بۇگىنگى تاڭدا وقىتۋعا 21 مىڭنان استام ادام يە بولدى. بۇدان وزگە, تامىزدان باستاپ جۇمىس بەرۋشىلەردىڭ وقۋ ورتالىقتارى بازاسىندا ءۇش مىڭنان استام ادام وقىپ جاتىر.
ءموبيلدى وقۋ ورتالىقتارى بىرقاتار وبلىستاردا ساتىپ الىنعان. وندا بەس پيلوتتىق وڭىردە ءبىر جارىم مىڭ ادام قامتىلعان. «باستاۋ-بيزنەس» جوباسى بويىنشا 15 مىڭنان استام ادام وقىتۋمەن قامتىلعان. اعىمداعى جىلى 26 مىڭ جوسپار كەزىندە قىسقامەرزىمدى كۋرستاردا 61 مىڭ ادام وقىدى.
«جالپى 2021 جىلعا دەيىن باعدارلاما بويىنشا 500 مىڭ ادامدى وقىتۋ كوزدەلگەن», — دەپ اتاپ ءوتتى ت. دۇيسەنوۆا.
اتالعان ماسەلە بويىنشا سونداي-اق جامبىل وبلىسىنىڭ اكىمى ك. كوكىرەكباەۆتىڭ, شىعىس قازاقستان وبلىسىنىڭ اكىمى د. احمەتوۆتىڭ, قوستاناي وبلىسى اكىمى ا. مۇحامبەتوۆتىڭ ەسەپتەرى تىڭدالدى.
ماسەلەنى قاراۋ قورىتىندىسى بويىنشا باقىتجان ساعىنتاەۆ تەگىن تجكب جوباسىن ىسكە اسىرۋ كەزىندەگى باستى ماسەلە — جۇمىسپەن قامتۋ ەكەنىن ايتتى. ەكىنشىسى — بولىنەتىن كرەديتتەر سوماسىن ارتتىرۋ. جوبانى ىسكە اسىرۋدى باقىلاۋ پرەمەر-ءمينيستردىڭ ورىنباسارى ەربولات دوساەۆقا جۇكتەلدى.
